Kwamamaza

Perezida Kagame yasabye ibihugu kuvugurura amasezerano azagabanya ubushyuhe ku Isi

Yanditswe kuya 23-09-2016 saa 13:44' na Rabbi Malo Umucunguzi


Perezida Paul Kagame yasabye ko ibihugu bitandukanye gushyigikira ivugururwa ry’amasezerano ya Montreal, mu nama ikomeye iteregerejwe mu Rwanda guhera ku wa 6 kugeza ku wa 14 Ukwakira 2016, ikazabera muri “Kigali Convention Centre”.

Iyi nama ya 28 ihuza ibihugu byashyize umukono ku masezerano ya Montreal izwi nka MOP28, nibemeza ivugururwa ry’Amasezerano ya Montreal bizatuma hihutishwa guhagarika ikoreshwa ry’imyuka yangiza ikirere izwi nka “hydrofluorocarbons” (HFCs) ikoreshwa mu byuma bikonjesha, ikangiza akayunguruzo kagabanya ubukana bw’imirasire y’izuba iza ku Isi, Ozone.

Ayo masezerano mpuzamahanga yemejwe kuwa 26 Kanama 1987 ariko atangira gukoreshwa muri Gicurasi 1989. Kuva icyo gihe amaze kuvugururwa inshuro umunani, iheruka ikaba ari mu nama yabereye Montreal mu 2007.

Aya mavugurura agenda akuraho gahoro gahoro ibintu bikoreshwa nyamara byangiza Ozone, ku buryo bitewe n’ibi bikorwa, umuhora wari waracitse muri aka kayunguruzo muri Antarctica ugenda usubirana, ndetse ibipimo bikaba bigaragaza ko nta gusubira inyuma kubayeho, hagati ya 2050 na 2070 kaba kameze nk’uko kahoze mu 1980.

Aya masezerano avugururwa hagamijwe kugenzura ikoreshwa ry’ibinyabutabire binyuranye, hakanakusanywa inkunga ifasha ibihugu bikiri mu nzira y’amajyambere kugendana n’imirongo iba yemejwe.

Mu nama y’Inteko Rusange y’Umuryango w’Abibumbye, Perezida Kagame yasabye ibihugu guhurira i Kigali bagashyigikira iyi gahunda ikomeye y’amavugurura.

Ati “Mu kwezi gutaha, abayobozi basaga 1000 bazahurira muri Kigali ngo bemeze ivururwa rikomeye ku masezerano ya Montreal, azakuraho ‘Hydrofluorocorbons’, nk’isoko ikomeye y’ikoreshwa ry’imyuka idahumanya ikirere.”

“Aya masezerano agiye kumara imyaka 30 ya Montreal, ni amwe mu masezereano mpuzamahanga yatanze umusaruro mu mateka, ubu akaba aduha amahirwe yo gutera indi ntambwe tugana imbere mu gushyira mu bikorwa amasezerano ya Paris amaze umwaka umwe.”

Minisitiri w’Umutunngo Kamere, Dr. Vincent Biruta, yavugiye i New York ko muri iyi nama y’i Kigali nihemezwa ivugurura ry’amasezerano, “bishobora kuzagabanya dogere 0.5 ku izamuka ry’ubushyuhe bw’Isi kugeza mu mpera z’iki kinyejana”.

Iri vugurura ry’amasezerano rigenze neza ryaba ari ikimenyetso cy’uko umuryango mpuzamahanga wiyemeje ku buryo bugaragara kuzagera ku ntego z’Amasezerano y’i Paris ajyanye no gukora ku buryo igipimo mpuzandengo cy’ubushyuhe bw’Isi kitarenga dogere 2 kandi umuhigo ukaba ko icyo gipimo cyagera kuri dogere 1.5.

Mu gushyigikira iyi gahunda, Umunyamabanga wa Leta Ushinzwe Ububanyi n’amahanga muri Leta Zunze Ubumwe za Amerika, John Kerry, yahise atangaza ko “amavugurura ya Kigali niyemezwa, abaterankunga bazatanga miliyoni $27 naho abagiraneza batange miliyoni $50” muri gahunda zo kurengera ikirere.

U Rwanda ruza mu bihugu bya mbere mu gushyira mu bikorwa Amasezerano ya Montreal, aho rwo rwahagaritse ikoreshwa ry’imyuka ya “chlorofluorocarbon” (CFCs) yangiza akayunguruzo k’imirasire y’izuba mu mwaka wa 2010, umwaka umwe mbere y’igihe ntarengwa cyari cyagenwe.

Mu 2012 rwahawe igihembo mu kubungabunga akayunguruzo k’imirasire y’izuba, rwahawe n’Ubunyamabanga Bukuru bw’Amasezerano ya Montreal, buherereye mu Kigo cy’Umuryango w’Abibumbye Gishinzwe Guteza imbere Ibungabungwa ry’Ibidukikije (UNEP).


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 September 2016
Copyright © 2009 -2014 - IGIHE Ltd - All Rights Reserved