Kwamamaza

Perezida Kagame agiye kwigenzurira imihigo mu buryo butari bumenyerewe

Yanditswe kuya 10-09-2016 saa 00:46' na Cyprien Niyomwungeri


Perezida Kagame yavuze ko imihigo yakagombye kuba ihindura ubuzima bw’Abanyarwanda aho guhindura ubw’umuntu umwe, yiyemeza kujya ayigenzurura ashingiye ku mpinduka zigaragarira amaso iyo mihigo yagejeje ku baturage.

Umukuru w’Igihugu yabigarutseho mu muhango wo kwesa imihigo ya 2015/2016 no guhiga iya 2016/2017, wabaye kuri uyu wa Gatanu mu nyubako Kigali Convention Centre.

Perezida Kagame yavuze ko abayobozi bakwiye kwiyumvisha ko batikorera nk’abayobozi ngo batere imbere bo ubwabo, abasaba kujya bisanisha n’abaturage baba babatezeho amakiriro.

Yagize ati “Ntabwo twikorera ku giti cyacu nk’abayobozi, jya wibaza uti ariko niba nari umuturage usanzwe hariya mu cyaro ugerageza kubaho, ushaka ubuzima, imyigire y’abana, umutekano [...] abayobozi muri hano muramutse mwishyize muri uwo mwanya ibintu byahinduka.”

Umukuru w’Igihugu yongeyeho ko abayobozi n’abaturage bakwiye kumva ko igipimo cy’imihigo atari ibihembo ahubwo ari umuturage ukwiriye guhindurira ubuzima.

Yagize ati “Umuyobozi uyobora nkuko twabyumvise urabibona, uyu munsi nshobora kujya mu muhanda nkajya mu modoka nkanyura ahantu nagera aho ngera nshobora kwicara nkatanga ya manota, nkavuga aha hantu ibintu nabonye, abana nabonye ku muhanda uko basa cyangwa uko batagiye kwiga cyangwa ko bashonje.”

Perezida Kagame yashimangiye ko ubutaha hari uburyo azajya yigenzurira imihigo akoresheje amaso ye, kuko impinduka zigaragagaza.

Ati “Minisitiri w’Intebe ubutaha ndagusezeranya njye rwose njye nzafata imodoka ngende mu turere mu muhanda gusa ngende ntanga amanota namwe mujye muri bya bindi byanyu..hanyuma niturangiza twicare, muzasanga bihura.”

Yasabye abayobozi kumva ko nta nzira y’ubusamo ihari yo kugera ku iterambere, bityo bagomba gutanga ibisabwa byose ngo barigereho kuko ntawe ushobora kwicara ngo ahinge mu cyifuzo gusa imyaka yere asarure.

Mu mihigo ya 2015/2016 Akarere ka Gasabo ni ko kaje ku isonga mu kwesa imihigo n’amanota 81.2%, aka Musanze kaherekeje utundi n’amanota 70.37%.

Perezida Kagame na Minisitiri Kaboneka bashyikiriza igikombe Rwamulangwa Stephen, Meya wa Gasabo
Perezida Kagame ageza ijambo ku bayobozi bari bitabiriye isinywa ry'imihigo y'abayobozi b'Uturere
Minisitiri w'Intebe, Anastase Murekezi ageza ijambo ku bitabiriye uyu muhango

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved