Perezida Kagame yakiriye intumwa yihariye ya Loni mu biyaga bigari

Yanditswe na IGIHE
Kuya 12 Nzeri 2019 saa 05:40
Yasuwe :
0 0

Perezida Kagame kuri uyu wa Kane yakiriye Huang Xia, intumwa yihariye y’Umunyamabanga Mukuru w’Umuryango w’Abibumbye mu karere k’ibiyaga bigari.

Nk’uko amafoto abigaragaza, Perezida Kagame yakiriye iri tsinda ari kumwe n’Umunyamabanga wa Leta muri Minisiteri y’Ububanyi n’Amahanga ushinzwe Umuryango wa Afurika y’Iburasirazuba, Amb. Olivier Nduhungirehe, Lieutenant Colonel Patrick Karuretwa, Umunyamabanga wihariye wa Perezida wa Repubulika na Minisitiri w’Ingabo, Maj Gen Albert Murasira.

Umushinwa Huang Xia w’imyaka 57 yahawe izi nshingano muri Mutarama 2019, asimbuye Said Djinnit wo muri Algeria.

Ubwo Umunyamabanga Mukuru wa Loni, Antonio Guterres, yamutangazaga, yavuze ko azanye ubunararibonye bw’imyaka 30 mu bya dipolomasi yakuye hirya no hino ku Isi cyane cyane muri Afurika yakoze mu myanya myinshi yo ku rwego rwo hejuru.

Huang yabaye ambasaderi w’u Bushinwa muri Niger, Senegal na Repubulika ya Congo. Yakoze kandi igihe kirekire muri Minisiteri y’Ububanyi n’Amahanga y’u Bushinwa. Yanakoze kandi muri Ambasade y’u Bushinwa muri Gabon, mu Bufaransa ndetse anaba umuyobozi w’umujyi wa Jiamusi, mu ntara ya Helongjiang mu Bushinwa.

Akarere k’ibiyaga bigari gakomeje kugarizwa n’ibibazo by’imitwe iteza umutekano muke yiganjemo iyikambitse mu mashyamba ya RDC nka FDLR, ADF n’iyindi.

Akarere k’ibiyaga bigari, kagizwe n’ibihugu 12 ari byo; Angola, Burundi, Repubulika ya Centrafrique, Repubulika ya Congo, RDC, Kenya, Uganda, Rwanda, Sudani y’Epfo, Sudan, Tanzania na Zambia.

Abakuru b’ibihugu by’u Rwanda, RDC na Angola baherutse kuganira ku ngingo zirimo iterambere n’ubufatanye mu rwego rw’akarere; by’umwihariko ku kugarura amahoro mu karere k’ibiyaga bigari.

Bemeranyije ku ngingo eshatu zirimo ko bijyanye n’ikibazo cy’umutekano, “biyemeje kongerera imbaraga ihuriro rya Congo-Angola-Rwanda (CAR), aho rizahuza n’abandi bakuru b’ibihugu by’akarere mu gushakira hamwe uburyo bwo kurandura imitwe yitwaje intwaro yo muri Congo n’ahandi hamwe n’ibindi bibazo bijyanye n’umutekano w’ibihugu.”

Huang asuye u Rwanda mu gihe umubano warwo na Uganda urimo agatotsi ndetse ibihugu byombi bikaba biherutse gusinya amasezerano agamije guhagarika umwuka mubi uri hagati y’ibi bihugu, akaba aheruka gusinyirwa i Luanda muri Angola.

Aya masezerano yashyizweho umukono ku wa 21 Kanama 2019 mu nama yahuje abakuru b’ibihugu igamije “kunoza imikoranire no kubungabunga umutekano w’akarere.’’

Itsinda rizoherezwa na Guverinoma ya Uganda ritegerejwe i Kigali mu cyumweru gitaha, mu nama izahuriza hamwe ibihugu byombi haganirwa ku ishyirwa mu bikorwa ry’aya masezerano asobanuye byinshi ku karere k’ibiyaga bigari.

Perezida Kagame yakiriye Huang n'itsinda rye
Perezida Kagame na Huang bagiranye ibiganiro
Ifoto y'urwibutso nyuma y'uko Perezida Kagame yakiriye Huang

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza