Kwamamaza

Perezida Kagame yakiriye ba Ambasaderi bane bashya bamwizeza ubufatanye mu iterambere

Yanditswe kuya 11-10-2016 saa 13:34' na Cyprien Niyomwungeri


Perezida Paul Kagame yakiriye impapuro zemerera ba ambasaderi bane bashya guhagararira ibihugu byabo mu Rwanda, bamwizeza ubufatanye mu iterambere ry’ubukungu, ibikorwaremezo, ishoramari na politiki.

Ambasaderi Chelva Retnam Rajah uhagarariye Singapore mu Rwanda uzaba afite icyicaro iwabo, ni we wabimburiye abandi kwakirwa kuri uyu wa Kabiri tariki 11 Ukwakira. Yabwiye itangazamakuru ko ibihugu byombi bigiye gukomeza kubakira ku mubano wari usanzwe bigafatanya kugera ku iterambere rya buri gihugu.

Yagize ati “Twiteguye kubakira ku bufatanye bwiza dufitanye kandi tugaragaze aho twafatanya umwe ku wundi ku buryo bufasha buri wese kugera ku ntego ze, ni cyo Singapore ishyize imbere.”

Akomeza avuga ko bazagerageza kugirana ubufatanye mu iterambere ry’ubukungu no mu gukorera hamwe mu miryango mpuzamahanga aho buri gihugu kizashyigikira ikindi.

U Rwanda na Singapore bifitanye umubano mwiza n’ubufatanye bishingiye ku bucuruzi n’ishoramari, kubaka ubushobozi no gutanga ubufasha mu bya politiki. Kuwa 18 Werurwe 2005 nibwo umubano mu bya dipolomasi hagati y’ibihugu byombi watangiye.

Ku mwanya wa kabiri Perezida Kagame yakiriye Ambasaderi Afonso Henriques Abreu de Azeredo uhagarariye Portugal mu Rwanda akazaba afite icyicaro i Addis –Ababa muri Ethiopia. Nyuma yo kwakirwa yabwiye itangazamakuru ko biteguye gushimangira umubano w’ibihugu byombi ukagera kuri byinshi

Yagize ati “Nabwiye Perezida Kagame ko nshimishijwe kandi ntewe ishema no kuba Ambasaderi mushya wa Portugal mu Rwanda, iki ni ikimenyetso cy’uko ubuyobozi bwanjye bushishikajwe no gushimangira no kwagura umubano hagati y’ibihugu byombi.”

Akomeza avuga ko ikimenyetso gihamya umubano mwiza ari amasezerano yo kubaka ikibuga mpuzamahanga cy’indege cya Bugesera ibihugu byombi biherutse gusinyana. Kizubakwa n’ikigo cyo muri Portugal kitwa Mota Engil Engenharia e Construcao Africa SA.

Uyu mushinga uzashorwamo imari ingana na miliyoni 818 z’amadolari, biteganyijwe ko uzarangira muri 2018.

Ambasaderi Afonso yavuze ko banaganiriye kuri politiki n’ubukungu kandi bifuza kubakira kuri uriya mushinga munini w’ikibuga cy’indege bakanoza umubano n’u Rwanda.

Ati “Turashaka kubakira kuri iki gikorwa tukongera ingufu mu bufatanye mu by’ubukungu n’iki gihugu.”

Mu bindi bikorwa Portugal yakoze mu Rwanda ni aho ikigo cyaho Goldsol II Ltd cyashoye imari mu bijyanye no kongera ingufu mu Rwanda, ni umushinga ufite agaciro ka 48 200 000 z’amadolari.

Perezida Kagame yakurikijeho kwakira Ambasaderi Pekka Juhani Hukka uhagarariye Finland mu Rwanda akazaba afite icyicaro Dar es Salaam.

Ambasaderi Pekka yavuze ko umubano w’ibihugu byombi uzakomeza kwiyongera cyane cyane ushingiye ku iterambere ry’ubucuruzi n’ishoramari.

Yagize ati “Twaganiriye ku mubano mwiza hagati y’u Rwanda na Finland, ubusanzwe dufitanye umubano mwiza by’umwihariko mu bijyanye n’urwego rw’abikorera, iterambere ry’ubucuruzi n’ingufu.”

Perezida Kagame yasoje yakira Ambasaderi Dr.Peter Woeste umaze ibyumweru bibiri mu Rwanda akazahagararira u Budage mu Rwanda afite icyicaro i Kigali.

Yavuze ko aje gukomeza ibisanzwe bikorwa no kubyongeramo imbaraga kuko bisanzwe ari byiza.

Umubano w’u Rwanda n’u Budage watangiye mu 1963. Nyuma ya Jenoside yakorewe Abatutsi, u Budage buri mu bihugu bya mbere byasubukuye umubano n’u Rwanda. U Rwanda ni igihugu cya gatatu gisurwa cyane n’abaminisitiri b’Abadage nyuma ya Afurika y’Epfo na Ethiopia.

U Budage bufasha u Rwanda mu bikorwa by’uburezi cyane cyane guteza imbere ubumenyingiro, kwegereza ubuyobozi abaturage no kwimakaza imiyoborere myiza, iterambere ry’abikorera n’iry’urubyiruko n’ibindi.

Mu myaka irindwi ishize u Budage bwakoze imishinga irindwi mu Rwanda ifite agaciro ka miliyoni 127.4 z’amadolari hakorwa ishoramari ryahanze imirimo 420 mu bijyanye n’inganda, ingufu, ubwubatsi na serivisi z’imari.

Ibihugu byombi biherutse gusinyana amasezerano mu bijyanye n’ubwikorezi bw’indege.

Ambasaderi Pekka Juhani Hukka uhagarariye Finland mu Rwanda
Ambasaderi Chelva Retnam Rajah uhagarariye Singapore mu Rwanda
Dr.Peter Woeste, uhagarariye u Budage mu Rwanda
Ambasaderi Afonso Henriques Abreu de Azeredo uhagarariye Portugal mu Rwanda

Amafoto:Kazungu Armand


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved