Kwamamaza

Perezida Kagame aratangiza ku mugaragaro umwaka w’Ubucamanza 2016/2017

Yanditswe kuya 10-10-2016 saa 10:27' na Cyprien Niyomwungeri


Perezida wa Repubulika Paul Kagame aratangiza umwaka w’Ubucamanza kuri uyu wa Mbere tariki 10 Ukwakira 2016, nk’umwanya abacamanza n’abanditsi b’Inkiko baba babonye ngo bagaragaze ibyo bagezeho bityo barusheho kunoza umwuga wabo mu myaka ikurikira.

Uyu muhango urabera mu ngoro y’Inteko ishinga amategeko mu cyumba cy’Inteko Rusange cy’Umutwe w’Abadepite.

Umwaka ushize Perezida Kagame yakanguriye Abanyarwanda kwihesha agaciro bitandukanya n’Ubutabera Mpuzamahanga akenshi bukunze kubogama, avuga ko u Rwanda rudakwiye kuba mu bumva ko bari hasi y’abandi.

Umwaka w’Ubucamanza mu Rwanda uba n’umwanya wo kugaragaza ibyo uru rwego ruba rwaragezeho mu mwaka ushize.

Umwaka ushize wa 2015/2016, ubucamanza bw’u Rwanda bwabashije kugera kuri byinshi bwari bwiyemeje yaba mu gutanga serivisi, gutanga ubutabera ku gihe kandi bwiza.

Mu rwego rwo gutanga serivisi nziza kandi zihuse, raporo y’ibikorwa by’inkiko igaragaza ko umwaka ushize abantu nibura babonaga serivisi basabye mu munsi umwe, ibi bikaba byaragezweho bitewe no gukoresha ikoranabuhanga muri serivisi z’ubutabera.

Ikoranabuhanga ryagabanyije abatwara ibirego ku nkiko mu buryo bw’impapuro, aho kuri ubu babarirwa kuri 2.4% naho abatanze ibirego bifashishije ikoranabuhanga bagera kuri 73% bavuye kuri 61.2% umwaka wabanje.

Icyakora hari serivisi bigaragara ko zigisiragiza abaturage ku nkiko nk’incarubanza ku kigero cya 39.93%, icyemezo kigaragaza ko umuntu atajuriye ku kigero cya 17.17%.

Gukoresha ikoranabuhanga mu butabera byanatumye uru rwego rutsindira igihembo cya AAPAM (African Association for Public Administration and Management) mu marushanwa yabereye muri Zambia muri Gashyantare uyu mwaka ku guhanga udushya tugamije guteza imbere serivisi zihabwa abaturage.

Mu bijyanye no gutanga ubutabera ku gihe, mu myaka itanu ishize imanza zakererewe zaragabanutse ku buryo bufatika. Muri 2011/2012, ibirego byari bitegereje kuburanishwa byari 42670 muri 2015/2016 ni 17231. Ibirego byakererewe byari 18416 muri 2011/2012, mu mwaka ushize ni 5508 gusa.

Mu rukiko rw’ikirenga ikirego gishya cyamaraga imyaka 5.5 kugira ngo kiburanishwe muri 2011/2012, ubu kimara amezi 20 gusa. Mu rukiko rw’ibanze cyavuye ku mezi atanu ubu ni amezi atatu.

Muri 2015/2016, ibirego byajuririwe byari 10.77% bivuye kuri 14% mu mwaka wari wabanje.

Raporo y’ubushakashatsi bwakozwe n’Ikigo cy’Igihugu cy’Imiyoborere muri 2015, yagaragaje ko abanyarwanda bafitiye icyizere ubutabera ku kigero cya 88.2%. Global Competitiveness Index yakozwe n’Umuryango Mpuzamahanga mu by’ubukungu WEF 2015-2016, igaragaza ko ubutabera bw’u Rwanda ari ubwa 26 mu bihugu 140, bukaba ubwa kabiri muri Afurika nyuma y’ubwa Afurika y’Epfo.

Imbogamizi ku butabera bw’u Rwanda

Nubwo ubutabera bw’u Rwanda bigaragara ko bwateye imbere, hari imbogamizi zituma butagera ku rwego bwifuza.

Imbogamizi ya mbere ni internet kuko mu nkiko 60 z’ibanze, 27 zonyine nizo zifite internet, ibi bituma ikoranabuhanga ridakoreshwa mu gutanga serivisi.

Ibikorwa remezo bishaje aho usanga inkiko zikorera mu nzu zubatswe mu myaka myinshi ishize.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved