00:00:00 IGIHE NETWORK KN KINYARWANDA EN ENGLISH FR FRANCAIS

Inkuru y’Urukundo rwa Howard G. Buffett n’u Rwanda

Yanditswe na Ndahayo Emmanuel
Kuya 9 Ugushyingo 2021 saa 07:41
Yasuwe :
0 0

Howard Graham Buffett w’imyaka 66 y’amavuko yigeze kuvuga ko “mu Rwanda ariho honyine muri Afurika” yakorera imishinga ye atekanye. Inshuti ye ikomeye, Perezida Kagame, nawe ubwo yamuvugagaho mu minsi ishize yavuze ko ubushuti afitanye n’u Rwanda bwahinduye ubuzima bwa benshi!

Mu muryango we, amafaranga si icyabuze. Ni ay’ibiragano byinshi kuko uhereye kuri sekuru Howard Homan Buffett ugakomeza ukagera kuri se Warren Buffett ubarirwa miliyari zirenga 100$ yakuye mu ishoramari ryo kugura imigabane mu bigo ikagenda imwungukira buhoro buhoro; bose bakoze ku mafaranga kera kandi arabayoboka.

Howard G. Buffett ni umwe mu nshuti z’u Rwanda itandukanye n’abandi. Yashoye imari mu mishinga y’ubuhinzi mu Rwanda n’iwabo muri Leta Zunze Ubumwe za Amerika.

Muri Illionois ahafite hegitari 650 z’ubutaka buhingwaho aho by’umwihariko zikorerwaho ubushakashatsi mu buhinzi yaba mu kugenzura imiterere y’ubutaka, ibijyanye no kuhira n’ibindi.

Atandukanye n’abandi bose kuko akora ibikorwa bye byo gufasha mu buryo butandukanye. Hari abakire benshi Isi ifite bihaye intego yo kurwanya indwara yaba izandura n’izitandura, ku buryo bo igihe cyose hari indwara yadutse bihutira gutanga ibinini.

Hari abandi bo ibikorwa byabo babikorera mu mishinga y’ubujyanama, ubuvugizi, kurwanya amakimbirane mu bihugu nk’ibi byacu ariko bakirengagiza ikintu kimwe gikomeye: Inkomoko yayo makimbirane ni ubukene.

Aho kurwanya ubwo bukene ngo bubake inganda zihesha abaturage imirimo, bashyira imbaraga mu gutanga amafaranga yo kuzishyura abunganizi mu mategeko cyangwa bagatangiza igikorwa cyo kurwanya amavunja aho guhanga imirimo ituma abantu babona amafaranga azababeshaho bo ubwabo bagaca ukubiri n’umwanda.

Buffet we si uko bimeze. Iyo yivuga yiyita Umunyarwanda, arufata nk’igihugu cye cya kabiri. Bituma ibikorwa byose ahakorera binyuze muri Foundation ye yamwitiriwe, yumva ko ari kubikorera iwe mu iterambere rusange.

Urukundo rwe n’u Rwanda rwatangiye mu myaka ya za 2000. Icyo gihe yageze mu gihugu bwa mbere, aganira n’ubuyobozi bukuru ku ngingo zigamije ubufatanye mu ngeri z’ubuhinzi no kubungabunga urusobe rw’ibinyabuzima.

Mu 2017 yigeze kuvuga ati “Twari twicaye munsi y’uyu musozi [avuga mu Kinigi]”.

Aho niho yatangiriye gukunda ingagi, ku buryo ubu mu Birunga ahafite ingagi yitwa ‘Umutware’.

Yakunze kuvuga ko mu Rwanda ariho honyine muri Afurika yakorera imishinga ye akumva atekanye

Akunda u Rwanda byimazeyo kugeza n’aho ashora imari mu mushinga wo kubaka umupaka uhuza u Rwanda na Repubulika Iharanira Demokarasi Congo.

Byaturutse ku kuba ibi bihugu byombi bihana imbibi, bifite urusobe rw’ibinyabuzima, uburyo bwo kuzibungabunga bukaba bugomba kujyana no guteza imbere uduce twaho.

We ubwe yatanze miliyoni 9$ maze mu 2017 hatahwa inyubako zigezweho zoroshya urujya n’uruza ku mupaka w’ibihugu byombi.

Buffett yakomereje imishinga ye y’ubuhinzi mu Rwanda kubera n’umubano mwiza afitanye n’ubuyobozi maze ahabwa ubutaka mu Ntara y’Iburasirazuba

Yahubatse ibikorwaremezo bifasha abaturage barenga 2000 kuhira hegitari zirenga 1.170, zihingwaho ibigori n’ibindi bihingwa.

Umusaruro w’ubu buhinzi bukorerwa kuri ubwo butaka bwuhirwa wikubye hafi kabiri, buva kuri toni eshanu kuri hegitari, bugera kuri hegitari hafi 10.

Mu 2015, Buffett yihaye intego yo kuzashora miliyoni 500$ mu bikorwa bijyanye no guteza imbere ubuhinzi, aho ayo mafaranga azagenda ashorwa mu byiciro bitandukanye.

Icyo gihe yavuze ko “U Rwanda ari kimwe mu bihugu bya Afurika bitera imbere ku muvuduko uri hejuru ndetse rukanakora amavugurura mu buhinzi.”

Ni we wagize uruhare mu gutangiza Kaminuza y’Ubuhinzi

Umuryango yashinze niwo wagize uruhare mu gutangiza mu Rwanda Ishuri Rikuru ry’Ubuhinzi n’Ubworozi (Rwanda Institute for Conservation Agriculture, RICA).

Intumbero yari uko abakora ubuhinzi baba babufiteho n’ubumenyi ku buryo guhinga bitaba gufata isuka, kurima no kuhira gusa, ahubwo hakabaho abahanga mu gukora ubushakashatsi ku mbuto, imyaka n’ibindi.

Buffett yigeze kuvuga ko “Urebye ubuso bw’u Rwanda, ukareba n’uburyo buri butaka bwose bushoboka bugomba gukoreshwa mu buhinzi” hakwiriye uburyo bushya bwo gukoramo ibintu.

Arateganya kubaka mu Rwanda Ikigo cya mbere cy’Ubushakashatsi mu by’Ubuhinzi, aho amakuru avuga ko gishobora kuzashorwamo arenga miliyoni 120$, kikazaba ari cyo cya mbere giteye gutyo muri Afurika.

Iki kigo kizaba gishinzwe gukora ubushakashatsi ku bibazo by’abahinzi cyane cyane abakorera ubuhinzi bwabo ku butaka buto, ari nabo bagize igice kinini cy’abakora umwuga w’ubuhinzi mu Rwanda bagize igice kinini cy’abafite ubushobozi bwo gukora mu Rwanda.

Iki kigo kizagenzurwa na Leta y’u Rwanda, gifite intego yo gutegura abanyeshuri bafite ubumenyi buhagije bazajyana mu bice bitandukanye by’igihugu, kugira ngo bakemure ibibazo bikigaragara mu buhinzi.

Kuri ubu hari gutegurwa abarimu bazigisha muri iki kigo mu minsi iri imbere, aho bari guhabwa ubumenyi bukarishye muri Leta Zunze Ubumwe za Amerika.

Umuryango wa Buffett ni umwe mu miryango yamaganye icyemezo cy’amahanga cyo guhagarikira u Rwanda inkunga ubwo rwashinjwaga gushyigikira M23.

Mu mwaka ushize, ubwo Perezida Kagame na Buffett batahaga umushinga wo kuhira wa Nasho, Perezida Kagame yavuze ko ubushiti bw’uyu mugabo n’u Rwanda burenze ubusanzwe, aho bwageze no mu bikorwa by’iterambere.

Yaragize ati “Ntabwo ngushimira gusa kuko ubucuti bwawe n’iki gihugu cy’u Rwanda, n’abantu bacyo ndetse nanjye ubwanjye. Ndagushimira no kubera ubu bufatanye, bwatanze umusaruro ufatika muri ubu buryo, aho ubuhinzi no kurengera urusobe rw’ibinyabuzima, byose byashyizwe hamwe kugira ngo bihindure ubuzima bw’abantu benshi.”

Buffet ni inshuti ikomeye ya Perezida Kagame. Umubano mwiza wabyariye imbuto n'abandi banyarwanda benshi binyuze mu mishinga y'uyu mugabo
Buffet afite mu Rwanda ingagi yise "Umutware"
Yashoye imari mu mishinga y'ubuhinzi ku buryo ubu abaturage b'i Nasho bafite uburyo bwo kuhira imyaka yabo
Buffet ubwo yasuraga abanyeshuri biga muri RICA, ishuri yagize uruhare mu ishingwa ryaryo
Abiga muri RICA bahabwa ubumenyi bubabashisha gukora ubuhinzi bujyanye n'igihe
Abiga muri RICA bakora ubushakashatsi ku bworozi ku buryo bukorwa neza bitandukanye n'ubwa gakondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .