Perezida Kagame yakiriye abanyeshuri ba Carnegie Mellon University barimo guhugura mu ikoranabuhanga

Yanditswe na HABIMANA James
Kuya 30 Gicurasi 2019 saa 09:26
Yasuwe :
0 0

Perezida Paul Kagame kuri uyu wa Kane yakiriye abanyeshuri ba Carnegie Mellon University, ishami rya Qatar, irya Pittsburgh n’iry’u Rwanda, baganira ku bijyanye na gahunda z’igihugu zigamije guteza imbere ikoranabuhanga.

Mu gihe cy’ibyumweru bibiri aba banyeshuri barimo gutanga amahugurwa y’ikoranabuganga mu mashuri ya E.P. Kacyiru, SOS Village d’enfant, na IFAK.

Aba banyeshuri barimo barindwi n’umukozi umwe b’ishami rya CMU-Pittsburg, barindwi bo muri CMU-Qatar barimo gufashwa n’abo muri CMU-Africa.

Perezida Kagame yabonanye n’aba banyeshuri nyuma yaho umwe muri aba banyeshuri witwa Andrew Adward yanditse kuri Twitter, asaba Perezida Kagame ko bahura bakaganira ku ruhare bagira mu burezi bw’u Rwanda.

Ati “Turi abanyeshuri ba Carnegie Mellon University muri Qatar na Pittsburgh, turi hano mu Rwanda kugeza tariki ya 1 Kamena twigisha gushyira porogaramu muri mudasobwa mu mashuri yisumbuye. Twakwishimira guhura na we tukaganira ku cyerekezo cyawe mu burezi mu Rwanda n’uburyo twashyiramo imbaraga zacu.”

Minisitiri w’Uburezi Dr Eugène Mutimura, yavuze ko Perezida Kagame, kubonana n’aba banyeshuri byari bigamije kubagaragariza ko ibyo biga byateza imbere umuryango nyarwanda, umuryango wa Afurika ndetse no ku Isi hose muri rusange.

Ati “Ibyo nibyo rero bibanzeho mu kiganiro hagati ya Perezida Kagame n’aba banyeshuri.”

Dr Mutimura kandi yavuze ko aba banyeshuri bafite umushinga ugamije gufasha ko ibyo biga babibyaza umusaruro bikagira icyo bifasha umuryango nyarwanda mu ikoranabuhanga.

Umukuru w’igihugu yabwiye abanyeshuri ko ’Kugira ngo u Rwanda rugere ku byo rwifuza, nta bundi buryo bwiza bitari uguca mu burezi, ubumenyi, ubuhanga n’iterambere’.

Ati “Ntushobora kugera ku byo wifuza mu gihe abagukikije batabifitemo inyungu. Ntitwigeze twifuza kugira u Rwanda, aho tuba dufite ibyiza twanyine, biba byiza cyane iyo n’abandi bimeze neza. Nibyo bikubiye mu bufatanye na CMU”.

Corry Bird umunyeshuri wari uhagarariye bagenzi be, yavuze ko ubusanzwe bakorana n’aya mashami yose uko ari atatu, bagamije guteza imbere ibikorwa by’ikoranabuhanga mu mashuri abanza n’ayisumbuye.

Yagize ati “U Rwanda ni igihugu kigamije gutera imbere gishingiye ku buryo bw’ikoranabuhanga, Perezida Kagame arakora akazi gakomeye agamije guteza imbere uburezi no guhanga imirimo.”

Naho Rahma Mohammed ukomoka muri Somalia akaba ari umunyeshuri wiga icyiciro cya Gatatu cya Kaminuza muri Carnegie Mellon mu Rwanda, yashimye icyerekezo cya Perezida Kagame cyo kuba yarazanye iyi Kaminuza mu gihugu.

Yagize ati “Icyerekezo cye cya mbere cyari ugushyiraho ishuri ry’abanyafurika aho bashobora kubonera ubushobozi. Urugero ni nkanjye wahisemo kuguma hano mu Rwanda nkazana n’umuryango wanjye kandi nkakorera hano ubucuruzi bwanjye, mbere iki ni ikintu ntagashoboye gukora iyo iri shuri ritaza kuba ririho hano mu Rwanda.”

Yakomeje agira ati “Ndashima uburyo Perezida Kagame akomeje guteza imbere ikoranabuhanga n’imyuga mu mashuri yaba n’ayo mu bice by’icyaro, mu by’ukuri n’ibintu biteye ishema. U Rwanda ni igihugu giteye ishema mu buryo bw’ikoranabuhanga.”

Yabwiye abakiri bato ko bafite igihugu cyiteguye kubafasha mu guteza imbere ikoranabuhanga bityo na bo bagomba kubishishikarira.

Kuva mu 2010 abanyeshuri b’abanyarwanda barenga 140 bamaze guhugurwa mu gushyira porogaramu muri mudasobwa n’ibindi binyuze muri iyi gahunda ya Carnegie Mellon University. Hari kandi abarimu bo mu mashuri atandukanye bahuguwe ibijyanye n’ikoranabuhanga n’ibindi.

Perezida Kagame yakiriye abanyeshuri ba Carnegie Mellon University ishami rya Pittsburg, Qatar n'u Rwanda
Yababwiye ko udashobora kugera ku byiza abo mwegeranye batabigeraho
Aba banyeshuri barimo guhugura abo mu mashuri yisumbuye mu Rwanda ku bijyanye n'ikoranabuhanga

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza