Perezida Kagame yafunguye icyicaro gishya cya Carnegie Mellon University Africa i Masoro (Amafoto na Video)

Yanditswe na Rabbi Malo Umucunguzi
Kuya 21 Ugushyingo 2019 saa 11:53
Yasuwe :
0 0

Perezida Paul Kagame kuri uyu wa Kane yafunguye ku mugaragro icyicaro gishya cya Carnegie Mellon University, cyuzuye mu cyanya cyahariwe inganda i Masoro.

Iyi kaminuza yakoreraga i Kigali mu nyubako ya Telecom House ku Kacyiru, imaze kurangizamo abanyeshuri 196 bakomoka mu bihugu 19. Bari bavuye ku banyeshuri 20 batangiranye nayo mu 2012.

Yimukiye ahantu hihariye hagenewe kuzafasha Abanyarwanda n’abanyamahanga bafite impano zihariye kurushaho guhanga ibishya, binyuze mu mushinga wiswe Kigali Innovation City (KIC).

Iyo uri mu nyubako nshya y’iyi kaminuza uba witegeye Ikibuga cy’indege Mpuzamahanga cya Kigali giherereye i Kanombe, unabona inganda nyinshi ziri kubakwa kimwe nízamaze gutangira ibikorwa byazo.

KIC ni umwe mu mishinga y’u Rwanda igize icyerekezo 2020 ugamije kuzamura urwego rw’ikoranabuhanga mu gihugu, ukazatwara miliyari $2. Ugizwe n’inyubako zizacumbikira kaminuza mpuzamahanga, ibigo by’ikoranabuhanga, inyubako z’ubucuruzi n’ibindi, ukazubakwa ku buso bwa hegitari 70.

Carnegie Mellon University ibimburiye ibindi bigo bizaba bigize uyu mushinga, aho yujuje inyubako idasanzwe bibarwa ko yatwaye miliyoni hafi 10 z’amadolari.

Perezida Kagame yashimiye ubuyobozi bwa CMU bwagiriye icyizere u Rwanda, na buri wese wagize uruhare mu bufatanye bwatumye iyi kaminuza itangira mu Rwanda, bigizwemo uruhare n’abarimo MasterCard Foundation, Smart Africa, na Banki Nyafurika Itsira Amajyambere yatanze amafaranga yo kubaka iki cyicaro.

Yagaragaje ko ari amahirwe kuba aba banyeshuri bigira muri Afurika, ari nawo mugabane ufite ibibazo abarangiza hano bagomba gushakira umuti.

Amasomo atangirwa muri iyi kaminuza ni ajyanye n’ikoranabuhanga, mu cyiciro cya gatatu cya Kaminuza (Masters’ Degree) mu mashami arimo Electrical and Computer Engineering na Information Technology.

Umuyobozi Mukuru wa CMU Africa, Prof Vijayakumar Bhagavatula yavuze ko bishimishije kuba bimukiye mu cyicaro gishya.

Ni icyicaro gifite amashuri menshi kurushaho, byose bigamije gutuma nk’abanyeshuri bari mu Rwanda babasha kubona amasomo atangirwa mu mujyi wa Pittsburgh muri Leta ya Pennsylvania aho Carnegie Mellon University ifite icyicaro gikuru, ndetse n’abanyeshuri bari Pittsburgh bagafata amasomo yigishirizwa mu Rwanda.

Ati “Hari umwanya wafasha abashaka gukurikirana inzozi zabo mu bijyanye n’ikoranabuhanga, hari umwanya wagenewe Kigali Collaborative Research Center, ikigo cy’ubushakashatsi kigamije guhuriza hamwe abashakashatsi ba CMU Africa na CMU Pittsburgh n’ab’ahandi kugira ngo bakore ubushakashatsi ku bibazo bigaragara muri Afurika.”

“Iyi nyubako izadufasha kurushaho guhugura Abanyarwanda n’abanyeshuri b’abanyafurika ku bintu by’ingenzi mu ikoranabuhanga nka software engineering, ubwenge bw’ubukorano (Artificial Intelligence), mudasobwa, umutekano w’ikoranabuhanga n’ibijyanye n’ingufu.”

Minisitiri w’Uburezi, Dr Eugene Mutimura, yavuze ko CMU Africa imaze mu Rwanda igihe kitaragera ku myaka icumi, ariko umusaruro wayo umaze kuba mwinshi, ndetse mu bayizemo Abanyarwanda bihariye 51%.

Yavuze ko ubumenyi butangirwa muri iyi kaminuza ari ingenzi ku iterambere ry’imibereho n’ubukungu mu Rwanda na Afurika. Yavuze ko u Rwanda rwanamaze gushyiraho Ikigega gifasha abahanga udushya, ndetse uyu mushinga umaze gufasha inzego 15 mu nzego zitandukanye.

Perezida wa CMU, Farnam Jahanian, yashimiye Perezida Kagame ku miyoborere myiza akomeje kugaragaza, ari nayo yatumye umushinga wa Carnegie Mellon Africa ubasha kugerwaho.

Yakomeje ati “Ifungurwa ry’iki cyicaro gishya rigaragaza intambwe ikomeye kuri Carnegie Mellon mu Rwanda ndetse no ku Isi yose, inyubako ya mbere nk’iyi muri Kigali Innovation City izafasha abakozi ba CMU Africa ndetse n’abanyeshuri, kandi byihutishe iterambere mu bijyanye n’ikoranabuhanga ndetse na engineering.”

Yavuze ko uburezi ari ikintu cy’ingenzi muri sosiyete gituma habaho ugutera imbere kw’imibereho, ubukungu n’ibindi, ku buryo bijyanye n’ubukungu bwa none bwubatse ku bumenyi, uburezi ari ingenzi cyane, bikaba umwihariko iyo bigeze kuri Afurika.

Ibyo bikaba akarusho kubera ko binamaze kugaragara ko abitabira aya masomo ya CMU bamaze kwikuba gatatu kuva yatangira mu Rwanda, ndetse bigaragara ko abarangiza, nibura 90% by’abarangiza muri iyi kaminuza baguma muri Afurika, bakagira uruhare mu guteza imbere ikoranabuhanga muri uyu mugabane ndetse bakahashyira ishoramari ryabo.

Bibarwa kandi ko mu myaka nibura icumi iri imbere, abahanga mu ikoranabuhanga basaga 800 bazaba bamaze kurangiza muri CMU Africa, bakarushaho guteza imbere uyu mugabane, bagasanga abandi 120 000 barangije muri CMU bo mu bihugu 144.

Perezida Kagame na Perezida wa CMU, Farnam Jahanian bafungura icyicaro cy'iyi kaminuza muri Afurika
Byari ibyishimo bikomeye ku bayobozi bombi kubera intambwe itewe mu bikorwa bya Carnegie Mellon University muri Afurika
Abayobozi bafashe ifoto y'urwibutso nyuma yo gufungura iki cyicaro ku mugaragaro
Perezida Kagame amurikirwa bimwe mu byigishirizwa muri iyi kaminuza
Perezida Kagame na Perezida wa CMU Africa, Farnam Jahanian berekeza ahabereye ibiganiro nyuma yo gufungura iyi kaminuza ku mugaragaro
Umuyobozi w'Ikigo cy'Ubushakashatsi n'Iterambere ry'Inganda, NIRDA, Kampeta Sayinzoga aganira n'Umuyobozi Wungirije wa Kaminuza y'u Rwanda, Dr Charles Muligande mbere y'ko umuhango utangira
Abayobozi, abatumirwa, abakozi n'abanyeshuri ba CMU bagera ku cyicaro cyayo i Masoro
Iyi kaminuza yatangiye gukorera mu Rwanda mu 2011 ku bufatanye na Guverinoma y'u Rwanda
Meya w'Akarere ka Gasabo kubatsemo iyi kaminuza, Rwamurangwa Stephen, aganira n'abashyitsi
Umuyobozi Mukuru wungirije wa RDB, Zephanie Niyonkuru aganira na Minisitiri muri Perezidansi Uwizeye Judith
Iyi kaminuza imaze kunyuramo abanyeshuri baturuka mu bihugu 19
Komiseri Mukuru w'Ikigo cy'Imisoro n'Amahoro, RRA, Ruganintwali Pascal yitabiriye uyu muhango
Abanyeshuri ba CMU biga ikoranabuhanga ryo ku rwego rwo hejuru
Iyi kaminuza igaragaza ko imaze kugera kuri byinshi
Iyi kaminuza yubatswe mu cyanya cyahariwe inganda i Masoro
Umwe mu barimu ba Carnegie Mellon University Africa yerekana ikoranabuhanga ryigishwa
Perezida Kagame hamwe na Perezida wa CMU Africa, Farnam Jahanian
Perezida Kagame mu ifoto y'urwibutso hamwe n'abanyeshuri n'abakozi ba CMU Africa

Amafoto: Niyonzima Moise

Video: Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza