Kwamamaza

Perezida Kagame yasabye ko abadindiza iterambere rya Afurika badakomeza kwihanganirwa

Yanditswe kuya 5-09-2016 saa 12:47' na Rabbi Malo Umucunguzi


Perezida Paul Kagame yavuze ko hakenewe kwihuta mu ishyirwa mu bikorwa rya gahunda zinyuranye, kuko Afurika ifite ubushobozi buhagije ariko hari abatumva ko igihe gihenda, byose bikadindiza urugendo rwo kubaka Afurika abayituye bashaka.

Umukuru w’igihugu yabigarutseho ubwo yatangizaga inama mpuzamahanga yiga ku ishoramari muri Afurika, TGAIS 2016, inama y’iminsi ibiri yitabirirwe n’abasaga 1000 bari mu nzego zirimo iza leta n’abikorera.

Inama ya TGAIS ibaye ku nshuro ya gatatu, ikaba ari ubwa mbere ibereye muri Afurika kuko ebyiri zabanje zaberaga i London mu Bwongereza.

Yagize ati “Iterambere mu nzego zinyuranye risaba guha agaciro igihe kandi ukagikoresha neza. Ntabwo dukeneye guhora twibutswa ko ishoramari, imiyoborere myiza no gushyira hamwe ari ingenzi mu iterambere. Turabizi, turabyemera, igisigaye ni ugukora igikwiye kugira ngo tugere ku byo twifuza.”

“Guseta ibirenge tubona mu ishyirwa mu bikorwa ry’imishinga itandukanye, ntabwo ari uko tudafite ubumenyi, ubushake cyangwa ubushobozi, ahubwo biva ku kwirengagiza ko kwihuta mu byo dukora ari wo musingi w’ubukungu.’’

Perezida Kagame yavuze ko kwihanganira ugutinda gushyira mu bikorwa ibintu mu buryo butarangira ari imwe mu mvano z’ubukene, avuga ko Afurika nitangira guha agaciro igihe kurusha uko n’abandi babikora, ikinyuranyo hagati ya Afurika n’ibindi bice by’Isi kizagabanuka.

Ati “Hashobora kubaho n’amande niba igihe cyagenwe kitubahirijwe ku nzego za leta. Uko umubare waba ungana kose, uzaba uri hasi cyane y’ikiguzi dutanga kubera kumva ko igihe kitishyurwa.’’

Hararebwa ku masezerano y’inyabutatu

Muri TGAIS 2016 haranareberwa hamwe uburyo bwo gucuruzanya hagati y’imiryango itatu y’Ubucuruzi, irimo uw’Afurika y’u Burasirazuba (EAC), Afurika yo Hagati n’Amajyepfo (COMESA) n’Umuryango w’Iterambere rya Afurika y’Amajyepfo (SADC).

Ni amasezerano yashyiriweho umukono i Cairo mu Misiri muri Kamena 2015, agamije gushyiraho igice cy’ubucuruzi busesuye guhera Cape Town muri Afurika y’Epfo kugeza i Cairo mu Misiri.

Ayo masezerano y’inyabutatu (The Tripartite Free Trade Area (TFTA), agamije koroshya urujya n’uruza rw’ibicuruzwa mu bihugu 26 bihuriye muri iyi miryango itatu, rikaba ari isoko ryagutse rigizwe na miliyoni zigera kuri 620 z’abaturage n’ibihugu byinshi bifite ubukungu buri kwihuta cyane.

Perezida Kagame yavuze uyu mushinga ushobotse byaba ari igikorwa gikomeye mu gucuruzanya muri uyu mugabane nk’uko byanasabwe n’Umuryango wa Afurika Yunze Ubumwe umwaka ushize.

Ati “Tugomba rero gukemura vuba imbogamizi zihari kugira ngo ubu bufatanye bw’inyabutatu bugerweho vuba bishoboka. Niba hari abatiteguye, abiteguye nibakore ariko bafungurire amarembo n’abandi bakomeze kuza.’’

“Afurika ntabwo ikwiye kuguma ifatwa nk’ahari ubushobozi ariko butabyazwa umusaruro. Guhora twigize inyuma ibyihutirwa mu byo dushaka gukora ni amakosa Afurika itakabaye igikora.’’

Umunyamabanga mukuru wa COMESA, Dr Sindiso Ngwenya, yavuze ko iyi nama ari amahirwe akomeye ku bikorera muri Afurika, avuga ko ari ah’abayitabiriye ngo baganire, ariko ari n’ah’abikorera ngo babyaze umusaruro amahirwe agenda ashyirwaho mu ishoramari.

Umuyobozi w’Ikigo cy’Igihugu cy’Iterambere, RDB, Francis Gatare, yavuze ko iyi nama ari umwanya ukomeye wo gushyira mu bikorwa amasezerano y’inyabutatu hagati ya EAC, COMESA na SADC.

Biteganyijwe ko ari umwanya ukomeye ngo ibihugu bigaragarize abikorera mu bihugu byose byitabiriye, ahashobora gushorwa imari mu nzego zirimo “ubuhinzi bugamije amasoko, ingufu, ibikorwa remezo, inganda no gutunganya ibintu binyuranye” nk’uko Gatare yakomeje abivuga.

Perezida Kagame yasabye ko iterambere rya Afurika ritakomeza kudindizwa
Perezida wa Uganda, Yoweri Kaguta Museveni yitabiriye iyi nama
Perezida Kagame n'abandi banyacyubahiro bitabiriye Inama ku ishoramari rya Afurika

Amafoto:Village Urugwiro


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved