Kwamamaza

‘Perezida Kagame ni Baba wa Taifa’

Yanditswe kuya 23-08-2016 saa 17:50' na Ntakirutimana Deus


“Mu bihugu byose habaho umuntu bavuga ngo uyu ni ‘Father of the Nation’, ni ‘Baba wa Taifa’ [umubyeyi w’igihugu], ushyiraho imirongo bagenderaho.” Aya ni amagambo ya Minisitiri w’Umutekano, Sheihk Musa Fazil Harerimana, uhamya ko Perezida Kagame ari umuyobozi washyizeho umurongo uhamye n’abandi bazayobora u Rwanda bazagenderaho.

Sheihk Musa Fazil Harerimana, Umuyobozi w’Ishyaka Ntangarugero muri Demokarasi (PDI) mu kiganiro yagiranye na IGIHE ku bijyanye n’imyiteguro y’amashyaka mu matora ya Perezida wa Repubulika ateganyijwe mu mwaka utaha wa 2017, yashimangiye ko kugeza ubu Perezida Kagame amaze gukora ibikorwa bizahora iteka mu mateka y’u Rwanda.

Fazil yavuze ko kuva muri 2010 ishyaka rye ryatanze umukandida uzahatanira umwanya wa Perezida wa Repubulika muri 2017.

Ati “Twebwe muri PDI kuva mu 2010 twatanze umukandida, ibyo nta n’ubwo tuzabisubiramo mu nama nkuru yacu. Twasabye abaturage ngo muhindure Itegeko Nshinga, kugira ngo Perezida wa Repubulika Paul Kagame akomeze atuyobore kubera ubushobozi tumubonana n’ibyo aturusha. Abaturage barabyemeye bararihindura, ubwo rero twebwe nta n’inama tuzakora duhitamo undi mukandida, ni we mukandida wacu.”

Fazil asanga FPR idashobora kwitesha Perezida Kagame mu kumutanga nk’umukandida wiyamamariza kuyobora u Rwanda, gusa ngo biramutse bibaye PDI yatanga uwayo.

Ati “ FPR itamutanze ako kanya twahita tumutanga. Ariko se umukandida [Kagame] ufite amajwi asaga miliyoni enye [abasabye ko Itegeko Nshinga rivugururwa], bivuze ko uwamutanga wese yaba yizeye intsinzi ako kanya! Mu rwego rwa politiki iryo kosa ntibarikora [FPR].”

Ibiranga umuyobozi PDI yifuriza u Rwanda

Mu izina ry’ishyaka, Fazil yavuze ko umuyobozi mwiza ari umuntu wagaruye u Rwanda akarugira urw’Abanyarwanda bose bakaba abenegihugu badafite ivangura n’amacakubiri, badatoneshwa kandi badapyinagazwa, biyumvanamo, nta tonesha rigendeye ku idini, akarere cyangwa ubwoko.

Ati “Abanyarwanda bakeneye umuntu ubateza imbere. Reba ukuntu u Rwanda ruri gushimwa hirya no hino, abanyamahanga baraza kwigira hano mu Rwanda bibaza ukuntu mu Rwanda abantu bicanye kuriya ejo bundi, none bakaba bongeye gutera imbere mu myaka mike.”

Yongeyeho ko Abanyarwanda bifuza umuyobozi ureba kure akagira u Rwanda igicumbi gihuza kikanahuruza amahanga nkuko ruherutse kubyerekana ubwo rwakiraga Inama y’Umuryango w’Ubumwe bwa Afurika.

Ati “ Ni ibintu bikomeye, dukeneye perezida nk’uwo, Perezida ureba kure, ubanisha abanyarwanda, uteza imbere igihugu, kandi Perezida udatinya. Ubwo rero kuri twebwe arahari, Abanyarwanda baramuzi baramufite, nta mpamvu yo kumutakaza.”

Minisitiri w’Umutekano akaba n’Umuyobozi w’Ishyaka Ntangarugero muri Demokarasi (PDI), Sheihk Musa Fazil Harerimana

‘Baba wa Taifa’

Mu baperezida bamaze kuyobora u Rwanda, Fazil yabonyemo umwe yita umubyeyi w’igihugu, utazasimburwa uko ibihe bizasimburana.

Yabivuzeho ati “Nta muntu uzamusimbura [Kagame], hazaboneka uzaza ku buperezida, haboneke uza kwicara muri iyo ntebe, abe ari umuyobozi uyobora igihugu ariko agendere ku murongo washyizweho. Ubwo rero mu bihugu byose habaho umuntu bavuga ngo uyu ni Father of the Nation ni Baba wa Taifa, ushyiraho imirongo bagenderaho.”

Yakomeje avuga ngo muri Afurika y’Epfo, Perezida Jacob Zuma na Thabo Mbeki bose bagendeye ku murongo wa Nelson Mandela ndetse ko muri Leta Zunze ubumwe za Amerika abajyaho bose bagendera mu nkweto za George Washington na Abraham Lincoln.

Ati “Oya baje kuyobora ariko ntiwavuga ko baje kubasimbura, biratandukanye. Hari abaperezida baza bagashyiraho umurongo w’igihugu, bagashyiraho imisingi igihugu kigenderaho mu mibereho myiza, mu bukungu mu butabera ibyo byose bakabiha umurongo.

Kwicara ku ntebe yo mu Rugwiro nyuma ya Perezida Kagame ngo hari ukundi bizaba byitwa.

Ati “Ubwo rero ntabwo azaza avuga ngo nje gusimbura Kagame. Azaza aje kwicara mu ntebe, imyaka itanu irangire tumushime cyangwa tumugaye.”

Abayobozi nkabo baba barashyizeho umurongo ngenderwaho ngo basigara mu mitwe no mu mitima y’abantu ku buryo bahabwa agaciro n’ababasimbuye ndetse n’abaturage.

Ati “ Ni kwa kundi ubona mu bihugu byose, umuntu wahanze igihugu akagishyiriraho umurongo akakirokora, akagarura ubumwe bwabo akagiteza imbere; Perezida wese uyoboye araza, bagashyiraho ifoto ye n’iy’uwo. Izabo zikagenda zisumburana ariko uwo wagaruye igihugu akagishyira ku murongo, iye ntijya ivaho. Ubwo rero ntawe uzamusimbura ahubwo abo bazaza bazaba ari Abaperezida batuyobora ariko badahanga kandi badahuza Abanyarwanda kuko we azaba yarabirangije.”

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved