Kwamamaza

Perezida Kagame yanengeye mu ruhame abaminisitiri bose

Yanditswe kuya 12-09-2016 saa 07:25' na Philbert Hagengimana


Perezida Kagame yanengeye mu ruhame abaminisitiri bagize Guverinoma y’u Rwanda, nyuma yo kugaragaza bimwe na bimwe mu byo bumvikana bigahera mu nyandiko gusa ntibabishyire mu bikorwa uko bikwiye.

Ibi yabigarutseho nyuma yo kwakira ikibazo cy’umwe mu Ntore z’icyiciro cya gatatu cy’Intagamburuzwa, itorero ry’abanyeshuri bahagarariye abandi mu mashuri makuru na Kaminuza mu Rwanda.

Mukeshimana Esperance, uhagarariye abafite ubumuga muri Kaminuza y’u Rwanda, ishami ry’Ubuvuzi n’Ubumenyamuntu, (UR-CMHS) yagaragaje ikibazo cy’imyubakire y’imiturirwa itaborohereza, aho yatanze urugero rw’uko badashobora kugera mu nyubako abiga mu ishami rya “Biomedical Laboratories Services” bashyirira mu ngiro (Pratique) ibyo bize.

Nyuma yo gusobanuza neza niba koko nta nzira yagenewe abafite ubumuga bagendera mu igare cyangwa bafite imbago, ndetse niba nta n’icyuma kizamura abantu (ascenseur) birimo, Perezida Kagame yahise agaragaza ko abubatse iyo nyubako birengagije ibintu bibiri.

Ati “Ababyubatse banyuranyije n’ibikwiriye kuba bikorwa, hashize imyaka myinshi…, si ubwa mbere, si ubwa kabiri, hashize imyaka myinshi, ni bya bindi by’abantu batubahiriza ibintu.”

Yakomeje agira ati “Twavuze ko inyubako zose zigomba kumenya ko hari ibintu bigomba kubahirizwa ku buryo bitazajya bigora abantu bafite ubumuga bakabona aho banyura. Icya kabiri batubahirije n’ubu abantu bakirwana na byo, buri nyubako yose igomba gushyirwamo imiyoboro ya Internet nk’uko hashyirwamo iy’amazi n’iy’amashanyarazi.”

Aha ni ho yahereye anenga abaminisitiri, ati “Kandi ni ibintu bimaze imyaka myinshi, Minisitiri ari hano, arabizi ko bidakorwa neza ku buryo buhagije.”

Perezida Kagame yabwiye uru rubyiruko ko mu gihe ruzayobora za Minisiteri, rwazirinda gukora amakosa akorwa n’abaziyobora muri iki gihe.

Ati “Umunsi mwabaye ba Minisitiri mwebwe rubyiruko ntimuzabe nk’abo dufite ubu. Muzibuke kujya mukurikirana ibiba bikwiye kuba bikorwa. Murumva? Muzabarushe,…”

Mu gukemura icyo kibazo yari agejejweho n’uwo munyeshuri, Perezida Kagame yahise aha umukoro Minisitiri ushinzwe imirimo y’inama y’Abaminisitiri, Stella Ford Mugabo, gukorana n’abashinzwe ibikorwa remezo ndetse n’abubatse iyo nyubako bagakosora aho bishoboka.

Perezida Kagame anenze Guverinoma mu ruhame nyuma y’aho ayinengeye mu mwiherero wa 13 w’abayobozi bakuru b’igihugu wabaye muri Werurwe 2016, aho yanagarutse ku bakozi ba leta agatanga n’ingero za bamwe mu bayobozi ku rwego rwa Minisitiri bahora mu butumwa bw’akazi hanze y’igihugu.

Mu ijambo rye icyo gihe yagize ati “Njya mbaza Minisitiri w’Imari, nti ndebera amafaranga agenda muri za misiyo uko angana. Ntagira uko ngana.”

Yakomeje agira ati “ Niba ari ukuvuga ngo ni za misiyo za ba minisitiri, za bande, bagiye kugenda, tuvuge ngo agiye kuri iyi misiyo kandi ifitiye igihugu akamaro runaka. Tujye tubishyira mu bisobanuro na mbere y’uko uruhushya rwo kugenda ruboneka. Bijyaho… nkabona abasaba kugenda, nkareba mu bintu byose batanze ya mpamvu irabuze. N’iyo ayishyizeho aravuga gusa ngo ni ibintu byihutirwa bifitiye igihugu akamaro gusa, akarekera aho. Nkavuga nti ariko bivuge. Urabitsinda se, ni ibiki bidufitiye akamaro utavuga ngo tubyumve? ”

N’ubwo hari byinshi byagezweho ndetse u Rwanda rukaba ruvugwa imyato mu ruhando rw’amahanga mu iterambere nyuma y’imyaka 22 ruvuye mu icuraburindi, Perezida Kagame ntahwema gukebura abayobozi batubahiriza inshingano zabo, igihe kiba cyagenwe mu ishyirwa mu bikorwa ry’imishinga, abadakorera hamwe ndetse n’ibindi.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved