Perezida Kagame yashimangiye uruhare rw’abikorera mu iterambere rya Afurika n’u Bushinwa

Yanditswe na Ferdinand Maniraguha, Ishimwe Israel
Kuya 4 Nzeri 2018 saa 03:19
Yasuwe :
0 0

Perezida Paul Kagame yavuze ko uruhare rw’abikorera ari ingenzi kugira ngo umugabane wa Afurika n’u Bushinwa bigere ku ntego z’iterambere byihaye.

Yabitangaje kuri uyu wa Kabiri mu gusoza Inama y’Ihuriro ku bufatanye bwa Afurika n’u Bushinwa ‘FOCAC’, yatangiye ku wa Mbere, tariki ya 3 Nzeri 2018, i Beijing.

Iyi nama ifite insanganyamatsiko igira iti “Icyerekezo cy’Umuryango w’u Bushinwa na Afurika ukomeye kandi usangiye ahazaza.”

Perezida Kagame wari kumwe n’abandi bakuru b’ibihugu bya Afurika 53 na Perezida w’u Bushinwa Xi Jinping, yavuze ko iyi nama yabaye umwanya mwiza wo gushimangira ubucuti n’ubufatanye buzoroshya ishyirwa mu bikorwa by’imyanzuro yemejwe.

Muri iyi nama hemejwe inyandiko ebyiri zikubiyemo intego z’ubufatanye bwa Afurika n’u Bushinwa, zirimo iyiswe ‘Beijing Declaration’ na ‘Beijing Plan of Action’.

Perezida Kagame yavuze ko u Rwanda rushyigikiye imyanzuro yose yayifatiwemo.

Yagize ati “By’umwihariko Beijing Action Plan igamije guteza imbere imishinga y’iterambere isanzwe hagati y’u Bushinwa na Afurika. Iyi nama yaguye ubufatanye mu ngeri zizaduhuriza hamwe mu gushyira mu bikorwa intego zacu.”

Yavuze ko urwego rw’abikorera rufite uruhare rukomeye mu ishyirwa mu bikorwa ry’izo ntego.

Ati “Imishinga y’igihe kirekire iyobowe n’urwego rw’abikorera mu nzego z’ubukungu muri Afurika ni ingenzi. Intego zumvikana zatanzwe na Perezida Xi Jinping muri izi nzego zahawe ikaze kandi ni ibyo gushimwa”.

“Intego yacu ubu ikwiye kuba kubishyira mu bikorwa. Bizasaba ubwitange n’ubwitonzi bw’abayobozi bihoraho.”

Kagame yashimangiye ko u Rwanda ruzakomeza kugaragaza umuhate warwo mu gushyikira politiki y’amahoro n’umutekano n’ubufatanye bushingiye ku bwubahane.

Ati “Hashingiwe ku miterere ya politiki y’Isi muri iki gihe, ni iby’agaciro kongera gushimangira umuhate wacu mu guharanira amahoro, umutekano, koroshya ubuhahirane, ubwubahane n’ubufatanye byungukira buri wese.”

Yavuze ko ubufatanye bwagaragajwe muri iyi nama nibukomeza, nta mpungenge ko ibyemejwe bizashyirwa mu bikorwa. Ati “Nitugumana umwuka twavanye muri iyi nama ya Beijing, sinshidikanya ko tuzaba dufite byinshi twishimira nitwongera guhurira muri Afurika.”

Ubwo yatangizaga iyi nama, Perezida Xi Jinping, yagaragaje ibitekerezo bishya byo guteza imbere umubano wa Afurika n’u Bushinwa, anatangaza ingamba nshya z’ubufatanye.

Inyandiko ya Beijing Declaration ikubiyemo ibijyanye no guteza imbere urwego rw’inganda muri Afurika, umuco n’ubufatanye hagati y’abaturage.

Beijing Plan of Action yibanda ku bufatanye bwa Afurika n’u Bushinwa mu bijyanye n’ubuhinzi, iterambere ry’ibikorwa remezo, ingufu n’umutungo karemano, ubukungu bushingiye ku nyanja, ubumenyi n’ikoranabuhanga, ubukerarugendo, ubucuruzi, imari n’ibindi.

Perezida Kagame na Jinping w'u Bushinwa bagaragaje ko ubufatanye bw'impande zombi bukwiye kugirwamo uruhare n'abikorera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza