Perezida Kagame yasabye urubyiruko kwitandukanya n’ibitesha agaciro igihugu

Yanditswe na Kanamugire Emmanuel
Kuya 25 Nzeri 2016 saa 12:19
Yasuwe : XX
0

Perezida Kagame yasabye urubyiruko rw’u Rwanda kwirinda kujya mu bibatesha agaciro ubwabo n’igihugu muri rusange ahubwo rukamenya guhitamo ibyiza ruyobowe n’indangagaciro n’umuco Nyarwanda.

Umukuru w’Igihugu yabisabye urubyiruko kuri iki Cyumweru mu munsi w’ubudasa ‘Rwanda Cultural Day’ wabereye mu mujyi wa San Francisco muri Leta ya California imwe mu zigize Leta Zunze Ubumwe za Amerika.

Yashishikarije urubyiruko cyane cyane urwiga mu mahanga kuzirikana indangagaciro, umuco Nyarwanda, amateka n’agaciro kabo bityo bikabayobora mu byo bakora.

Yagize ati“Niba muri hano njya mbibwira n’abana banjye bwite bamwe bari hano n’abandi bana banjye muri rusange, mu Rwanda Abanyarwanda bose mbafata nk’abana banjye, icyo mbabwira mujye hariya hanze, mujye muri Leta Zunze Ubumwe za Amerika ni ahantu heza, ni igihugu cy’igihangange, hari byinshi mwakigirayo ariko mumenye ntimuzajye mu bitabahesha agaciro ubwanyu n’igihugu.”

Perezida Kagame yasabye urubyiruko kudateshuka ku ndangagaciro n’umuco Nyarwanda ngo batwarwe n’umuco w’amahanga utabahesha agaciro n’Igihugu muri rusange.

Yagize ati“Muzane ibibakwiriye kandi birahari byinshi ariko mukwiye kumenya guhitamo ibyiza muyobowe n’indangagaciro, umuco, sosiyete, igihugu cyacu gifite kandi ni nziza.”

Yongeyeho ko urubyiruko rukwiye kuzirikana ko nubwo ruri mu mahanga igihugu kiruhanze amaso nk’abayobozi b’ejo hazaza.

Perezida Kagame yasabye urubyiruko kudatatira indangagaciro ziranga umuco nyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza