Perezida Kagame mu bayobozi ba Afurika baganiriye na Netanyahu i New York (Amafoto)

Yanditswe na Philbert Girinema
Kuya 23 Nzeri 2016 saa 12:42
Yasuwe : XX
0

Mu nama y’Inteko rusange y’Umuryango w’Abibumbye ibera i New York muri Leta Zunze Ubumwe za Amerika, Minisitiri w’Intebe wa Israel, Benjamin Netanyahu, yaraye aganiriye n’abayobozi ba Afurika bayitabiriye baganira ku mishinga y’iki gihugu muri Afurika no mu bihugu bikiri mu nzira y’amajyambere.

Umubano wa Israel na Afurika muri iyi minsi ni ntamakemwa. Ibi bishimangirwa n’uruzinduko rw’amateka Minisitiri w’Intebe Netanyahu aherutse kugirira kuri uyu mugabane muri Nyakanga uyu mwaka nyuma y’imyaka irenga 20 nta mu Minisitiri w’Intebe wa Israel uwukandagizaho ikirenge.

Perezida Kagame ni umwe mu bayobozi Minisitiri w’Intebe Netanyahu yabwiye ko bashishikajwe no gukorana na Afurika.

Yagize ati “Dushimishwa no guhoza Afurika mu ntekerezo zacu, turashaka kugira ubucuti n’ubufatanye na buri umwe mu bihugu byanyu.”

Nkuko The Jerusalem Post ibitangaza, Minisitiri w’Intebe Netanyahu na Ambasaderi wa Israel mu muryango w’Abibumbye, Danny Danon bagaragarije abakuru b’ibihugu bya Afurika n’ibikiri mu nzira y’amajyambere aho iterambere ry’ikoranabuhanga muri Israel rigeze.

Netanyahu yavuze ko yizera ko hari ikintu gikomeye Israel yafasha Afurika.

Yagize ati“ Ikoranabuhanga ryahinduye buri kintu kandi rifitanye isano n’ibintu byinshi; ubuzima, ubuhinzi; uburezi n’ibindi byinshi. Turashaka gusangiza Isi yose ubumenyi bwacu n’ikoranabuhanga.”

Umuyobozi wa Sosiyete y’Abanya-Israel ikwirakwiza ingufu zituruka ku mirasire y’izuba, Energyia Global Capital, Yosef Abramowitz, yavuze ko bashaka ko urumuri rushya rurarabagirana no hanze ya Siyoni.

Yagize ati“Hari miliyoni 600 z’abaturage muri Afurika badafite amashanyarazi n’izindi miliyoni 200 zikoresha mazutu yanduye kandi ihenze.”

Kuva muri Nyakanga 2015, Energyia Global Capital, ikorera mu Rwanda, ifite intego yo kuba muri 2020 yafashije miliyoni 50 z’abaturage ku Isi kubona amashanyarazi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza