Perezida Kagame yakomoje ku mibereho ya mwarimu na muganga

Yanditswe na
Kuya 10 Nzeri 2016 saa 05:18
Yasuwe : XX
0

Perezida wa Repubulika, Paul Kagame, yasabye inzego bireba kwiga uko imibereho y’abarimu, abaganga n’abandi bakozi ba Leta yamera neza bityo nabo bakabasha guhindura ubuzima bw’abo bayobora cyangwa bakorera.

Yabigarutseho mu muhango wo kwesa imihigo ya 2015/2016 no gusinya iya 2016/2017, wabaye kuwa Gatanu tariki 9 Nzeli 2016 mu nyubako Kigali Convention Center.

Perezida Kagame yatanze urugero ku mibereho ya mwarimu na muganga, abaza niba bahabwa ibisabwa byose kugira ngo na bo bahindure ubuzima bw’Abanyarwanda.

Yagize ati “Abarimu bigisha abana bacu bameze bate, twabongerera ubuzima bwabo bukamera neza, imishahara, ibikoresho gute? Icyo ni ikibazo gifite ireme, gifite ishingiro, icyo turakibaza?”

Perezida Kagame yakomeje agira ati“Abaganga barema ubuzima bw’abantu bacu, ibikoresho, bo ubwabo bimeze bite, ariko iteka iyo duhora twibaza ibyo ngibyo, turabyibaza kugira ngo noneho tuvuge ngo aba barakora bate kugira ngo bahindure ubuzima bw’Abanyarwanda, rubanda.”

Umukuru w’Igihugu yavuze ko gusaba abakozi ba Leta kugera ku ntego zabo bigomba kugendana no kuzirikana ku mibereho y’abo bakozi na yo igatera imbere nk’uko Abanyarwanda batera imbere.

Yagize ati “Ntabwo ushobora kureba ubuzima bw’abarimu, ubw’abaganga, ubw’abakora mu zindi nzego za Leta n’abandi ngo ubitandukanye n’ubuzima bw’Abanyarwanda uko buzamuka, uko burushaho gutera imbere.”

Imibereho y’abarimu n’abaganga ikunda kugarukwaho cyane ahanini binubira ko umushahara bahabwa utajyanye n’igihe u Rwanda rugezemo.

Mu rwego rw’ubuzima, iki kibazo cy’imishahara gikomeje gutuma inzobere zisezera mu bitaro bya Leta zikajya gukora mu byigenga cyangwa bagashinga ayabo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE