Paul Barril, umucanshuro w’Umufaransa wigize ashwi kandi amaraso y’inzirakarengane z’Abatutsi amuri ku ntoki

Yanditswe na Musangwa Arthur
Kuya 9 Gashyantare 2021 saa 07:27
Yasuwe :
0 0

Izina Paul Barril si rishya mu matwi y’Abanyarwanda n’abandi bakurikiranira hafi amateka ya Jenoside yakorewe Abatutsi mu 1994, biturutse ku ruhare rugarira amaso ya rubanda yayigizemo nubwo akomeje kurwitarutsa yigira nyoni nyinshi.

Captain Paul Barril ni umujandarume w’Umufaransa, mu gihe cy’imyaka ibiri yayoboye umutwe wihariye ubarizwa muri gendermerie uzwi nka Groupe d’intervention de la gendarmerie nationale (GIGN).

Uyu mutwe ufite inshingano zo kurwanya iterabwoba, kubohoza imbohe zishobora gufatwa bugwate ku nyungu runaka, kugenzura igishobora kubangamira umutekano w’igihugu no kurinda abayobozi bakuru muri Guverinoma y’u Bufaransa.

Ubwo u Bufaransa bwayoborwaga na François Mitterrand guhera mu 1981 kugeza mu 1995, uyu mugabo w’imyaka 75 ari mu bagize uruhare rukomeye mu ishingwa ry’umutwe ushinzwe gukumira ibitero by’iterabwoba bishobora kwibasira ibiro bya Perezida mu Bufaransa.

Paul Barril benshi bemeza ko yari mudahusha udasanzwe aya mateka ye yaje kuyandurisha amabi yakoreye mu Rwanda haba mbere ya Jenoside binyuze mu bikorwa yakoranaga na Leta ya Juvenal Hayarimana ndetse no mu gihe cya Jenoside yakorewe Abatutsi mu 1994.

Mu 2016 Paul Barril yasohotse ku rutonde rw’abasirikare 22 b’u Bufaransa bashinjwa uruhare muri Jenoside yakorewe Abatutsi, haba mu kuyitegura no kuyishyira mu bikorwa.

Umubano we na Leta ya Habyarimana

Paul Barril yakoranye bya hafi na Leta ya Perezida Juvenal Habyarimana. Mu 1989 yakoranye n’iyi leta mu bijyanye no kuvugurura inzego z’iperereza z’u Rwanda, ndetse mu 1990, mbere y’uko FPR itangira urugamba rwo kubohora igihugu, uyu mugabo yakoze igenzura ry’Ingabo z’u Rwanda. Uretse ibi mu bihe bitandukanye yagiye yivugira ko yari umujyanama wa Perezida Habyarimana.

Mu nyandiko umwanditsi w’ibitabo akaba n’umushakashatsi ku mateka ya Jenoside yakorewe Abatutsi mu 1994, Dr Bizimana Jean Damascène yashyize hanze agaragaza uruhare rwa Paul Barril muri Jenoside yakorewe Abatutsi, yavuze ko mu 1989 uyu mugabo yari yaratangiye ubucuruzi bw’intwaro na Leta ya Habyarimana abinyujije mu kigo cye cyakoraga imirimo y’ubucanshuro cyizwi nka ‘Secrets.’

Iki kigo cya Secrets ni nacyo umugore wa Habyarimana, Agathe Kanziga Habyarimana yahaye akazi ko kumukorera iperereza ku rupfu rw’umugabo we, ari naho uyu mugabo yahereye arugereka kuri RPF Inkotanyi.

Dr Bizimana agaragaza ko mu Ugushyingo Paul Barril yoherereje Colonel Athanase Gasake wakomokaga mu Ruhengeri akaba umwe mu bari bagize Akazu, fagitire ebyiri zijyanye no kugurisha Leta ya Habyarimana ibikoresho bya gisirikare.

Mu 1990 Paul Barril yatangiye gukorana n’inzego z’iperereza z’u Rwanda mu buryo bwuzuye. Yari afitanye umubano wihariye n’uwahoze ari Umunyamabanga muri Ambasade y’u Rwanda mu Busuwisi, Fabien Singaye, gusa mu by’ukuri uyu Singaye yari maneko ya leta ishizwe kugenza ibikorwa by’impunzi z’Abatutsi mu mahanga, cyane ko mu 1994 yaje kwirukanwa n’u Busuwisi kubera izi mpamvu. Uyu Singaye ni n’umukwe wa Félicien Kavuga uherutse gutwabwa muri yombi.

Muri iyi nyandiko Dr Bizimana agaragaza ko ku wa 23 Kanama 1991 Singaye yandikiye ibaruwa Barril ashimangira ubufatanye bwabo mu bijyanye n’iperereza. Aha Singaye yavugaga ko Barril azafasha Leta gusenya RPF.

Nyuma y’igihe bari muri ubu bufatanye, mu 1993 Colonel Elie Sagatwa wari Umujyanama wa Perezida Habyarimana yandikiye Barril amushimira kubera ubufasha akomeje guha Leta.

Mbere gato y’uko Jenoside yakorewe Abatutsi itangira ngo Paul Barril yagiye asura u Rwanda inshuro nyinshi, bamwe bakemeza ko yari muri gahunda yo kunoza uko izakorwa.

Richard Mugenzi wari ushinzwe itumanaho mu ngabo z’icyo gihe (EX-FAR) yavuze ko mu Ukuboza 1993 yiboneye Barril n’amaso ye mu Rwanda.

Ati “Nabonye uyu musirikare wari utandukanye n’abandi. Narabajije bambwira ko izina rye ari Barril. Yari ari kumwe n’abandi bambaye nkawe.”
Uretse mugenzi, n’umupilote wa Habyarimana w’Umufaransa witwa Jacky Heraud yavuze ko yiboneye Barril ku Kibuga cy’indege cya Kigali mu mpera za Werurwe 1994.

Uruhare rwe muri Jenoside

Amakuru afitiwe gihamya agaragaza ko Paul Barril yari i Kigali mu ijoro ryo ku wa 6 rishyira ku wa 7 Mata mu 1994 ubwo indege ya Perezida Habyarimana yahanurwaga nubwo we akomeje kwigira ashwi avuga ko atari ahari.

Uretse gukorana na Leta ya Habyarimana, Barril avugwaho no kuba yaragize uruhare muri Jenoside yakorewe Abatutsi mu buryo butaziguye.

Avugwaho uruhare rukomeye ku bwicanyi bwakorewe Abagogwe cyane ko mu 1993 yafashije mu gutoza itsinda ryihariye rya EX-FAR ryari rishinzwe ubushakashatsi bwimbitse, ndetse n’interahamwe zitwaga “Turihose”, ubufasha buzwi nka “Insecticide”, rigahuzwa no kuba Abatutsi baritwaga “Inyenzi” icyo gihe.

Mu myitozo yabahaye harimo ijyanye n’uburyo butandukanye bwo kurasa, kwica abantu benshi mu gihe gito, ukoresheje imbunda cyangwa izindi ntwaro gakondo zirimo ibyuma.

Mu 1994 kandi Barril yasinye ku masezerano yo gutanga intwaro n’ubufasha bw’amaboko bifite agaciro ka miliyoni eshatu z’amadolari, hagati y’u Bufaransa na guverinoma y’u Rwanda yakoze Jenoside. Ni amasezerano yabayeho kuwa 28 Gicurasi 1994, Barril yasinyanye na Guverinoma y’abatabazi.

Aya masezerano yagenaga ko Paul Barril agomba koherereza Guverinoma y’Abatabazi abacancuro 20 bazatoza ex-FAR n’interahamwe, kandi akazabaha ibikoresho birimo amasasu y’imbunda zo mu bwoko bwa Kalashnikov na Machine gun na gerenade.

Inyandiko zitandukanye kandi zigaragaza ko Barril yakomeje gukorana n’abahoze muri ex-FAR na nyuma ya Jenoside yakorewe Abatutsi bari mu mugambi wo kongera gutera u Rwanda.

Uyu mugabo wari umusirikare w’Umufaransa, kuva mu 2013 ari gukorwaho iperereza n’urukiko rw’i Paris ku ruhare yaba yaragize muri Jenoside yahitanye abatutsi basaga miliyoni. Kuwa 3 Ugushyingo 2020, Agathe Kanziga Habyarimana yagaragaye mu rukiko rw’i Paris nk’umwe mu batangabuhamya bashinjura Paul Barril, byongera gushimangira umubano wihariye yari afitanye na Habyarimana.

Ibi byabyukije amarangamutima y’abazi uruhare rw’aba bantu bombi muri Jenoside yakorewe Abatutsi mu 1994, batangira gusaba ko bose bakwiye kugezwa imbere y’ubutabera bagakurikiranwa ku mabi bakoze.

Uyu mugabo yari afite ikigo gikora imirimo y'ubucanshuro kizwi nka Secrets ari nacyo Agathe Kanziga Habyarimana yahaye akazi ko kumukorera iperereza ku rupfu rw'umugabo we
Paul Barril wakoze mu nzego z'umutekano z'u Bufaransa akekwaho kugira uruhare muri Jenoside yakorewe Abatutsi mu 1994
Mu 2014 ubwo Polisi yari igiye guta muri yombi Paul Barril imusanze mu rugo rwe aha yaganiraga n'umunyamategeko we
Aha ni mu 2020 ubwo Agathe Habyarimana yitabaga urukiko rw'i Paris nk'umutangabuhamya mu rubanza ashinjura Paul Barril

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .