Kwamamaza

Perezida Kagame yakiriye itsinda ry’intiti zizamufasha kuvugurura Komisiyo ya AU (Amafoto)

Yanditswe kuya 31-10-2016 saa 19:39' na Cyprien Niyomwungeri


Perezida Kagame yahuye bwa mbere n’itsinda ry’intiti icyenda zizamufasha kuvugurura Komisiyo y’umuryango wa Afurika yunze ubumwe, AU, kuri uyu wa Mbere tariki 31 Ukwakira 2016.

Ibiganiro by’uyu munsi byanitabiriwe na Minisitiri w’Ububanyi n’Amahanga w’u Rwanda, Louise Mushikiwabo n’Umuyobozi wa Komisiyo y’Umuryango wa Afurika Yunze Ubumwe (AU), Dr. Nkosazana Dlamini Zuma.

Umwe mu bagize iryo tsinda, Tito Mboweni wahoze ari Guverineri Mukuru wa Banki Nkuru ya Afurika y’Epfo, yanditse ku rukuta rwe rwa Twitter ko ari i Kigali mu Rwanda aho yitabiriye ibiganiro by’itsinda rizafasha Perezida Kagame kuvugurura Komisiyo ya AU.

Ati “Perezida Kagame azamara umunsi wose aganira n’itsinda ryacu ry’intiti ku mavugurura ya AU. Ni ikintu gikomeye kuri Afurika.”

Izo ntiti zahuye na Perezida Kagame zirimo izazobereye mu bukungu, politiki, ubucuruzi ku mugabane wa Afurika zituruka mu nzego za Leta n’iz’abikorera.

Abahuye na Perezida Kagame ni Dr. Donald Kaberuka wahoze ayobora Banki Nyafurika Itsura Amajyambere, Acha Leke, Umuhanga mu bukungu, Rwiyemezamirimo w’Umuherwe akaba n’Umugiraneza w’Umunya-Zimbabwe Strive Masiyiwa, Umunya-Guinée-Bissau, Dr.Carlos Lopes wari Umunyamabanga Mukuru Wungirije w’Umuryango w’Abibumbye akaba n’Umunyamabanga Nshingwabikorwa wa Komisiyo y’Ubukungu ya Afurika.

Harimo kandi Cristina Duarte, wahoze ari Minisitiri ushinzwe Imari n’Igenamigambi muri Cap Vert, Mariam Mahamat Nour, Minisitiri ushinzwe Ubukungu, Igenamigambi ndetse n’Ubutwererane Mpuzamahanga muri Tchad.

Aba biyongeraho Vera Songwe, Umuyobozi Mukuru w’Ishami rya Banki y’Isi rishinzwe ubukungu muri Afurika y’Iburengerazuba n’iyo hagati , Amina J. Mohammed wabaye Umujyanama udasanzwe w’Umunyamabanga Mukuru wa Loni ku bijyanye n’intego z’ikinyagihumbi na Tito Mboweni, wahoze ari Guverineri Mukuru wa Banki Nkuru ya Afurika y’Epfo.

Inama ya 27 y’Umuryango wa Afurika Yunze Ubumwe, AU, yabereye mu Rwanda kuva kuwa 10 kugera ku ya 18 Nyakanga 2016, yahaye Perezida Kagame inshingano zo gutegura impinduka muri Komisiyo y’Umuryango wa Afurika Yunze Ubumwe, AU, ibizagerwaho bikazashyikirizwa inama y’abakuru b’ibihugu izaba muri Mutarama 2017.

Perezida Kagame n'Umuyobozi wa Komisiyo ya AU, Dr Nkosazana Dlamini Zuma
Minisitiri w'Ububanyi n'Amahanga w'u Rwanda, Louise Mushikiwabo na we yari yitabiriye ibi biganiro
Perezida Kagame mu biganiro n'itsinda ry'intiti rimufasha gukora amavugurura muri Komisiyo ya AU
Perezida Kagame n'itsinda rimufasha kuvugurura Komisiyo ya AU

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved