Kwamamaza

Perezida Kagame agiye guhura n’intiti zizamufasha kuvugurura Komisiyo ya AU

Yanditswe kuya 26-10-2016 saa 10:49' na Cyprien Niyomwungeri


Perezida Kagame n’itsinda ry’abantu icyenda bazamufasha kuvugurura Komisiyo y’Umuryango wa Afurika, AU, biteganyijwe ko bazahurira i Kigali kuwa Mbere tariki 31 Ukwakira 2016.

Izo ntiti zirimo izazobereye mu bukungu, politiki, ubucuruzi ku mugabane wa Afurika zituruka mu nzego za Leta n’iz’abikorera. Itangazo rya Perezidansi y’u Rwanda ryo kuwa 18 Ukwakira 2016, rivuga ku nshuro ya mbere iryo tsinda rizahura n’Umukuru w’Igihugu mu cyumweru gitaha.

Abazahura na Perezida Kagame ni Dr.Donald Kaberuka wahoze ayobora Banki Nyafurika Itsura Amajyambere, Acha Leke, Umuhanga mu bukungu, Rwiyemezamirimo w’Umuherwe akaba n’Umugiraneza w’Umunya-Zimbabwe Strive Masiyiwa ndetse, Umunya-Guinée-Bissau, Dr.Carlos Lopes wari Umunyamabanga Mukuru Wungirije w’Umuryango w’Abibumbye akaba n’Umunyamabanga Nshingwabikorwa wa Komisiyo y’Ubukungu ya Afurika.

Hari kandi Cristina Duarte, wahoze ari Minisitiri ushinzwe Imari n’Igenamigambi muri Cap Vert, Mariam Mahamat Nour, Minisitiri ushinzwe Ubukungu, Igenamigambi ndetse n’Ubutwererane Mpuzamahanga muri Tchad.

Perezida Kagame yatoranyije kandi Vera Songwe, Umuyobozi Mukuru w’Ishami rya Banki y’Isi rishinzwe ubukungu muri Afurika y’Iburengerazuba n’iyo hagati , Amina J. Mohammed wabaye Umujyanama udasanzwe w’Umunyamabanga Mukuru wa Loni ku bijyanye n’intego z’ikinyagihumbi na Tito Mboweni, wahoze ari Guverineri Mukuru wa Banki Nkuru ya Afurika y’Epfo.

Inama ya 27 y’Umuryango wa Afurika Yunze Ubumwe, AU, yabereye mu Rwanda kuva kuwa 10 kugera ku ya 18 Nyakanga 2016, yahaye Perezida Kagame inshingano zo gutegura impinduka muri Komisiyo y’Umuryango wa Afurika Yunze Ubumwe, AU, ibizagerwaho bikazashyikirizwa inama y’abakuru b’ibihugu izaba muri Mutarama 2017.

Kuvugurura imikorere ya Komisiyo ya AU n’izindi nzego, byagaragajwe mu nama yo muri Mutarama 2016, kugira ngo imikorere yayo ijyane n’ibiteganywa mu cyerekezo 2063 Afurika yihaye.

Amavugurura azakorwa mu miyoborere n’imikorere ya AU, azasobanura neza inshingano n’imikorere z’umuryango, ku buryo hagendewe kuri gahunda zihari n’abakozi bawo bashobora kwiyongera.

Hazavugururwa kandi amabwiriza agenga abakozi ba Komisiyo ya AU, uburyo bwo gupima uko inzego zigera ku byo ziyemeje, igenzura ry’imbere no hanze y’uru rwego [audit], kunoza gahunda y’uburyo abayobozi bakora ingendo, uburyo bwo gutanga amasoko n’andi mabwiriza ngenderwaho, hagamijwe ko ubushobozi buhari bukoreshwa neza.

Inkuru bifitanye isano:

- Perezida Kagame yahawe gukurikirana amavugurura ya komisiyo ya AU

- Kaberuka na Lopes mu ntiti ziri gufasha Perezida Kagame kuvugurura Komisiyo ya AU

- Kagame agiye kongera abagore batatu mu ntiti zizamufasha kuvugurura Komisiyo ya AU

Perezida Kagame yashyizeho intiti zizamufasha gukora ivugurura muri Komisiyo y'Umuryango wa Afurika Yunze Ubumwe
Uhereye hejuru ibumoso, Dr Acha Leke, Cristina Duarte, Dr Donald Kaberuka, Dr Carlos Lopes, Mariam Mahamat Nour, Amina J. Mohammed, Strive Masiyiwa, Tito Mboweni, Vera Songwe bashyizwe ku rutonde rwo kuvugura Komisiyo ya AU

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved