Perezida Kagame yasobanuye uko inama ya FOCAC iziye igihe

Yanditswe na IGIHE
Kuya 3 Nzeri 2018 saa 08:51
Yasuwe :
0 0

Perezida Kagame uri i Beijing mu Bushinwa, aho yitabiriye inama y’Ihuriro ku bufatanye bwa Afurika n’u Bushinwa ‘FOCAC’, yavuze ko iyi nama iziye igihe aho Isi ikenewe ubufatanye kuruta ikindi gihe cyose.

Iyi nama ni urubuga rwo kungurana ibitekerezo ku ngamba z’ubufatanye mu nzego zitandukanye. Igamije kwagura uburyo bw’ubufatanye no gukomeza gukora ibyiza birenze ibirimo gukorwa neza.

Kuwa 3-4 Nzeri iraterana ku nshuro ya Gatatu mu nsanganyamatsiko igira iti “Icyerekezo cy’Umuryango w’u Bushinwa na Afurika ukomeye kandi usangiye ahazaza”.

Mu kiganiro yagiranye n’ibiro ntaramakuru by’u Bushinwa, Perezida Kagame yavuze ko FOCAC ari uburyo bw’ubufatanye kuva bwatangira mu 2000 kandi bwageze kuri byinshi byiza yaba mu burezi, ubuzima, ibikorwa remezo ndetse n’iterambere ry’inganda muri Afurika.

Ati “U Bushinwa na Afurika bisangiye icyerekezo cy’iterambere n’umutekano, byose bishingiye ku musingi ukomeye w’ubufatanye bwa Afurika n’u Bushinwa buriho”.

Avuga ko iyi nama iziye igihe kuko hakenewe ubufatanye kuruta uko bwigeze gukenerwa, aho hari bimwe mu bihugu bigaragaza umugambi wabyo wo guharanira inyungu zabyo mbere kuruta iz’ibindi bihugu.

Ubufatanye bw’u Bushinwa na Afurika bushimangira uburyo ibihugu bikwiye gufatanya, bigatanga ubwo butumwa bwiza ku Isi yose.

Perezida Kagame unayoboye Umuryango wa Afurika yunze Ubumwe, AU, yavuze ku kiswe ‘kwigarurira Afurika k’u Bushinwa binyuze mu madeni’, avuga ko ari imyumvire idafite aho ishingiye igamije guca intege umubano w’u Bushinwa na Afurika.

Ati “Bavuga ko u Bushinwa bwagurije Afurika cyane ariko ikindi cyo kureba ni uko abanenga u Bushinwa ku nguzanyo, nibo batanga nkeya cyane, kandi Afurika ikeneye imari yo gushora mu kubaka iterambere ryayo.”

Muri Nyakanga uyu mwaka Perezida Xi Jinping yagiriye uruzinduko mu Rwanda, Perezida Kagame yavuze ko wabaye umwanya mwiza wo kuganira ndetse no kongera ingufu mu mubano n’ubufatanye bw’ibihugu byombi ndetse no mu bindi.

Perezida Kagame abajijwe ku mubano w’u Rwanda n’u Bushinwa, yavuze ko ari ubufatanye bubyara umusaruro kandi impande zombi zungukiramo, kandi bumaze kugirira akamaro abanyarwanda.

Buri gihugu gifite Ambasaderi mu kindi. Uretse ibyo, amasosiyete akomeye y’Abashinwa arimo ay’ubwubatsi arakomeye ku isoko ry’u Rwanda mu kubaka ibikorwaremezo nk’imihanda, imiturirwa n’ibindi.

Uretse ibikorwa by’ubucuruzi by’Abashinwa mu Rwanda, bunarutera inkunga mu nzego zitandukanye. Kuri ubu hari kurangizwa inyubako izakoreramo Minisitiri w’Intebe na minisiteri zigera kuri eshanu.

Izuzura itwaye miliyoni 37 z’amadolari ya Amerika, yose yatanzwe n’u Bushinwa. Hari imihanda myinshi bwateye inkunga, ishoramari rikomeye aho ibigo by’ubucuruzi by’Abashinwa byibona cyane mu Rwanda.

Perezida Kagame yavuze ko amavugurura y’Umuryango wa Afurika yunze Ubumwe (AU), ahuye neza n’ubufatanye bw’u Bushinwa.

Yavuze ko agamije kubaka ubushobozi n’ubufatanye bubyara umusaruro kandi uyu mugabane witeze ko u Bushinwa buzafasha Afurika muri iyi ntego mu bumwe, ubwigenge no mu buryo bubyara umusaruro.

Inama ya FOCAC iba igizwe n’inama z’abaminisitiri, ziba buri myaka itatu, iya mbere ikaba yarabaye mu Ukwakira mu 2000 i Beijing naho iheruka yabereye i Johannesburg muri Afurika y’Epfo ku wa 2015.

Perezida Kagame na Jinping mu nama y'ubufatanye bwa Afurika n'u Bushinwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza