Kwamamaza

Perezida Kagame yakiriye umwana yari amaze imyaka ibiri yemereye ubutumire

Yanditswe kuya 10-09-2016 saa 13:31' na Philbert Hagengimana


Nyuma y’imyaka ibiri amwemereye kumutumira mu Rwanda, Perezida Kagame yakabirije inzozi Wendy Waeni, Umwana w’Umunyakenyakazi ufite impano idasanzwe mu mikino ngororamubiri.

Hari kuwa 12 Ukuboza 2014, ubwo Wendy Waeni yarimo asusurutsa abitabiriye ibirori by’umunsi w’Ubwigenge bwa Kenya “Jamhuri Day”, byahereye muri Nyayo Stadium bigakomereza mu Ngoro y’Umukuru w’Igihugu.

Aha ni ho Uwo mwana w’umukobwa yabashije kuganira na Perezida Uhuru Kenyatta wari kumwe na Madamu we, ndetse n’abandi bakuru b’ibihugu barimo na Perezida Kagame.

Ubwo yari amaze kuganira na bo, Ikinyamakuru Tuko.co.ke cyabajije Wendy Waeni ijambo rikomeye Perezida Uhuru Kenyatta yamubwiye, asubiza mu bwenge, avuga ko ari ibanga rikomeye hagati yabo.

Icyakora yavuze ko kimwe mu byo ahakuye, ari uko Perezida Kagame yamwemereye kuzamutumira i Kigali.

Uwo mwana w’umukobwa yakomeje kubizirikana, ndetse kuwa 8 Kanama 2016, abicishije ku rubuga nkoranyambaga rwe rwa Twitter, yibutsa Perezida Kagame agira ati “Ndacyategereje ubutumire bwanjye mu Rwanda nk’uko mwabinsezeranyije Nyakubahwa.”

Perezida Kagame yahise asubiza amwizeza kumugezaho ubutumire mu gihe cya vuba, ati “Ndimo kubitunganya, ubutumire buzoherezwa vuba. Wagize neza gukomeza kubikurikirana.”

Ubwo yiteguraga guhaguruka yerekeza i Kigali, mu ijoro ry’itariki ya 8 Nzeri 2016, Wendy Waeni yagize ati "Nari ntegereje uyu munsi mu gihe cy’imyaka ibiri, none birashyize birabaye, ntangiye uruzinduko rwo gusura u Rwanda uyu munsi, ngo nakirwe na Perezida Paul Kagame.”

Kuwa 9 Nzeri 2016, ni bwo uwo mwana w’umukobwa wamaze kuba icyamamare, yakiriwe n’Umukuru w’igihugu cy’u Rwanda, Paul Kagame, gusa nta cyatangajwe mu byo baganiriye.

Nk’uko bigaragara ku mbuga nkoranyambaga, Wendy Waeni yishimiye bikomeye uburyo yafashwe neza mu ndege yari yishyuriwe na Perezida Kagame, ndetse n’uburyo yakiriwe i Kigali.

Wendy Waeni ni muntu ki?

Uhereye ku mbwirwaruhame ze cyangwa uburyo aganira kuri televiziyo zikomeye, ntanyuranye n’ibibazo mu biganiro n’abanyamakuru bakomeye bo muri Kenya nka Larry Madowo na Jeff Koinange, byerekana ko ari umuhanga haba mu byo akora cyangwa mu ishuri.

Wendy Waeni yatangiye imikino ngororamubiri afite imyaka ine gusa, ndetse yabashije kwiyereka imbere y’abakuru b’ibihugu banyuranye muri Afurika, ikintu cyamushimishije mu buzima bwe nk’uko abigaragaza haba ku mbuga ze nkoranyambaga, Facebook, Twitter cyangwa Instagram.

Abandi bakomeye Wendy yahuye na bo, twavuga Perezida Uhuru Kenyatta wa Kenya, Perezida John Mahama wa Ghana, Perezida Museveni wa Uganda, Jacob Zuma wa Afurika y’Epfo na David Cameron wari Minisitiri w’Intebe w’u Bwongereza uheruka kwegura.

Uretse inzozi yakabirije muri Afurika, uyu mukobwa yazengurutse Aziya n’u Burayi yerekana impano ye, ahagararira Kenya mu imurika mpuzamahanga ry’impano, World Talent Expo, mu bihugu nka Taiwan n’u Bushinwa.

Mu kiganiro kigaragara ku rubuga salmaibra.co.ke, cyo kuwa 22 Nyakanga 2015, Wendy Waeni abazwa ibintu bitangaje yaba amaze guhura nabyo mu rugendo rwe nk’umukobwa ukora imikino ngororamubiri.

Ati “Gutumirwa mu ngoro y’Umukuru w’Igihugu na Nyakubahwa Perezida Uhuru Kenyatta kuri Jamhuri Day. Kugaragaza impano yanjye mu mamurika mpuzamahanga y’impano muri Taiwan n’u Bushinwa. Guhabwa ubutumire na Perezida Paul Kagame, ubundi bwa John Mahama wa Ghana na Minisitiri w’Intebe w’u Bwongereza, David Cameron.”

Uyu mwana w’umukobwa avuga ko akunda gukoresha impano ye, akagira inzozi zo kuzaba umupilote w’indege, agasaba guverinoma za Afurika guteza imbere abafite impano nk’iye, nk’umurimo ushobora gufasha benshi mu bakiri bato.

Indi nkuru mwasoma:Wendy Waeni, umukobwa utangaje wasezeranyijwe gutumirwa na Perezida Kagame

Perezida Kagame yakiriye Wendy Waeni wari ufite inzozi zo kuganira na we
Wendy yahaye Perezida Kagame impano

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved