Perezida Kagame yanyomoje abashinja u Rwanda guca Igifaransa

Yanditswe na Mukaneza M.Ange
Kuya 13 Ukwakira 2018 saa 04:51
Yasuwe :
0 0

Perezida Paul Kagame yatangaje ko abashinja u Rwanda guca Igifaransa bibeshya, kuko ari ururimi rukoreshwa kandi rwigishwa.

Ubwo yari mu kiganiro na TV5 Monde, Perezida Kagame yavuze ko mu Rwanda hakoreshwa cyane indimi eshatu arizo Ikinyarwanda, Icyongereza n’Igifaransa.

Ati “ Twebwe twagutse mu mitekerereze, n’ibikorwa tugiramo uruhare. Icyo twakoze twongeye Icyongereza ku Gifaransa, mu by’ukuri muri amwe mu mashuri mu Rwanda bigisha Igishinwa, bigisha Ikidage.”

Umukuru w’Igihugu yakomeje avuga ko u Rwanda ruri mu Muryango wa Afurika y’Uburasirazuba, aho ibihugu birimo hafi ya byose bivuga Icyongereza kandi Abanyarwanda bakorana nabo ubucuruzi butandukanye.

Ati “ Hafi 90% by’ubucuruzi, ishoramari n’ubushabitsi butandukanye tubikorana na biriya bihugu bivuga Icyongereza mu karere. Dushyize mu gaciro, n’iyihe mpamvu yatuma tudafata urwo rurimo, ariko bitabaye ngombwa ko tureka ibyo twari dufite?”

Perezida Kagame yavuze ko u Rwanda rutari rukeneye kureka Igifaransa ndetse rutigeze rubikora, ababivuga bose batari mu kuri.

Ati “Udushinja ibi aribeshya, nta kuri kurimo. Icyo nakubwira n’uko mu Rwanda dufite ururimi rumwe duhuriyeho arirwo i Kinyarwanda, hanyuma abaturage bacu biga, bakigisha , bakavuga Igifaransa n’Icyongereza.”

Ingingo ya munani y’Itegeko Nshinga ry’u Rwanda iteganya ko ‘Ururimi rw’Igihugu ni Ikinyarwanda. Indimi zemewe mu butegetsi ni Ikinyarwanda, Icyongereza n’Igifaransa. Itegeko Ngenga rishobora kongera cyangwa kugabanya indimi zemewe mu butegetsi’.

Ku itariki ya 11 Ukwakira 2018, nibwo Umunyarwandakazi Louise Mushikiwabo wari usanzwe ari Minisitiri w’Ububanyi n’Amahanga w’u Rwanda, yatorewe kuba Umunyabanga Mukuru w’Umuryango w’Ibihugu bikoresha Igifaransa, OIF.

Mu gihe cy’imyaka ine Mushikiwabo azayobora OIF, azaba afite inshingano zitandukanye zirimo no guteza imbere ururimi rw’Igifaransa.

Mu kiganiro Perezida Kagame yagiranye na TV5 yasobanuye ko u Rwanda rutaciye Igifaransa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza