Perezida Kagame yakiriye Minisitiri w’Ubuzima wa Leta Zunze Ubumwe za Amerika

Yanditswe na Evariste Nsengimana
Kuya 15 Nzeri 2019 saa 04:04
Yasuwe :
0 0

Perezida Paul Kagame yakiriye Minisitiri w’Ubuzima wa Leta Zunze Ubumwe za Amerika, Alex Azar, baganira ku bikorwa bitandukanye by’ubuzima birimo ingamba zashyizweho mu kurwanya icyorezo cya Ebola, gikomeje kwibasira Uburasirazuba bwa Repubulika ya Demokarasi ya Congo (RDC).

Minisitiri Azar yageze mu Rwanda avuye muri RDC, aho kuri uyu wa Gatandatu hamwe n’Umuyobozi Mukuru w’Ishami ry’Umuryango w’Abibumbye ryita ku Buzima (OMS) Dr. Tedros Adhanom Ghebreyesus; Dr. Robert Redfield uyobora Ikigo cya Amerika gishinzwe kurwanya no kwirinda indwara (CDC) n’abandi, bakurikiranye ishyirwa mu bikorwa ry’ingamba zigamije gusuzuma no gukumira Ebola, basura ikigo kivurirwamo abayanduye kiri i Butembo ndetse baganira n’abaturage.

Mu biganiro itsinda ry’abantu 29 Azar ayoboye ryagiranye n’abahagarariye Minisiteri y’Ubuzima mu Rwanda kuri iki Cyumweru, hibanzwe kuri gahunda zo gukumira Ebola n’intambwe urwego rw’ubuzima mu Rwanda rumaze gutera.

Ati “Uruzinduko rwacu ruribanda cyane ku cyorezo cya Ebola hagati y’imipaka na Repubulika Iharanira Demokarasi ya Congo. Nshaka kugaruka by’umwihariko ku buryo twishimiye ubushake bw’u Rwanda mu gukumira ikwirakwira ry’icyo cyorezo, rwashyizeho ingamba zikarishye mu gihe abantu barenga ibihumbi 90 bambuka umupaka warwo na RDC buri munsi.”

Minisitiri Azar yavuze ko abo bantu ari umubare munini ku buryo hatagize igikorwa, kugenzura ko nta we ufite Ebola ugera mu Rwanda byaba ikibazo, anashimangira ko Amerika izakomeza gufatanya n’u Rwanda mu gukumira icyo cyorezo.

Kuva Ebola yongeye kugaragara muri RDC, u Rwanda rwashyizeho ingamba zo gukumira ko icyo cyorezo cyagera ku butaka bwarwo. Zirimo gusuzuma umuriro abantu bose binjiye mu gihugu, aho imibare yatangajwe mu ntangiriro za Nzeri yagaragaje ko abantu miliyoni 29.3 bari bamaze gusuzumwa Ebola, barimo 34 619 basuzumiwe ku bigo byagenewe gutanga ubufasha kuri Ebola.

Hari kandi gukingira abakora imirimo ifitanye isano n’ubuzima barimo abaganga, abaforomo, abakozi b’ibitaro, abajyanama b’ubuzima, abakorerabushake n’abahuguriwe gushyingura abishwe na Ebola barenga 3000 ndetse abarenga ibihumbi 23 bo mu turere 15 bahuguwe ku gufasha uwagaragaweho na Ebola.

Minisiteri y’ubuzima kandi yakoze umwitozo ugamije gukumira, guhangana no gutanga ubufasha ku murwayi wa Ebola ku bitaro bitandukanye hirya no hino mu gihugu, igira inama abaturage yo kudakorera ingendo aho bashobora kugira ibyago byo guhura na yo n’ibindi.

Minisitiri w’Ubuzima, Dr Diane Gashumba, yavuze ko u Rwanda rwishimiye kwakira aba bayobozi, ashimangira ko gukumira Ebola bikubiye muri gahunda ikomatanyije Leta yashyizeho zigamije gukumira icyahungabanya ubuzima bw’abaturage.

Ati “Uyu munsi dushobora gupima Ebola n’ibindi byorezo ariko nanone twitegura dutanga n’inkingo nk’uko twabikoze. Icya mbere ni ugukumira ariko bikozwe muri gahunda ikomatanyije.”

Alex Azar yavuze ko u Rwanda rukomeje kugaragaza ubudasa by’umwihariko mu kwesa intego z’iterambere cyane cyane mu rwego rw’ubuzima.

Ati “Nanashima u Rwanda ku ishyirwa mu bikorwa gahunda z’ubuzima rusange. Minisiteri y’ubuzima yarufashije mu gutera intambwe idatsikira mu kwesa intego z’iterambere. U Rwanda rwesheje inkingi ya kane n’iya gatanu z’intego z’ikinyagihumbi (MDGs) zijyanye no kugabanya umubare w’abana bapfa bari munsi y’imyaka itanu n’abagore bapfa babyara.”

Igenzura ryakozwe ku rwego rw’Ubuzima bw’abaturage mu Rwanda mu 2015 (DHS) rigaragaza ko ababyeyi bapfa babyara bagabanutse bakava kuri 476/ 100 000 mu 2010 bakagera kuri 210/ 100 000 mu 2015; ababyeyi babyarira kwa muganga bava kuri 69% bagera kuri 91%. Impfu z’abana bari munsi y’imyaka itanu zaragabanutse ziva kuri 76/1000 mu 2010 zigera kuri 50/1000 muri 2015.

Uyu muyobozi yanagarutse ku ntambwe u Rwanda rwateye mu kugabanya umubare w’abandura indwara zirimo Sida na Malaria.

DHS 2015 igaragaza ko mu myaka icumi ishize ubwandu bushya bwa virusi itera Sida buri ku gipimo cya 3%.

Minisiteri y’Ubuzima igaragaza ko hagati ya 2016 na 2017, abarwaye malaria bagabanutseho ibihumbi 430 naho hagati ya 2017 na 2018 bagabanukaho ibihumbi 700, abarwaye malaria y’igikatu bavuye ku bihumbi 17 mu 2016 bagera ku bihumbi birindwi mu 2018 naho abo yahitanye bavuye kuri 700 mu 2016 bagera kuri 300 mu 2018.

Nyuma y’uruzinduko mu Rwanda, Minisitiri Azar arakomereza muri Uganda. Kugeza ubu RDC niyo yibasiwe cyane na Ebola mu karere, aho imaze guhitana abagera ku 2000.

Perezida Kagame yakiriye Minisitiri Alex Azar muri Village Urugwiro kuri iki Cyumweru
Perezida Kagame aramukanya na Minisitiri Alex Azar mbere y'ibiganiro byahuje impande zombi
Perezida Kagame na Minisitiri Alex Azar mu ifoto y'urwibutso hamwe n'abayobozi ku mpande zombi

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza