Perezida Kagame yagejeje ijambo ku nteko rusange ya Loni

Yanditswe na Philbert Girinema
Kuya 23 Nzeri 2016 saa 08:07
Yasuwe :
0 0

Perezida Paul Kagame yasabye abakuru b’Ibihugu bari bakoraniye mu Nteko Rusange ya 71 y’Umuryango w’Abibumbye, ko uburyo bwo kubungabunga amahoro n’umutekano bishingira ku cyerekezo ibihugu bisangiye, uko akaba ari nako bakwiye gufata ikibazo cy’impunzi ku Isi.

Ibibazo by’intambara muri Syria, Iraq, Afghanistan na Eritrea n’abandi bajya gushaka imibereho i Burayi bimaze kuzamura umubare w’impunzi n’abimukira, ku buryo Umuryango Mpuzamahanga w’Abimukira, IOM, ubarura ko muri uyu mwaka kugeza muri Nzeri, 3213 bapfiriye mu nyanja bagerageza kujya i Burayi mu gihe 298 474 babashije kugerayo.

Gusa ibihugu by’i Burayi ntibivuga rumwe kuri iki kibazo, aho abimukira benshi bishakira kujya mu Budage na Suède, ariko kubera amategeko akaze y’ibihugu abenshi bakisanga mu Bugereki, nabwo mu mezi ashize bukaba bwarateye hejuru busaba ko mu Muryango w’Ubumwe bw’u Burayi basaranganya uwo mutwaro.

Mu 2015 honyine i Burayi hinjiye abimukira miliyoni 1.3, Inteko rusange ya 71 y’Umuryango w’Abibumbye iteraniye i New York, kuwa Mbere ikaba yatangiriye ku rujya n’uruza rw’abimukira n’impunzi, iyi ikaba ari inshuro ya mbere iyi Nteko ikoranyije Abakuru b’Ibihugu na ba Guverinoma baganira kuri iki kibazo.

Mu ijambo yavuze kuri uyu wa Kane tariki 22 Nzeri, Perezida Kagame yavugiye muri iyi Nteko ko uburyo bwo kubungabunga amahoro n’umutekano bishingira ku cyerekezo gisangiwe hagendewe ku musaruro Isi ikeneye n’ingingo zigenga ubufatanye bw’ibihugu.

Ati “Inshingano duhuriyeho ku burenganzira n’imibereho myiza y’impunzi n’abimukira, bikwiye kugaragara muri ubu buryo. Iki kibazo kigomba kwitabwaho mu buryo buhoraho kandi bigakoranwa umutima w’impuhwe igihe cyose. Ntabwo bigomba kuba ikibazo gikomeye gusa ari uko ibihugu bikize bitangiye kugirwaho n’ingaruka zacyo.”

Perezida Kagame yijeje ko u Rwanda ruzakomeza kubigiramo uruhare rwarwo, muri iki gihe rukaba rucumbikiye impunzi zigera hafi ku 200 000 ziganjemo Abarundi n’Abakongomani.

Perezida Kagame yavuze ko hari ibintu bigenda bikorwa neza, ariko nta gushidikanya hagerwa kuri byinshi mu gihe aba bayobozi baba bashyize imbere abaturage bari kurwaniririra kandi hakubakirwa ku masomo bamaze kwiga.

Yagarutse ku ishyirwa mu bikorwa rya SDGs

Perezida Kagame yavuze ko mu mwaka washize ibihugu byemeranyije amasezerano akomeye ku iterambere rirambye n’ihindagurika ry’ibihe, biniyemeza gufatanya kurwanya ubuhezanguni.

Yagize ati “Ibi ni ibibazo bikomeye ku Muryango Mpuzamahanga kandi imbaraga zacu zitanga amahirwe mu guhindura Isi yacu muri rusange, bitari igice kimwe. Nyuma y’ibyo, iterambere rya buri gihugu rihura bya hafi n’iry’ikindi cyose kandi twese dufite uruhare tugomba kubigiramo.”

Yahise avuga ko iki ari igihe cyo kubishyira mu bikorwa, kandi byashoboka ari uko hari ibintu bizirikanweho by’umwihariko.

Ati “Tugomba guhora tuzirikana ko ikigamijwe n’izi ntego ari uguhindura ubuzima bw’abaturage binyuze mu guteza imbere imibereho myiza yabo, umutekano no kugera ku mahirwe anyuranye. Icya kabiri ni ukubakira ku byo tumaze kwiga. Ibyo bivuze kudaheza uwo ariwe wese by’umwihariko abagore, kuko iyo batari kubasha gukoresha ubushobozi bifitemo, nta n’undi ubibasha muri twe.”

Perezida Kagame yavuze ko atewe ishema no kuba arangaje imbere ibindi bihugu muri gahunda ya HeforShe, aho yanasabye ibindi bihugu gushyigikira iyo gahunda.

Muri iyi gahunda u Rwanda ruyoboye ibindi kuko abagera ku bihumbi 150 bamaze gusinya bagaragaza ubushake bwo gushyigikira iterambere ry’umugore, ndetse iyi gahunda iheruka kwinjizwa no mu bikorera.

Yakomeje agira ati “Twize n’andi masomo, ko ikoranabuhanga rigomba kugira uruhare kugira ngo intego Isi yihaye zigerweho. Buri wese ku Isi akeneye kugera kuri internet,”

Perezida Kagame yavuze ko u Rwanda rwishimiye kuba rwarahawe icyicaro cy’ikigo kizakurikirana ishyirwa mu bikorwa rya SDGs muri Afurika, anavuga ko ayo masezerano yose ajyanye n’Isi “twifuza gusigira abana bacu”, ku buryo akwiye gushyirwa mu bikorwa mu buryo bwihuta kandi bigashyirwaho umutima.

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza