00:00:00 IGIHE NETWORK KN KINYARWANDA EN ENGLISH FR FRANCAIS

Palm-nut vulture, igisiga cyo mu bwoko bw’inkongoro kitabeshwaho n’inyama gusa

Yanditswe na Nzabonimpa Jean Baptiste
Kuya 31 Gicurasi 2021 saa 07:56
Yasuwe :
0 0

Ku mugabane wa Afurika habarurwa ibisiga byo mu muryango w’inkongoro amoko 11. Muri ayo moko yose amoko, atandatu aboneka mu Rwanda. Muri ayo moko atandatu, harimo amoko ane y’inkongoro umuryango mpuzamahanga wita ku bidukikije ushyira ku rutonde rw’ibisiga bigeramiwe ku buryo hatagize igikorwa vuba ibyo bisiga byazashira bikazasigara ari amateka.

Umuryango dusangamo ibisiga by’inkongoro harimo ibisiga bibaho imibereho itangaje kandi iteye amatsiko. Muri uwo muryango dusangamo inkongoro zitungwa n’imirambo n’intumbi, amayezi n’ibindi, dusangamo ndetse inkongoro zibasha kwica inyamaswa nzima zirimo nk’intama, ihene, imitavu n’izindi zitandukanye.

Ntabwo ari ibyo gusa kuko muri uwo muryango tunasangamo inkongoro zitwa Palm-nut vulture zibeshwaho n’ubunyobwa n’izindi mbuto nubwo inshuro nke cyane zibasha kurya inyama. Ese Palm-nut vulture ni igisiga bwoko ki?

Palm-nut vulture ni igisiga gisa gute?

Iki gisiga iyo ari gikuru ahantu hanini haba hasa n’ibara ry’umweru, uretse ku mugongo hari ibara ry’umukara. Iki gisiga gifite imirizo migufi isa n’umukara ariko hakagaragaraho uturongo tw’umweru.

Amaso y’iki gisiga ni umuhondo kandi amaguru n’amano afite ibara rijya gutukura. Ibi bisiga ikigore n’ikigabo birasa uretse ko ikigore kiruta gato ikigabo.

Uburebure bw’iki gisiga ni santimetero 60, iyo amababa arambuye agira santimetero 150, iyo gikuze gipima garama 1360-1700g.

Palm-nut vulture ishobora kurama kugera ku myaka 27. Ku mugabane wa Afurika habarurwa ibi bisiga bigera 80.000 kandi mu Rwanda by’umwihariko muri Kigali ibi bisiga bibasha kuhaboneka ku bwinshi.

Palm-nut vulture itungwa n’iki?

Palm-nut vulture ni igisiga gitandukanye n’ibindi bisiga byo mu muryango w’inkongoro ndetse n’ibindi bibeshwaho no guhiga. Iki gisiga gitungwa mbere na mbere n’imbuto n’amavuta biva ku giti cy’umukindo kandi gishobora kurya izindi mbuto n’impeke zitandukanye.

Rimwe na rimwe gishobora kurya ibinyangoro n’ibiburangoro. Muri ibyo twavuga nk’amafi, ibisimba bisimbagurika n’ibinyamujonjorerwa. Ni gacye cyane wabona ibi bisiga birya intumbi, nubwo bishobora kurya inyoni zakomeretse cyangwa inyamabere.

Palm-nut vulture zororoka zite?

Palm-nut Vulture zubaka icyari kinini kigizwe n’amashami y’ibiti. Mu cyari mo imbere haba harimo amababi y’ibiti by’imikindo. Ibi bisiga bikunda kwarika icyari mu mahango y’igiti kandi zikacyubaka hejuru cyane. Ibisiga bikuze bikunda kuba hafi y’icyo cyari mu gihe cy’umwaka. Iyo icyari kimaze kuboneka ingore itera igi rimwe ryonyine.

Ikigabo n’ikigore bifatanya kurarira iryo gi mu gihe cy’iminsi 36-42. Iyo igihe cyo kurarira kirangiye rya gi rivamo umushwi usa n’ikijuju. Uwo mushwi ugaburirwa n’ababyeyi bombi kandi nyuma y’amezi 3 uba umaze kumenya kuguruka.

Palm-nut vulture zibangamirwa n’iki?

Bitewe n’ubunini bwazo ndetse n’imbaraga zigira Palm-nut vulture ntabwo zifite ibizihiga byinshi, uretse ko imishwi yayo iba ifite ibyago byinshi byo kuribwa n’ibisiga birya inyama harimo za kagoma n’ibindi bisiga bitungwa n’inyama. Ibyo kandi byiyongeraho ikibazo cy’imihindagurikire y’ikirere no gutema amashyamba.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .