Perezida Kagame yahishuye uburyo bingingirwaga kuguma muri Uganda

Yanditswe na Rabbi Malo Umucunguzi
Kuya 26 Ukwakira 2019 saa 09:30
Yasuwe :
0 0

Perezida Paul Kagame yavuze ko kwiyumvamo no gukunda ubunyarwanda byari umusingi w’urugamba rwo kubohora igihugu, kuko hari abifuzaga ko Abanyarwanda bamwe bahezwa mu buhungiro, mu gihe ibyo bari kubona byose ntacyo byari kuba bimaze kuko batari iwabo.

Perezida Kagame yabigarutseho ubwo kuri uyu wa Gatanu yasozaga ihuriro ngarukamwaka rya 12 rya Unity Club Intwararumuri, muri Kigali Convention Centre. Ni ihuriro ryahawe insanganyamatrsiko igira iti “Ndi Umunyarwanda igitekerezo - ngenga cy‘ukubaho kwacu”.

Umukuru w’igihugu yavuze ko Ndi Umunyarwanda ikintu cya ngombwa umuntu akwiye kuyibonamo, ari uko itanga umwanya wo kuganira ku buzima Abanyarwanda banyuzemo mu myaka ishize, bwari bukomeye ariko bwigisha.

Ati “Ndi umunyarwanda icyo tuyumvamo cyangwa icyo Unity Club ikidufasha kugeraho, ni ugutekereza uburyo umuntu, abantu biyubaka cyangwa se igihugu cyiyubaka.”

Yashimangiye ko abaturage b’igihugu bagomba kwigenera uko bagomba kubaho, kuko iyo hagize ushaka kubibagenera, batabigizemo uruhare, ari bwo havuka ibibazo.

Ati “Abo bandi bagomba kubigiramo uruhare, ntushobora kugenera abandi uko babaho kubera ko wabihisemo wowe, utabivuganye nabo, utabyumvikanye nabo ngo bavuge niba babyemeye, niba bafatanya nawe, ko ubwo buzima ari bwo bagiye kubaho.”

Yatanze urugero ku mateka ya mbere y’urugamba rwo kubohora igihugu, ubwo ubuyobozi bwavugaga ko igihugu cyuzuye, ko abari mu buhungiro batabona aho bajya.

Ati “Urabyumva rero biriya bintu navugaga. Umuntu n’abantu bamwe bahisemo kugenera abandi uko bagiye kubaho, batabifitemo uruhare. Niba mubyibuka kandi abandi, mu by’ukuri iyo mvugo yo kuvuga ngo u Rwanda ni urw’aba barurimo abandi mugume hanze, niba mutari mubizi reka mbibabwire, nicyo cyihutishije n’abantu gushaka kuba muri uru Rwanda.”

Yavuze ko ubwo abantu bahungaga u Rwanda kubera ivanguramoko, ubuyobozi bwaje kuvuga ngo “abahunze bagumeyo”, amateka bakayahera ku buhunzi ntibakomoze ku mpamvu zatumye bahunga.

Perezida Kagame yavuze ko impunzi zanohererezwaga intumwa zimwe zanishyuwe, ngo zishishikarizwe kuguma mu mahanga.

Ati “Bakajya babadutumaho bamwe muri twe, bagomba kuba barajyaga henshi, kutwumvisha ngo aho turi tuhagume ndetse tuhakomere, ndetse tuhifatire habe ahacu. Nibyo, mu 1988 bantumyeho abantu, hari abandi twakoranaga icyo gihe i Bugande, badutumaho abaza kutwigisha ngo ariko ubundi kariya gahugu muragashakamo iki, ko twumvise ngo murashaka gutaha.”

“Ariko nawe ibaze umuntu ukubaza ngo urashaka gutaha, iwanyu urahashaka iki? Iwabo w’umuntu ahashaka iki se? Ni iwabo, uko haba hasa kose. Baza kutwigisha, badukwiramo batunyanyagiramo.”

Perezida Kagame yavuze ko bamutumyeho umuntu amubwira ko aturuka muri Repubulika ya Demokarasi ya Congo, icyo gihe yitwaga Zaire.

Ati “Icyo gihe bamutuma kunyumvisha, turi mu ngabo za Uganda, bamwe muri twe twari mu ngabo z’icyo gihugu cya Uganda, kunyumvisha ngo biriya bintu tujya twumva ngo murashaka gutaha, ka Rwanda muragashakaho iki, mwakarekeye abakarimo, ndetse ukumva ubabariye n’abakarimo kuko ni nko kuvuga ngo n’ubundi ntikabaho.”

Yavuze ko icyo gihe byasaga no kuvuga ngo abari mu Rwanda mubareke babeho uko babaye.

Ati “Ndamubwira nti oya, kuri ibyo ntabwo twumvikana. U Rwanda uko ruri kose ni rwo rwacu, nicyo gihugu cyacu. Naho ibyo avuga ndamubwira ngo wowe uvuga ngo umeze neza, yari umukire koko yarakize cyane bikabije, ndamubwira nti ariko ubuzima ntabwo ari ubukire, ubuzima burenze ibyo. Gukira, uwakira agahirwa ni byiza, ariko ukwambuye ikindi kintu kitari ubukire, cya ngombwa byose bishingiraho, ubukire ntacyo buba bukimaze.”

Yavuze ko yasubije iyo ntumwa ko nubwo babyemera u Rwanda bakarwihorera, nawe aho aturuka ari umunyagihugu w’urwego rwa kabiri cyangwa rwa gatatu, ko atari mu rwego rwa mbere n’amafaranga yose afite.

Ati “Ni umunyagihugu uhabwa ibyo abandi basize. Ba nyir’igihugu barabanza bagahitamo bakavanamo ibyaho, ibisigaye, uri umunyagihugu ukurira urwego ujya gufata ibyo basize. Ndababwira nti ntabwo uri we, njye sinshaka ubwo buzima. Ibyo umbwira byo gukomera hano, aha si iwacu, no gukomera simbishaka, uko gukomera kwawe ubigumane. Afata inzira arataha, natwe turakomeza, dukora ibyo twumvaga dukwiriye kuba dukora.”

Perezida Kagame yavuze ko nyuma abari mu mahanga batashye, kandi igihugu ntabwo abaturage bose bagikwiriyemo kubera ko abari ku butegetsi bamaze abantu.

Yavuze ko iyo wambuye umuntu uburenganzira bwe arushaho kuburwanira, kandi iyo ntambara yo kurwanira ukuri abantu iteka barayitsinda.

Ati "Ntureba nk’aba bandi bariho ubungubu barwanya igihugu cyacu, ndetse rimwe bo bakanavuga ko ubwo iriya ntambara yabaye kuriya cya gihe yo muri 90, bakavuga ngo ese bariya bo si ko batangiye, urabona bataragize batya… ntabwo ari rimwe guteranya na rimwe ni kabiri, oya, ntabwo ariko bimera."

Yavuze ko ufashe abarwanya leta y’u Rwanda ukabashyira hamwe wasanga nta n’umwe ufite ukuri ashingiraho, kubera ko abenshi aho kugendera ku kuri, bayobywa na politiki y’amahanga ashaka kudindiza u Rwanda.

Ubundi ngo uba ukwiye kujya muri opozisiyo ugaragaza ibyo wambuwe, wabujijwe cyangwa bidakorerwa abanyarwanda kandi byakabaye bikorwa, ariko ngo ibyo "bafite baheraho bavuga ibyo bintu byose ni bikeya, cyangwa se nta n’ibihari."

Ati "Iyi Ndi Umunyarwanda tuvuga, icyo yatwigishije cyangwa icyo yahereyeho ni iki ? Icyo yahereyeho ni ukuvuga ngo n’umwana wa kanaka uwo ari we wese, w’idini iyo ari yo yose, w’ubwoko ubwo ari bwo bwose, w’akarere aturukamo ako ari ko kose, afite amahirwe angana n’undi uwo ari we wese."

Yavuze ko Abanyarwanda bahisemo ibibabereye, kuko ari ko bikwiye kuba bimera.

Ati "Ubu nimumbwire, mu myaka 25 ishize, ibyo twahisemo nabi twicuza ni ibiki ? Nta nubwo bivuze ko turagera aho dushaka kujya, ashwi. Akazi karacyari kenshi pe, ariko inzira ni nyabagendwa, ugenda uzi ngo aho buri bwire ugeze uhafite umutekano, nibwira urongera ugende, nibwira ucumbike, ariko ni ibintui uzi bifite umutekano muri iyo nzira."

"Ndi umunyarwanda rero ni icyongicyo bivuze. Ni ukuvuga ngo uko dutandukanye uko ari ko kose, uko dutandukanye mu bitekerezo, uko dutandukanye uko dusa n’uko tureshya n’uko twumva n’iki, turacyari abanyarwanda bakwiriye kuba bakorera amahoro y’abanyarwanda."

"Twahuza dute ukuntu dutandukanye, kugira ngo tuvanemo ikintu buri wese yungukamo, yibonamo ? Twabigenza dute ? Abavuga ko barwanya igihugu, abavuga ko bashaka kuzana, ibyo bazana ntabwo nzi ibyo ari byo njyewe. Ibyo bazana ni ugusenya ibyo twubaka. Ariko icyiza, abanyarwanda batishyiramo kuba ibitangaza kundi, bo barabyumva."

Perezida Kagame yavuze ko uwaba ashaka guha abanyarwanda ubuzima ashaka kuruta ubwo bashaka babonye mu buryo busobanutse, iyo ntambara adashobora kuyitsinda.

Yavuze ko iyo mu gihugu abantu bashyize hamwe ibitekerezo kandi bagahabwa amahirwe angana, bidashoboka ko hagira "uwaza agatobanga ubuzima bw’abantu uko ashaka."

Yahise akomoza ku bihugu byabaga bishaka kubwira u Rwanda uko rugomba kubaho byitwaje ko bifite amafatanga yo gutangamo inkunga, ariko rurabyanga.

Ati "Tukavuga ngo amafaranga yo turayakeneye, ariko amafaranga atwambura uburenganzira bwacu, nimuyagumane. Ni yo mpamvu n’ibi dukora by’amajyambere bigerwaho, ndabwira mwebwe, mwebwe abanyarwanda, uku kwiyubaka, inzira yo kwiyubaka turimo, ntikwiye gusubira inyuma."

"Ntikwiye gusubira inyuma ishingiye ku mwirato wa bamwe cyangwa imitwe minini ya bamwe, abantu bari aho, oya, abongabo mujye mubanza mubakosore, nibananirana buriya no kubashyira ku murongo birakunda, dufite imbaraga zihagije, iyo turi hamwe nta watunanira. Abigira ba kabutindi, muri twebwe, abantu dukwiye kuba dukorera hamwe, uwo nguwo yaturuka he cyangwa yaba ari nde ? Tugomba kumushyira mu mwanya we."

Perezida Kagame yavuze ko bisaba uruhare rwa buri wese, ubundi abantu bafatanyiriza hamwe bakubaka igihugu cyabo, kandi bikaba umuco.

Yavuze ko n’abagiye bava mu nzira bagateshuka, bakomeza kugaragarizwa ko aho bashakira bagaruka, ariko ‘bagomba kugarukana imico itandukanye n’iyo bajyanye’.

Yakomeje avuga ko Ndi Umunyarwanda ikwiye gutera abanyarwanda ishema, kandi kuba muri Ndi Umunyarwanda biba bivuze ko Abanyarwanda bose bari hamwe nta cyashobora kubahugabanya.

Musenyeri Antoine Kambanda, Arikiyepisikopi wa Kigali aganira na Guverineri w'Intara y'Iburasurazuba , Fred Mufulukye
Minisitiri mu Biro bya Minisitiri w'Intebe Ushinzwe Imirimo y'Inama y'Abaminisitiri, Kayisire Marie Solange, aganira n'Umujyanama wa Perezida wa Repubulika mu by'umutekano, Gen. James Kabarebe
Guverineri wa Banki Nkuru y'Igihugu, John Rwangombwa ni umwe mu bitabiriye uyu mwiherero
Minisitiri w'Intebe, Dr Edouard Ngirente, asoma inyandiko mu mwiherero wa Unity Club
Umunyamabanga Nshingwabikorwa wa Komisiyo y'Igihugu y'Ubumwe n'Ubwiyunge, Ndayisaba Fidèle aganira na Perezida w'Inteko Ishinga Amategeko umutwe w'Abadepite, Donatille Mukabalisa
Umuyobozi Mukuru wa Polisi y'Igihugu, IGP Dan Munyuza, akurikiye ibiganiro byatanzwe
Guverineri w'Intara y'Amajyaruguru, Gatabazi JMV, ni umwe mu bitabiriye uyu mwiherero
Perezida Kagame yavuze ko abanyarwanda bagomba gukomeza gushyira hamwe bakirinda icyabasenya
Perezida wa Komisiyo y’Igihugu y’Ubumwe n’Ubwiyunge, Musenyeri John Rucyahana, yavuze ko u Rwanda rwagize amateka y’imiyoborere mibi yimakaje irondabwoko
Perezida wa Komisiyo y'Igihugu y'Amatora, Prof. Kalisa Mbanda, nawe yitabiriye umwiherero wa Unity Club Intwararumuri
Rwamukwaya Olivier wahoze ari Umunyamabanga wa Leta muri Minisiteri y'uburezi ushinzwe amashuri y'imyuga n'ubumenyingiro nawe yitabiriye uyu mwiherero
Perezida w'Itorero ry'Igihugu, Bamporiki Edouard, akurikiye ibiganiro byatangwaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza