Perezida Kagame yakiriye abayobozi b’u Bushinwa barimo intumwa ya mugenzi we Xi Jinping (Video)

Yanditswe na Philbert Girinema
Kuya 20 Kanama 2017 saa 06:20
Yasuwe :
3 0

Perezida Kagame kuri iki Cyumweru yarikiye abayobozi batandukanye b’u Bushinwa barimo Intumwa ya Perezida Xi Jinping, Liu Xiaofeng n’Umuyobozi wungirije muri Minisiteri y’Ububanyi n’Amahanga y’iki gihugu, Xu Fei.

Ibiganiro by’aba bayobozi byari byitabiriwe na ba Ambasaderi b’ibihugu byombi; Minisitiri w’Ububanyi n’Amahanga w’u Rwanda, Louise Mushikiwabo; Umuyobozi wungirije muri Minisiteri y’Ububanyi n’Amahanga y’u Bushinwa, Xu Fein na Ambasaderi w’u Bushinwa mu Ihuriro rya Afurika n’u Bushinwa, Zhou Yuxiao.

Intumwa ya Perezida Xinping, Liu Xiaofeng, asanzwe ari Umuyobozi wungirije mu ihuriro ry’imitwe ya Politiki mu Bushinwa. Niwe muyobozi wari uhagarariye igihugu cye mu muhango w’irahira rya Perezida Kagame wabaye ku wa Gatanu tariki ya 18 Kanama 2017.

U Bushinwa busanzwe bufasha u Rwanda mu ngeri zitandukanye zirimo ubuzima, ubuhinzi n’ibikorwaremezo ndetse butera inkunga bukanaha u Rwanda inguzanyo zigenewe ibikorwa bitandukanye.

U Bushinwa mu Rwanda mu 1971

Kuwa 12 Ugushyingo 1971 wari umunsi w’ibirori, ubwo Abanyarwanda batangiraga umubano w’ubufatanye n’Abashinwa, himikwa ubuhahirane no guteza imbere ishoramari n’iki gihugu kimaze imyaka amagana kiri mu bya mbere ku Isi.

Kuva icyo gihe u Bushinwa bwatangiye gufasha u Rwanda mu mishinga y’iterambere yiganjemo ubuhinzi n’ubwubatsi bw’ibikorwaremezo, aho ku nshuro ya mbere ibishanga byo mu rw’imisozi igihumbi byatangiye guhingwamo umuceri n’imihanda ya kaburimbo irubakwa.

Inyandiko igaragaza ibikorwa by’u Bushinwa muri Afurika yo munsi y’ubutayu bwa Sahara, yashyizwe ahagaragara n’Ibiro bishinzwe Iperereza bya Leta Zunze Ubumwe za Amerika, yerekana ko mu 1972 iki gihugu gituwe cyane ku Isi cyatanze miliyoni 175 z’amadolari y’imfashanyo mu bihugu bitandatu birimo n’u Rwanda, aho akenshi zakoreshwaga mu bwubatsi n’ubuhinzi.

Amasezerano u Rwanda rwasinyanye n’u Bushinwa icyo gihe muri Gicurasi, agaragaza ko rwahawe miliyoni 22 z’amadolari ya Amerika yakoreshejwe mu kubaka imihanda ya kaburimbo n’uruganda rwa sima rwa Bugarama muri Rusizi (CIMERWA).

Mu rwego rw’ubuzima, u Bushinwa bwubatse ibitaro bibiri byo ku rwego rw’akarere, ibya Masaka na Kibungo. Mu burezi, uretse gutanga buruse ku banyeshuri b’Abanyarwanda, Abashinwa bubatse amashuri abiri, rimwe riri mu karere ka Gatsibo irindi mu ka Rulindo ryigwamo n’abakobwa gusa.

Kuva mu 2000 kugeza 2011 hari imishinga 56 u Bushinwa bwateyemo inkunga u Rwanda. Iyo mishinga yose yari ifite agaciro ka miliyoni 160 z’amadolari ya Amerika. Ubwo hizihizwaga imyaka 40 y’umubano w’ibihugu byombi, u Bushinwa bwari bumaze guha u Rwanda miliyoni 170 z’amadolari.

Abanyarwanda n’abaturanyi babo bo mu Muryango wa Afurika y’Iburasirazuba, EAC, bahanze amaso umushinga wa gari ya moshi, nawo u Bushinwa bukaba bwariyemeje kuwuherekeza kugeza usojwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza