00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yakiriye Umujyanama wihariye ushinzwe kurwanya Jenoside muri Loni

Yanditswe na Akayezu Jean de Dieu
Kuya 2 Nzeri 2021 saa 06:17
Yasuwe :
0 0

Perezida Paul Kagame yakiriye mu biro bye, Umujyanama wihariye mu Ishami ry’Umuryango w’Abibumbye Rishinzwe Kurwanya Jenoside, Ibyaha by’Intambara n’Ibyibasiye Inyokomuntu [UNOSAPG], Alice Wairimu Nderitu, uri mu ruzinduko rw’iminsi itandatu mu Rwanda.

Alice Wairimu Nderitu n’itsinda ayoboye batangiye uruzinduko rw’akazi i Kigali ku wa 28 Kanama, bikaba biteganyijwe ko bazarurangiza tariki 3 Nzeri 2021.

Ibiro by’Umukuru w’Igihugu, Village Urugwiro, byatangaje ko Wairimu Nderitu yakiriwe na Perezida Kagame kuri uyu wa Kane, aho bagiranye ibiganiro n’ubwo hatatangajwe ingingo impande zombi zaganiriyeho.

Abandi bayobozi bari bitabiriye ibiganiro bya Perezida Kagame na Wairimu Nderitu barimo Umuhuzabikorwa w’Umuryango w’Abibumbye mu Rwanda, Fodé Ndiaye; Minisitiri w’Ububanyi n’Amahanga n’Ubutwererane, Dr Biruta Vincent ndetse na Dr Bizimana Jean Damascène uherutse kugirwa Minisitiri w’Ubumwe bw’Abanyarwanda n’Inshingano Mboneragihugu.

Mu ruzinduko rwe, Wairimu Nderitu yagiranye ibiganiro n’abayobozi muri Guverinoma barimo Minisitiri Dr Biruta Vincent na bamwe mu bahagarariye imiryango irengera inyungu z’abarokotse Jenoside yakorewe Abatutsi.

Alice Wairimu Nderitu yasuye Urwibutso rwa Jenoside rwa Rebero rushyinguyemo abanyapolitiki bishwe muri Jenoside yakorewe Abatutsi, bamwe bazira ko ari Abatutsi, abandi bazira ko barwanyaga ubuyobozi bubi bwari mu gihugu.

Mu butumwa yatanze kuri urwo rwibutso yavuze ko kunamira abazize Jenoside yakorewe Abatutsi bidahagije ahubwo igikomeye ari uguharanira ko nta handi ku Isi hazongera kuba Jenoside.

Ati “Icyubahiro gikomeye dushobora guha izi nzirakarengane zazize Jenoside yakorewe Abatutsi ni ukwemera amahano n’ibihe by’imiborogo, kongera gushimangira icyemezo cyacu cyo guharanira kubaka icyizere kugira ngo ntihazagire ahandi hongera kuba Jenoside igamije kurimbura ikiremwamuntu ku Isi.”

Jenoside yakorewe Abatutsi yabaye nyuma y’imyaka 45 Loni yanzuye ko nta Jenoside izongera ukundi

Jenoside yakorewe Abatutsi mu Rwanda mu 1994 yabaye hashize imyaka 45, Umuryango w’Abibumbye utoye umwanzuro wa 260 wateganyaga ko nta yindi Jenoside ikwiye kongera kubaho ku Isi.

Loni kandi yavugaga ko Jenoside ikwiye gufatwa nk’icyaha ndengakamere, n’abayigizemo uruhare bose bakabiryozwa mu buryo bw’intangarugero.

Ubwo Jenoside yakorewe Abatutsi yategurwaga mu buryo bugaragarira amaso ndetse n’urugamba rwa FPR rwo kubohora igihugu rurimbanyije, mu gihe Leta ya Perezida Juvénal Habyarimana yari yananiwe kubahiriza amasezerano ya Arusha, Loni yafashe icyemezo cyo kohereza Umutwe w’Ingabo zayo mu Rwanda, UNAMIR.

Izo ngabo zahageze habura amezi atandatu kugira ngo Jenoside yakorewe Abatutsi itangire gushyirwa mu bikorwa, ziza ari 2.548.

Kwemera inyito ikwiye ya Jenoside yakorewe Abatutsi byasabye imyaka 24

Ku wa 29 Mata 1994, habaye inama ya Loni yari igamije kurebera hamwe izina rikwiye guhabwa ibikorwa byarimo kubera mu Rwanda, bishingiye ku makuru yari ahari icyo gihe.

Muri iyo nama, ni bwo bwa mbere hagaragaye abantu bahakana Jenoside yakorewe Abatutsi, ndetse nyuma y’imyaka 27, hari ibihugu byanze kwemera inyito yayo kandi iryo hakana ari bumwe mu buryo bwo kuyitiza umurindi.

Icyo gihe Loni yavugaga ko ari Jenoside yabaye mu Rwanda ndetse bagatsimbarara ku kuba yarahitanye abantu 800.000 aho kuba abarenga miliyoni imwe nk’uko byagaragajwe n’ibarura ndetse n’ubushakashatsi bwakozwe n’inzego zitandukanye.

Gusa ariko cyera kabaye, ku wa 26 Mutarama 2018, ni bwo Inama rusange ya Loni yafashe icyemezo cy’uko tariki 7 Mata itazongera kwitwa “Umunsi mpuzamahanga wahariwe kwibuka Jenoside yo mu Rwanda yabaye 1994 ”, ahubwo uzajya witwa “Umunsi mpuzamahanga wahariwe kwibuka Jenoside yakorewe Abatutsi mu Rwanda mu 1994.”

Kugeza uyu munsi kandi hari ibihugu bikomeje kwinangira byanze gukoresha inyito ikwiye y’amahano yabereye mu Rwanda ngo byerure bivuge ko ari Jenoside yakorewe Abatutsi.

Perezida Kagame ubwo yatangizaga ibikorwa byo kwibuka ku nshuro ya 27 Jenoside yakorewe Abatutsi, yavuze ko nubwo hafashwe ibyemezo ku rwego rwa Loni, hari ibihugu byakomeje gutsimbarara bidashaka kwemera ko ari Jenoside yakorewe Abatutsi.

Icyo gihe yagize ati “Bimeze nk’aho kwemera iyo nyito ikwiye ari impano yaba ihawe Abanyarwanda kuko bitwaye neza. Ku bwabo, witwara mu buryo bashaka ko witwara, bakazaguha impano yo kwemera ikintu uko gikwiye kuba kiri. Biteye isoni.”

Abashakashatsi n’abahanga mu by’amateka bagaragaza ko gukoresha inyito itagaragaza byuzuye ubukana bw’ubwicanyi bwakozwe mu Rwanda, ngo berekane ko hateguwe umugambi mubisha wo kurimbura ubwoko bw’Abatutsi ndetse ugashyirwa mu bikorwa, ni ugutiza umurindi Jenoside.

Perezida Kagame yagiranye ibiganiro byihariye n'Umujyanama wihariye mu Ishami rya Loni rishinzwe Kurwanya Jenoside, Ibyaha by’Intambara n’Ibyibasiye Inyokomuntu [UNOSAPG], Alice Wairimu Nderitu
Perezida Kagame yakiriye mu biro bye Alice Wairimu Nderitu ushinzwe kurwanya Jenoside muri Loni
Perezida Kagame yakiriye Wairimu Nderitu wari uherekejwe n'abayobozi barimo Minisitiri w’Ububanyi n’Amahanga n’Ubutwererane, Dr Biruta Vincent (ibumoso); Umuhuzabikorwa w’Umuryango w’Abibumbye mu Rwanda, Fodé Ndiaye na Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène
Aherekejwe n'Umuyobozi w'Amashami y'Umuryango w'Abibumbye mu Rwanda, Fodé Ndiaye, Wairimu Nderitu yagiranye ibiganiro na Dr Bideri Diogène uhagarariye CNLG
Ku wa 1 Nzeri 2021, Alice Wairimu Nderitu yunamiye inzirakarengane ziruhukiye mu Rwibutso rwa Jenoside rwa Rebero
Alice Wairimu Nderitu yavuze ko kwibuka no guha icyubahiro abazize Jenoside yakorewe Abatutsi kwa nyako ari uguharanira ko ayo mahano atazongera kuba ukundi ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .