Patricia Campbell wagizwe Umuyobozi w’Icyubahiro wa Kaminuza y’u Rwanda ni muntu ki?

Yanditswe na Ferdinand Maniraguha
Kuya 16 Nzeri 2018 saa 03:23
Yasuwe :
0 0

Inama y’abaminisitiri idasanzwe yateranye kuwa Gatanu tariki 14 Nzeri 2018, yagize Patricia Campbell umuyobozi w’icyubahiro (Chancellor) mushya wa Kaminuza y’u Rwanda.

Campbell asimbuye Dr Mike O’Neil wari umuyobozi w’icyubahiro wa Kaminuza y’u Rwanda kuva mu 2014.

Ubusanzwe abayobozi b’icyubahiro ba Kaminuza y’u Rwanda bagira manda y’imyaka ine.

Campbel asanzwe ari Visi Perezida ushizwe ibikorwa muri Kaminuza ya Tufts iherereye i Massachusetts muri Leta Zunze Ubumwe za Amerika.

Umuyobozi wungirije wa Kaminuza y’u Rwanda ushinzwe Igenamigambi n’Imiyoborere, Dr Musafiri Papias Malimba yabwiye IGIHE ko bishimiye Campbell kandi bamwitezeho byinshi nk’umuntu umaze igihe mu bijyanye n’imiyoborere ya Kaminuza.

Yagize ati “Twamwakiriye neza kuko afite ubunararibonye mu buyobozi bwa za Kaminuza. Aziranye n’abantu benshi, azadufasha kubona abafatanyabikorwa batandukanye.”

Campbell yabaye Visi Perezida wa Tufts University guhera mu 2007 nyuma y’imyaka itatu ari umuyobozi wungirije ushinzwe imari n’ubutegetsi kuri Radio WGBH y’umujyi wa Boston.

Kuva mu mwaka wa 1996 kugeza mu 2004, Campbell yabaye umuyobozi wungirije w’ishuri ryigisha ubuvuzi bw’amenyo muri Tufts University.

Ubwo yari muri izi nshingano, ashimirwa kuba yarazanye uburyo bushya bw’ikoranabuhanga, uburyo bushya bwo gucunga imari no kuvugurura imikorere y’ishuri ryigisha ubuvuzi bw’amenyo.

Campbell kandi yigeze kuba umuyobozi wungirije ushinzwe imari n’ubutegetsi mu Kigo gishinzwe kwita ku buzima bwo mu mutwe i New York.

Campbel afite impamyabumenyi y’icyiciro cya gatatu cya Kaminuza mu bijyanye n’imicungire y’ibitabo yakuye muri State University of New York ndetse n’impamyabumenyi y’icyiciro cya gatatu mu bijyanye n’ubuzima rusange yakuye muri Tufts University.

Patricia Campbell wagizwe umuyobozi w'icyubahiro wa Kaminuza y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza