Pasiteri Rutayisire yavuze uko yanenaga Abatwa

Yanditswe na Habimana James
Kuya 11 Kanama 2019 saa 06:41
Yasuwe :
0 0

Umushumba w’Itorero Angilikani muri Paruwasi ya Remera, Pasiteri Antoine Rutayisire, yatanze ubuhamya bw’uburyo amacakaburi yabaye mu Rwanda yatumye umwe mu bana b’abakobwa biganaga mu mashuri abanza areka ishuri nyuma yo kumubwira ko batasangira.

Yabigarutseho kuri uyu wa Gatandatu tariki 10 Kanama 2019 mu masengesho ngarukakwezi yo gushimira Imana, ategurwa n’Umuryango Rwanda Leaders Fellowship.

Aya amasengesho yabereye muri Kigali Marriott Hotel yitabirwa n’abayobozi batandukanye barimo Madamu Jeannette Kagame, abayobozi mu nzego za leta, abikorera, abanyamadini n’abagize itsinda ’The Sisters’, rihuje abahoze ari abafasha b’abayobozi bakuru n’abahoze ari abakuru b’ibihugu baturutse ku migabane itandukanye y’Isi.

Pasiteri Rutayisire ubwo yasobanuraga ibijyanye n’inzira y’ubumwe n’ubwiyunge abanyarwanda bafashe nyuma ya Jenoside yakorewe Abatutsi, akiri mu ishuri, bagiye bigishwa ibijyanye n’amoko ku buryo byageze n’aho umwe mu bana b’Abatwa biganaga aretse kwiga kubera ko bamunenaga.

Mu buhamya bwe, Rutayisire yagize ati “Ubwo twari tukiri mu mashuri mbere ya Jenoside yakorewe Abatutsi, rimwe umwarimu yaratubwiye ngo muhaguruke, Abahutu bari benshi cyane naho Abatutsi twari nka batatu gusa.”
“Abatwa bo harimo umukobwa umwe gusa, mwarimu yaratubwiye ati muri mwe ni nde wasangira n’Umutwa? Abatutsi n’Abahutu twese twarahagurutse turavuga ko nta n’umwe, nanjye ubwanjye narahugurutse, uwo mukobwa yahise ava mu ishuri kandi ntiyigeze agaruka.”

Rutayisire yaje kubisabira imbabazi

Pasiteri Rutayisire yavuze ko mu 1999 ari umwe mu bagiye muri Komisiyo y’Igihugu y’Ubumwe n’Ubwiyunge, aza no guhura n’uwitwaga Elie Mpayimana wari Umutwa amusaba imbabazi.

Ati “Icyo gihe umwe muri twe yarahagurutse aravuga ati nitwa Elie Mpayimana ndi Umutwa, ako kanya nabwiye bagenzi banjye nti mbere y’uko dutangira inama ndashaka kubanza kwiyunga n’uyu mugabo, abantu bari aho bahise bambaza ngo ese umuzi he? Nababwiye ko ntamuzi ariko ko namuhemukiye, barambaza ngo gute? Nahise mbabwira ya nkuru y’ibyo twakoze nkiri muto.”

Yakomeje agira ati “Mpayimana namubwiye ko nabahemukiye, abantu barasetse ariko narabikoze kuko twagombaga kuba igihugu kimwe bitari ukwigabanyamo amoko adafite agaciro, uko niko twabayeho kuko twahoraga twibutswa ko dutandukanye.”

Pasiteri Rutayisire yavuze ko akunda kubwira abantu ko bimutera ishema kuba atuye mu gihugu aho abantu bafite icyerekezo cyiza.

Yasobanuye ko mu 1994 ubwo yari mu nkambi y’impunzi ahahoze ari Byumba, yahoraga avuga ko yibaza uburyo u Rwanda ruzongera kuba igihugu cyiza.

Ati “Najyaga mvuga ngo FPR nayo n’ikora ikosa nk’ibyabaye, nzahunga iki gihugu ngende, igishimishije ni uko ubwo numvaga ijambo rya mbere rya Leta y’Ubumwe nabonye ko bimpa icyizere cyo kubaho.”

Pasiteri Rutayisire yavuze ko uyu munsi abanyarwanda bakwiye kwishimira ko bafite leta iha agaciro buri wese itarobanuye, ko n’uwaba avuga ko adafite akazi byaba biterwa n’uko wenda ari gake ariko igihe kigera akakabona nta kindi gisabwe.

Pasiteri Rutayisire yavuze uko yatumye umukobwa w’Umutwa areka ishuri kubera kumunena

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza