Perezida Kagame yarahiriye kuyobora u Rwanda muri manda y’imyaka irindwi

Yanditswe na Philbert Girinema
Kuya 18 Kanama 2017 saa 12:07
Yasuwe :
1 7

Perezida Kagame yarahiriye kuyobora u Rwanda muri manda y’imyaka irindwi iri imbere, ifatwa nk’igihe kidasanzwe cyo gukomeza gusigasira ibyagezweho no kongera imbaduko mu iterambere ridaheza kuri buri wese.

Uyu muhango wabaye kuri uyu wa Gatanu, tariki ya 18 Kanama 2017, kuri Stade Amahoro i Remera ahahuriye abarenga ibihumbi 25 baturutse mu turere twose tw’igihugu.

Wanitabiriwe kandi n’abakuru b’ibihugu 17, aba guverinoma n’abandi bayobozi bakuru barenga 20 baturutse ku mugabane wa Afurika no mu zindi mpande zose z’isi baje gushyikira Perezida Kagame warahiriye kuyobora u Rwanda kugeza mu 2024.

Perezida w’Urukiko rw’Ikirenga, Prof Sam Rugege, niwe wakiriye indahiro ya Perezida Kagame.

Perezida Kagame yarahiye agaragiwe na Madamu Jeannette Kagame nyuma ashyikirizwa ibendera ry’Igihugu, ikirango cya Repubulika y’u Rwanda n’indirimbo yubahiriza igihugu.

Mu ijambo rye, Perezida Kagame yashimiye amashyaka yamutanzeho umukandida mu matora aheruka, anavuga no kuri babiri bari bahanganye mu matora aheruka.

Ati “Ndashaka gushimira abayobozi n’abanyamuryango b’amashyaka umunani yifatanyije na FPR mu kugena ko nyabera umukandida. Mu myaka 23 ishize, twakoranye bya hafi mu bwubahane hagamijwe gusana igihugu cyacu aribyo bitugejeje aho turi ubu. Ndanashimira kandi abandi bakandida babiri bagejeje ubutumwa bwabo ku baturage bacu. Twese hamwe, twaremye ubwisanzure aho nta jwi na rimwe ryabaruwe hagamijwe gupyinagaza uwo ariwe wese ahubwo yose yabaruwe hagamijwe kubaka u Rwanda.”

Yanabwiye abanyarwanda ko aha agaciro icyizere bamugiriye bongera kumutora aho yabishimangiye agira ati “Ndagira ngo mbashimire by’umwihariko, icyizere mwongeye kungirira. Ikiruta ariko, ni icyizere mwifitiye ubwanyu n’ikiri hagati yacu. Gukomeza kubakorera, ni ishema ryinshi kuri njye. “

Perezida Kagame yatorewe kuyobora u Rwanda muri manda y’imyaka irindwi mu itora ryo ku wa 3-4 Kanama n’amajwi 98,79 %; ahize umukandida wigenga Mpayimana Philippe wabonye 0.73% na Dr Frank Habineza watanzwe na Green Party wagize 0.48%.

Perezida Kagame arahirira kuyobora u Rwanda muri manda y'imyaka irindwi
Perezida Kagame ashyira umukono ku ndahiro yo kuyobora u Rwanda
Prof. Sam Rugege ashyikiriza Perezida Paul Kagame ikirangantego cy'igihugu
Umugaba Mukuru w’Ingabo z’u Rwanda, Gen Patrick Nyamvumba ashyikiriza Perezida Kagame ingabo yo kurinda igihugu
Perezida w’Urukiko rw’Ikirenga, Prof. Sam Rugege ashyikiriza Perezida Paul Kagame ibendera ry’igihugu
Perezida Kagame agaragiwe n'Umugaba Mukuru w'Ingabo, Gen Patrick Nyamvumba haririmbwa indirimbo yubahiriza igihugu
Abasaga ibihumbi 25 bitabiriye umuhango w'irahira rya Perezida Paul Kagame
Perezida Kagame yarahiriye kuyobora u Rwanda muri manda y’imyaka irindwi
Perezida Ali Bongo Ondimba wa Gabon mu bakuru b'ibihugu bitabiriye umuhango w’irahira rya Perezida Kagame
Professor Yemi Osinbajo, Perezida w'agateganyo wa Nigeria
Sassou Nguesso wa Congo Brazzaville asuhuzanya na Perezida wa Uganda, Yoweri Kaguta Museveni
Denis Sassou Nguesso, Perezida wa Congo
Idriss Déby, Perezida wa Tchad asuhuza abitabiriye umuhango wo kurahira kwa Perezida Kagame
Perezida wa Sudani, Omar al-Bashir asuhuzanya na mugenzi we wa Sudani y'Epfo, Salva Kiir
Perezida wa Senegal, Macky Sall
Perezida wa Sudani y'Epfo, Salva Kiir
Perezida wa Sudani, Omar al-Bashir yitabiriye ibirori by'irahira rya Perezida Kagame
Perezida wa Uganda, Yoweri Kaguta Museveni asuhuza abitabiriye ibirori by'irahira rya Perezida Kagame
Perezida wa Kenya, Uhuru Kenyatta
Perezida Kagame n’umuryango we basezera Perezida Uhuru Kenyatta n’umugore we Margaret Gakuo Kenyatta witabiriye umuhango w'irahira rye
Perezida Kagame asezera Margaret Gakuo Kenyatta
Perezida Kagame asezera Perezida Uhuru Kenyatta uheruka gutorerwa kuyobora Kenya na Margaret Gakuo Kenyatta asuhuza Madamu Jeannette Kagame

Amafoto: IGIHE, KT na Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza