Perezida Kagame yavuze imvano y’ibyatangajwe ko u Rwanda ruhimba ibipimo by’ubukene

Yanditswe na Rabbi Malo Umucunguzi
Kuya 14 Kanama 2019 saa 04:56
Yasuwe :
0 0

Perezida Paul Kagame yanenze ibyatangajwe n’ikinyamakuru Financial Times, cyavuze ko imibare y’ubukene mu gihugu ari ibinyoma bihimbwa hagamijwe kugaragaraza ko ibintu bigenda, kandi atariko bimeze.

Perezida Kagame yabigarutseho mu kiganiro yagejeje ku rubyiruko mu Intare Conference Arena kuri uyu wa Gatatu, aho yahamije ko nta kintu na kimwe cy’igihimbano mu bigaragaza iterambere u Rwanda rurimo kugeraho.

Ni amagambo yavuze nyuma n’inkuru y’ikinyamakuru Financial Times, cyavuze ko ku isesengura cyakoze “ku mibare 14 000 n’ibiganiro yagiranye n’impuguke, bigaragaza ko izamuka ry’ibiciro ku miryango mu Rwanda rigaragaza ko ubukene bwiyongereye hagati ya 2010 na 2014.”

Ubusesenguzi bwakozwe n’Ikigo cy’igihugu cy’ibarurishamibare (NISR) ku byavuye mu isuzuma rya Kane ku mibereho y’Abanyarwanda (EICV4) n’irya gatatu (EICV3), ryagaragaje ko kuva mu mwaka wa 2011 kugeza mu 2014, ubukene bwagabanutse ku kigero cya 6.9 %.

Ni imibare ariko Financial Times ihakana, ivuga ko kugira ngo bishoboke ari uko igipimo cy’ihindagurika ry’ibiciro cyaba ari 4.7 ku ijana cyangwa munsi yaho hagati ya Mutarama 2011 na Mutarama 2014, nyamara ngo impuguke enye bavuganye zigaragara ko byari hejuru yaho.

Mu bo yifashishije harimo Diane Rwigara, David Himbara wahunze igihugu, Umubiligi Fillip Reyntjens ukunze kutavuga neza u Rwanda n’abandi.

Sam Desire wo muri Kaminuza ya Leuven mu Bubiligi we yavuze ko yakurikiranye ibipimo iby’ubukene mu Rwanda, yavuze ko ibiciro byazamutse “nibura kuri 30 ku ijana hagati ya 2011 na 2014”, ku buryo isesengura rigaragaza ko ubukene bwazamutse nibura kuri 6.6 ku ijana.

Mu itangazo NISR yasohoye, yavuze ko kugereranya ibipimo by’izamuka ry’ibiciro ku masoko na EICV ugamije gusuzuma ukuri kuri muri EICV, ubwabyo bidakwiriye.

Perezida Kagame ati “Niba umuntu avuze ko hari ibibazo tugifite tugomba guhangana nabyo, byo yaba avuze ukuri kuko dufite ibibazo byinshi tugomba gukemura, nta gushidikaya. Turimo guhangana nabyo kandi tuzakomeza guhangana nabyo, kandi aho nta gishya kirimo mu kuba u Rwanda rufite ibibazo kandi twese dukomeje gufatanya mu kuzana impinduka.”

Yakomoje kuri raporo za Banki y’Isi, Ikigega Mpuzamahanga cy’Imari, IMF, World Economic Forum na raporo ya Standard & Poor’s (S&P) iherutse kuzamura igipimo cy’ubukungu bw’u Rwanda kikava kuri “B” kikaba "B+".

Ati “Ibi bitangarijwe mu cyumweru kimwe, bo ngo ‘u Rwanda ruhimba imibare igaragaza inzego z’ubukene, haza n’izo nkuru zindi. Ariko ndababwira aho bikomoka, mushobora kubibona. Muribuka ikiganiro nigeze kugira, nkabaza umuntu aho aturuka cyangwa uwo ariwe? Bisa n’ubufatanye buhari buri kugerageza kurwana ku muntu, ariko aha niho ngomba kuba ndi.”

Yavuze ko ari yo mpamvu igihe aganira n’urubyiruko akunda kurubwira ko uru ari urugamba rugomba kurwanirwa hamwe, rwo kurwanirira “abo turibo n’abo dushaka kubabo.”

Perezida Kagame yavuze ko hari ubwo abantu batuma basuzugurwa, cyane iyo hari ibibazo ariko ntibabikemure, bigatanga urwaho rw’abashaka kubasuzugura.

Ati “Ariko nanatekereza ko bamwe muri aba bantu nta burenganzira ubwo ari bwo bwose bafite bwo gusuzugura abantu. Kubera ko niba dushaka kubaka u Rwanda dushaka, twumva ko rutubereye, uwo ni muntu ki uza kubwira abantu ngo ibi nibyo mukwiye, nibyo bibabereye, ibi si byiza kuri mwe [...] nzahindukira nkubwire nti ‘ushaka ko nkubwira ibitakubereye? Ikintu kimwe nabwira uwo muntu kitamubereye ni ukuza kumbwira ibitankwiriye.”

“Kandi ibi ndimo kuvuga, nitudashyira mu myumvire yacu ko ibintu dushaka, dukeneye kugeraho, gukora, ari ibitubereye, ko tutarimo kubikora ngo tugire uwo dushimisha, ko tubifitiye uburenganzira, ibintu byose twaganiriye hano, byiza, bizaba imfabusa.”

Guverineri wa Banki Nkuru y’u Rwanda, John Rwangombwa, yabwiye itangazamakuru ko abakemanga imibare y’ubukene mu Rwanda nta we bakwiye kurangaza, kuko rukomeje kubaka inzego zarwo hagamijwe gutanga imibare ifatika ari nayo ishingirwaho mu igenamigambi.

Ati “Ntabwo navuga ko dukwiye kuyobywa na raporo zivuga ibitari byo, raporo bagenderaho, iyo urebye ibyo bashingiraho, byakwereka raporo iyo ariyo, kandi iyo bigaragaraye muri Financial Times… ntabwo ari ikintu gikomeye, iki kinyamakuru turakizi. Icyo wakwibaza ni aho bashingira ibyo bavuga. Niba batekereza ko abantu bamwe bizewe kurusha Banki y’Isi, ibyo bikwereka urwego rw’ibyo batangaza.”

Guverineri Rwangombwa yavuze ko u Rwanda rukomeje kubaka ubushobozi bwarwo mu ibarurishamibare, aho NISR ikomeje gukorana n’ikigo cyo mu Bwongereza mu kubaka ubushobozi, kandi ngo ni ibintu bizakomeza.

Perezida Kagame yavuze ko kunenga imibare y'iterambere ry'u Rwanda biri mu mugambi w'abifuza ko rugendera mu murongo wabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza