00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yakiriye intumwa za mugenzi we wa Mozambique

Yanditswe na Iradukunda Serge
Kuya 7 Ukwakira 2021 saa 06:33
Yasuwe :
0 0

Perezida w’u Rwanda, Paul Kagame yakiriye mu biro bye, intumwa zaturutse muri Mozambique ziyobowe na Minisitiri w’Ubucuruzi n’Inganda w’iki gihugu, Carlos Mesquita wari unamufitiye ubutumwa bwa Perezida Filipe Nyusi.

Amakuru dukesha Twitter y’Ibiro by’Umukuru w’Igihugu ivuga ko Perezida Kagame yakiriye aba bashyitsi ku mugoroba wo kuri uyu wa Kane tariki ya 7 Ukwakira 2021.

Yakomeje ivuga ko ibiganiro byabahuje byibanze ku butwererane n’ubufatanye hagati y’ibihugu byombi.

Perezida Kagame yakiriye izi ntumwa za Mozambique mu gihe hashize umunsi umwe u Rwanda rusinyanye amasezerano y’ubufatanye n’iki gihugu mu nzego zitandukanye.

Ku wa 6 Ukwakira 2021 ni bwo Leta y’u Rwanda yatangaje ko yo n’iya Mozambique zashyize umukono ku masezerano y’ubufatanye n’imikoranire mu bijyanye n’ubucuruzi n’ishoramari.

Mu byo ibihugu byombi byemeranyijeho harimo imikoranire mu gufasha no korohereza abikorera ku mpande zombi kugira ngo babashe gushora imari muri ibi bihugu.

Uyu muhango ku ruhande rwa Mozambique witabiriwe na Minisitiri w’Ubucuruzi n’Inganda, Carlos Alberto Fortes Mesquita; Umujyanama wa Perezida, Omar Ossumane Momade Mitha; Umuyobozi muri Minisiteri y’Ubukungu n’Imari, Luis João Matsinhe n’abandi.

U Rwanda rweretse intumwa za Mozambique amahirwe agaragara mu nzego zitandukanye, uko igihugu gikomeje korohereza Abanyarwanda n’abanyamahanga bashaka gukora ishoramari n’ubucuruzi, amategeko yashyizweho mu gukomeza kureshya abashoramari n’ibindi.

Perezida Kagame yakiriye intumwa za Perezida Nyusi mu gihe yaherukaga guhura na we muri Nzeri 2021, ubwo yagiriraga uruzindo rw’akazi muri Mozambique rwamaze iminsi ibiri.

Perezida w’u Rwanda, Paul Kagame yakiriye mu biro bye intumwa za Perezida wa Mozambique, Filipe Nyusi
Ibiganiro bagiranye na Perezida Kagame byibanze ku butwererane n’ubufatanye hagati y’ibihugu byombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .