Kwamamaza

Perezida Kagame yakiriye Intumwa z’Umuryango Mpuzamahanga w’Abayobozi bakiri bato

Yanditswe kuya 19-11-2016 saa 06:04' na Philbert Hagengimana


Perezida Kagame yakiriye bamwe mu bagize YPO (Young Presidents Organisation), Umuryango Mpuzamahanga w’Abayobozi bakiri bato, bamumurikira imishinga mishya bateganya gushoramo imari mu Rwanda, irimo uw’amashanyarazi azacanira abaturage bagera kuri Miliyoni.

Abo banyamuryango ba YPO bakiriwe na Perezida Kagame nyuma y’icyumweru bamaze mu Rwanda, baganira n’abandi bashoramari ndetse n’inzego zitandukanye, hagamijwe kureba amahirwe ahari yashorwamo imari, dore ko benshi ari bashya mu buyobozi bw’ibigo bahagarariye.

Nk’uko Umuyobozi w’Ikigo cy’Igihugu cy’Iterambere (RDB), Francis Gatare yabitangarije Abanyamakuru, abo banyamuryango ba YPO baganiriye byinshi na Perezida wa Repubulika birimo amateka y’u Rwanda n’inzira rwanyuzemo rwiyubaka, banamumurikira imishinga bateganya.

Gatare yagize ati “Bamwe bashoye imari mu mushinga w’amashanyarazi ava mu mirasire y’izuba, abandi bakora ishoramari mu Ikoranabuhanga (ICT), abandi mu buhinzi n’ubworozi cyane cyane kongerera agaciro umusaruro ubivamo n’ibindi.”

Muri iyo mishinga, Gatare yavuze ko harimo umwe w’ikoranabuhanga, wo gukora isomero kuri murandasi (Internet), harimo n’abashaka guteza imbere imishinga y’abanyarwanda bakiri bato nk’abahanzi. Gusa abenshi muri bo, ngo imishinga yabo iracyari mu bitekerezo, dore ko ari bwo bwa mbere bari bageze mu Rwanda.

Itsinda Perezida Kagame yakiriye ryari rigizwe n’abantu 17 baturutse mu bice bitandukanye by’Isi nka Leta Zunze Ubumwe z’Abarabu (UAE), Australia, Israel, Ecosse, Hong Kong, Leta Zunze Ubumwe za Amerika n’u Rwanda.

Urugendo rwabo rwa munani mu Rwanda rwitiriwe “urugamije impinduka” (The journey for Change) rwateguwe na rimwe mu matsinda agize YPO ryiswe “YPO’s Thriving Communities Network”, rigizwe n’abantu bagera ku 4000.

Umwe muri bo ,Yariv Cohen, wo mu kigo Ignite Power cyo mu Bwongereza gikora ibijyanye no gukwirakwiza amashanyarazi akomoka ku mirasire y’izuba, yatangarije Abanyamakuru ko intego yabo yari iyo kumenya u Rwanda n’amahirwe arurimo yashorwamo imari no kumenyana n’abashoramari b’Abanyarwanda n’inzego zifata ibyemezo.

Cohen ati “Twaje hano ku nshuro ya munani kugira ngo turebe iki gihugu tukimenye, turebe ahari amahirwe yashorwamo imari, kuko YPO ku Isi ifite imbaraga mu bushabitsi kandi isanzwe inakorera mu Rwanda mu bikorwa by’ingeri zitandukanye.”

YPO igizwe n’abanyamuryango 24.000 baturuka mu bihugu 130 byo ku Isi, bakaba ari abayobozi b’ibigo n’amasosiyete y’Ubucuruzi.

Mu 2003, Young Presidents Organization (YPO) yahaye igihembo Perezida Kagame, cyitwa Global Leadership Award, kubera ahanini imiyoborere yahinduye ubuzima bw’abanyarwanda, ibyo bikagaragarira ku kwimakaza amahoro, ndetse n’ikigero cy’iterambere mu bukungu n’imibereho myiza yabagejejeho.

Perezida Kagame aganira n'abagize YPO
Bamugaragarije imishinga itandukanye bashaka gushoramo imari mu Rwanda
Umwe mu mishinga bifuza gukorera mu Rwanda ni ujyanye no gutanga amashanyarazi aturuka ku mirasire y'izuba
Nyuma y'ibiganiro,Intumwa za YPO zasezeye kuri Perezida Kagame mu byishimo
Yariv Cohen wavuze mu izina ry'abari baje kuganira n'Umukuru w'Igihugu
Umuyobozi w’Ikigo cy’Igihugu gishinzwe Iterambere (RDB), Francis Gatare, aganira n'itangazamakuru

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved