Perezida Kagame yagaragaje ko ibihugu bya Afurika bisa n’ibyibagiranye mu rugendo rwo gukingira COVID-19

Yanditswe na Iradukunda Serge
Kuya 18 Gashyantare 2021 saa 08:48
Yasuwe :
0 0

Perezida w’u Rwanda, Paul Kagame yagaragaje ko ibihugu bya Afurika biri inyuma cyane mu rugendo rwo gukingira Coronavirus, mu gihe ibindi bihugu bitandukanye ku Isi byo bigenda birushaho gukataza muri uru rugendo.

Ibi Perezida Kagame yabigarutse ku wa 17 Gashyantare 2021 mu kiganiro yagiranye n’umunyamakuru wa CNN Richard Quest umaze iminsi mu Rwanda. Iki kiganiro cyagarutse ku ngingo zitandukanye zirimo ibikorwa byo gukingira Coronavirus ku Isi, ingaruka zayo ku bukungu ndetse na Demokarasi.

Perezida Kagame yavuze ko kugeza ubu ibihugu byinshi bya Afurika bitari gukingira mu gihe ibindi bihugu bikataje muri uru rugendo.

Yagize ati "Turabona ibindi bice by’Isi bikingira twe ntiturabikora. Ntitwabonye inkingo nyinshi, ibyo bivuze ko tukiri inyuma kure ku murongo kandi uko mbibona bamwe mu bantu ntibari ku murongo na gato wo gushaka urwo rukingo."

Perezida Kagame yakomeje avuga ko u Rwanda rwo rwiteguye kuba rwakingira no kwakira urukingo urwari rwo rwose rwagaragaza ubushobozi.

Ati "Turi ku murongo turategereje. Tuzafata inkingo izo arizo zose zizaza kandi tukabwirwa ko zikora yaba Pfizer cyangwa Moderna, turashaka kubona zimwe muri zo vuba bishoboka."

Abajijwe n’umunyamakuru niba abona kuba ibihugu biteye imbere birimo Amerika bikataje mu gukingira mu gihe Afurika ikiri inyuma bizagira uruhare mu kongera ubukene, Perezida Kagame yavuze ko ariko abibona.

Perezida Kagame yavuze ko atari ubwa mbere Afurika yibagiranye mu bikorwa bitandukanye bihuriwe n’Isi ahanini biturutse k’uko igaragarira abantu.

Yavuze ko iki ari ikibazo Afurika yakunze guhura nacyo, ariko gikwiriye gukemurwa ibintu bikagenda neza.

Ku bijyanye n’ingaruka za COVID-19 ku bukungu, Perezida Kagame yavuze ko kimwe n’Isi yose u Rwanda narwo rwatangiye kubona izi ngaruka.

Ati "Twamaze kugirwaho ingaruka, turabibona tuvuye muri Guma mu rugo ya gatatu mu gihe cy’umwaka umwe, kandi ibikorwa by’ubucuruzi turabibona bisubira inyuma, urabona iterambere ry’ubukungu twari tumenyereye mu gihugu mu 2019 ubukungu bwacu bwateye imbere ku kigero cya 9.2% . Twateganyaga gukora neza kurushaho mu 2020 muri 2021 tukarushaho, ibyo byose byasubiye inyuma. Twatangiye kubona ingaruka zabyo turi guhangana nabyo."

Yavuze ko u Rwanda ruri gukora ibishoboka byose kugira ngo rubashe kurenga ibi bibazo rushyira mu bikorwa inama ruhabwa kandi runafatanya n’ibihugu bitandukanye ku Isi.

Si ubwa mbere Perezida Kagame agaragaza impungenge ku buryo inkingo za COVID-19 zikwirakwizwa mu Isi bigatuma ibihugu bikennye bitazibona.

Mu nyandiko ya Perezida Kagame yanyuze mu Kinyamakuru cya The Guardian, wa 7 Gashyantare 2021, yavuze ko gutinza kugeza inkingo za COVID-19 mu bihugu bikennye bifite ikiguzi kinini cyane.

Yavuze ko ibihugu byinshi bikize biri kwikubira inkingo bigatuma ibihugu bikennye bisigara inyuma mu rugendo rwo gukingira.

Ati "Ibihugu bikize n’ibikomeye ku Isi byihutiye gusaba inkingo nyinshi. Igiteye inkeke ni uko bimwe bibitse inkingo kandi bigura izindi doze nyinshi kurusha izo bikeneye. Ibi bituma ibihugu bya Afurika n’ibindi bikiri mu nzira y’iterambere biguma inyuma mu rugendo rwo kubona inkingo cyangwa bigasa nk’aho bitarebwa na byo burundu."

Yakomeje avuga ko uku kuba Afurika itari gukingira bizagira ingaruka ku Isi yose. Ati "Gutinza kugeza inkingo ku baturage b’ibihugu bikiri mu nzira y’iterambere bifite ikiguzi kinini cyane. Icyorezo kizakomeza kwerekana ubukana no guhungabanya ubukungu bw’Isi."

Kugeza ubu ibihugu bike ku Mugabane wa Afurika nibyo byatangiye ibikorwa byo gukingira COVID-19 kandi ibyinshi muri ibi birimo n’u Rwanda byatangaje ko umubare w’inkingo byabonye ari muto cyane ku buryo zizakingira abaturage bake.

Kuba hari ibihugu bikize biri kwikubira inkingo kandi byakunzwe kugaragaza n’Umunyamabanga Mukuru wa Loni, Antonio Guterres aho asaba ko inkingo za COVID-19 zitaharirwa ibihugu bikize gusa.

Perezida Kagame yagaragaje ko ibihugu bya Afurika bisa n'ibyibagiranye mu rugendo rwo gukingira Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .