Kwamamaza

Perezida Kagame na Talon bagiranye ibiganiro byihariye (Amafoto)

Yanditswe kuya 30-08-2016 saa 21:43' na Philbert Girinema


Perezida Kagame yagiranye ibiganiro byihariye na mugenzi we wa Benin, Patrice Talon, uri mu ruzinduko rw’iminsi itatu mu Rwanda, barebera uko hakongerwa inzego z’imikoranire hagati y’ibihugu byombi.

Ku gicamunsi cyo kuri uyu wa Kabiri ni bwo Perezida Kagame yakiriye muri Village Urugwiro, Perezida Talon bagirana ibiganiro byihariye.

Ibi biganiro byari bigamije kureba izindi nzego ibihugu byombi byafatanyamo dore ko mu ntangiro za 2016, byashyize umukono ku masezerano y’ubufatanye agamije imikoranire myiza hagati ya Kompanyi z’indege zo muri byo.

Kuganira hagati y’aba bakuru b’ibihugu bikurikiye ubutumwa batanze ku mugoroba wo kuri uyu wa Mbere ubwo Perezida Kagame n’abandi bayobozi bakuru b’igihugu bakiraga Perezida Talon mu Rwanda.

Kuri uwo mugoroba, aba bakuru b’ibihugu bemeranyije ubufatanye butajegajega mu iterambere ry’abaturage b’ibihugu byombi.

Perezida Kagame yagize ati “Reka dukomeze gufatanya mu byiza ku bw’inyungu z’abaturage bacu n’Isi muri rusange. Vuba aha RwandAir izatangira kwerekeza i Cotonou, nta gushidikanya ko iki ari ikimenyetso cy’ubufatanye bwiza tuzakomeza kubaka. Nta rwitwazo dufite rwo kudasurana kenshi.”

Perezida Talon yashimangiye ko ubufatanye bushingiye ku gusangira amahirwe ari muri buri gihugu buzagira akamaro, kandi yizeye ko ubufatanye bw’u Rwanda na Benin buzaba intangarugero.

Kuba u Rwanda ari kimwe mu bihugu by’intangarugero muri Afurika, rwafashe iya mbere rugakuraho Viza ku Banyafurika bashaka kuruzamo byatumye na Perezida Talon afata umwanzuro nk’uwo ku gihugu cye.

Yagize ati “U Rwanda ni igihugu cyorohereje Abanyafurika kukijyamo batagombye kwaka Viza ni ibintu bishimishije cyane, siniyumvisha ukuntu ari byiza kubona Abanyafurika bagenda mu gihugu nk’abajya iwabo. Uru rugero rwiza rutumye mfata icyemezo ko Benin itazongera kwaka viza abandi Banyafurika.”

Perezida Talon azasoza uruzinduko rwe mu Rwanda kuri uyu wa Gatatu nyuma y’ikiganiro azagirana n’Abanyamakuru.

Perezida Patrice Talon yatangiye kuyobora Benin kuva ku ya 6 Mata 2016. Yari asanzwe ari umucuruzi ukomeye mbere yo kwinjira muri politiki, ndetse mu gihugu afatwa nk’ ‘Umwami w’Ipamba’ kubera uruhare rwe mu guteza imbere inganda ziritunganya.

Perezida Talon ahabwa ikaze muri Village Urugwiro
Perezida Kagame yakira Talon muri Village Urugwiro
Ba Minisitiri b’Ububanyi n’Amahanga b’Ibihugu byombi, Aurelien Agbenonci na Louise Mushikiwabo bari bahari ubwo Perezida Kagame yaganiraga na mugenzi we Patrice Talon
Perezida Kaame na mugenzi we Talon barebeye hamwe inzego z'ubufatanye zashyirwamo ingufu
Abayobozi batandukanye bitabiriye ibi biganiro
Nyuma y'ibiganiro, Perezida Kagame asezera kuri Talon; hafi aho hari Ambasaderi w'u Rwanda muri Benin, Stanislas Kamanzi

Amafoto: Village Urugwiro


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 September 2016
Copyright © 2009 -2014 - IGIHE Ltd - All Rights Reserved