Perezida Kagame yahuye n’abahagarariye Abanyarwanda biga mu Bushinwa n’abikorera(Amafoto)

Yanditswe na Cyprien Niyomwungeri
Kuya 18 Werurwe 2017 saa 05:20
Yasuwe :
1 0

Ubwo kuri uyu wa Gatandatu yasozaga uruzinduko rw’iminsi ibiri yagiriraga mu Bushinwa, Perezida Kagame yahuye n’itsinda ry’abahagarariye Abanyarwanda biga muri icyo gihugu ndetse n’abikorera baturutse mu Rwanda bagirana ibiganiro byihariye.

Muri iki cyumweru itsinda ry’abashoramari b’Abanyarwanda n’Abashinwa bahuriye i Beijing baganira ku mahirwe y’ishoramari n’ubucuruzi agaragara mu nzego z’abikorera no mu bindi.

Inama yabahuje yagarutse ku kureba uburyo hazamurwa ishoramari hagati y’ibihugu byombi, Rwanda- China investment Forum, yabereye muri Ambasade y’u Rwanda mu Bushinwa ikitabirwa n’ibigo by’ubucuruzi bigera kuri 50 byo muri iki gihugu.

Abanyarwanda baba mu Bushinwa barimo abaharangirije amasomo bagahabwa akazi n’icyo gihugu, abacuruzi n’abanyeshuri bakiga muri Kaminuza zikomeye z’aho, aho ubu hari abanyeshuri bagera kuri 500 biga amasomo ya siyansi, ubuvuzi n’ikoranabuhanga, barimo 50 bakorera impamyabumenyi z’ikirenga, PhD.

Babwiwe bimwe mu byavuye mu biganiro Perezida Kagame yagiranye na mugenzi we w’u Bushinwa Xi Jinping, ejo kuwa Gatanu bakaganira ku bucuruzi n’umubano w’ibihugu byombi. Abahuye n’Umukuru w’igihugu bakaba aribo bazagira uruhare runini rwo gushyira mu bikorwa ibyaganiriweho.

Nk’uko Ibiro Ntaramakuru by’u Bushinwa, Xhinhua, byabitangaje, Perezida Xi yashimye uburyo umubano w’ibi bihugu wagiye utera intambwe mu myaka 46 ishize, haba mu bijyanye n’ubwizerane muri politiki, ubufatanye mu bucuruzi no gusangira ibirebana n’umuco.

Yavuze ko hari ubushake bwo gufasha u Rwanda kubaka igice cyagenewe inganda, bikajyana n’ubufatanye bw’impande zombi mu guteza imbere urwo rwego, iterambere ry’ubuhinzi, kubaka ibikorwaremezo, ubukerarugendo n’umutekano.

Muri ibyo biganiro kandi Perezida Xi yijeje Kagame ko bazakomeza gushishikariza abashoramari benshi b’Abashinwa gushora imari mu mishinga minini y’ibikorwaremezo mu Rwanda.

Perezida Kagame agera ahabereye ibiganiro asuhuzanya n'ababyitabiriye
Abanyarwanda baba mu Bushinwa bishimiye guhura n'Umukuru w'Igihugu bagirana ibiganiro byihariye
Inshuti z'u Rwanda mu Bushinwa nazo zitabiriye ibiganiro Perezida Kagame yagiranye n'Abanyarwanda baba mu Bushinwa
Abitabiriye ibiganiro bahawe umwanya batanga ibitekerezo
Perezida Kagame yumva ibitekerezo by'Abanyarwanda baba mu Bushinwa
Perezida Kagame aherekejwe na Ambasaderi w'u Rwanda mu Bushinwa, Lt, General Charles Kayonga baganira n'Abanyarwanda baba muri iki gihugu
Perezida Kagame yahuye n’itsinda ry’Abanyarwanda baba mu Bushinwa ku munsi yasojeho urugendo yagiriraga muri iki gihugu
Perezida Kagame n'Abanyarwanda baba mu Bushinwa nyuma y'ibiganiro bagiranye

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza