Perezida Alassane Ouattara yasuye Urwibutso rwa Jenoside rwa Kigali (Amafoto)

Yanditswe na Rabbi Malo Umucunguzi
Kuya 26 Mata 2018 saa 07:19
Yasuwe :
0 0

Perezida Alassane Dramane Ouattara wa Côte d’Ivoire yunamiye inzirakarengane za Jenoside yakorewe Abatutsi zishyinguye mu Rwibutso rwa Jenoside rwa Kigali, ku munsi wa mbere w’uruzinduko ari kugirira mu Rwanda.

Perezida Ouattara ari mu Rwanda aho yitabiriye inama y’iminsi itatu ya Mo Ibrahim Governance Weekend, igomba gutangirwamo igihembo cyitiriwe Mo Ibrahim kizashyikirizwa Ellen Johnson Sirleaf uheruka gusimburwa nka Perezida wa Liberia, ku wa Gatanu tariki ya 27 Mata 2018.

Uyu muyobozi yageze ku Rwibutso rwa Jenoside rwa Kigali ruri ku Gisozi ahagana 16:15, abanza gusobanurirwa imiterere yarwo n’amateka rubitse, aho rushyinguwemo imibiri isaga ibihumbi 250.

Nyuma yo kuruzenguruka no gusobanurirwa byinshi kuri Jenoside yakorewe Abatutsi, uyu muyobozi yavuze ko ababajwe n’amateka yagwiriye Abanyarwanda, asaba ko hakorwa ibishoboka ngo ibyabaye bitazagira ahandi biba.

Yagize “Ni ibintu bibabaje, nkaba nihanganisha Abanyarwanda kandi nifatanyije nabo. Nifuza ko iki gihugu cyakomeza kwiyubaka kandi ibyabaye ntibizasubire, ntihazagire n’umuntu uwo ariwe wese unyura mu bintu nk’ibyababayeho.”

Perezida Ouattara yageze mu murwa mukuru w’u Rwanda mu ma saa moya z’ijoro ryo ku wa Gatatu aho yavuze ati “nzitabira umuhango wo gushyikiriza igihembo cya Mo Ibrahim inshuti yanjye n’uwahoze ayobora Liberia, Madamu Ellen Johnson Sirleaf.”

Ibiro bya Perezida wa Côte d’Ivoire biheruka kwemeza ko azaba ari i Kigali guhera ku wa 25 kugeza ku wa 27 Mata 2018, aho yageze mu Rwanda avuye mu zindi ngendo muri Koweït no mu Bufaransa. Biteganyijwe ko azagirana ikiganiro na Perezida Kagame.

Perezida Alassane Ouatara yunamiye abishwe Jenoside yakorewe Abatutsi baruhukiye mu Rwibutso rwa Jenoside rwa Kigali
Perezida Ouatara yasobanuriwe byimbitse amateka ya Jenoside yakorewe Abatutsi
Hifashihwe n'amashusho mu gusobanurira amateka Perezida Ouatara
Umunyamabanga Nshingwabikorwa wa Komisiyo y'Igihugu yo kurwanya Jenoside (CNLG), Dr Bizimana Jean Damascène
Perezida Alassane Ouatara yitegereje neza amateka ya Jenoside
Perezida Ouatara yiboneye n'uko abicanyi muri Jenoside batagiriraga impuhwe umwana
Perezida Alassane Ouattara yatanze ubutumwa bw'ihumure nyuma yo gusura uru rwibutso

Reba andi mafoto unyuze hano

Amafoto : Moses Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza