PAC yatahuye imifuka 203 ya sima yangirikiye mu biro i Gicumbi

Yanditswe na Ndayishimye Jean Claude
Kuya 6 Kamena 2018 saa 09:38
Yasuwe :
0 0

Komisiyo ishinzwe gukurikirana imikoreshereze y’imari n’umutungo by’igihugu, ntiyanyuzwe n’ibisobanuro by’ubuyobozi bw’Akarere ka Gicumbi ku cyatumye imifuka ya sima igera kuri 203 yangirikira mu biro by’Umurenge wa Muko mu Karere ka Gicumbi.

Kuri uyu wa 4 Kamena 2018, Akarere ka Gicumbi kitabye PAC kugira ngo kabarizwe mu ruhame amakosa yako yagaragaye muri raporo ya 2016-2017 y’Umugenzuzi Mukuru w’Imari ya Leta, ashingiye ku micungire mibi y’umutungo w’igihugu.

Abadepite bagize iyi komisiyo bagaragaje ikibazo cy’ibikoresho byagombaga kubakira abatishoboye mu Murenge wa Muko ariko bikaba bimaze imyaka myinshi byarangirikiye mu biro. Basobanuye ko ubwo basuraga uyu murenge basanze imifuka ya sima 203 yarangiritse bikomeye, ku buryo umuntu atayitandukanya n’urutare.

Depite Clothilde yasobanuye ko ubwo bahageraga basanze iyo mifuka yaragabanutse ku buryo isigaye ari 197.

Yagize ati “Iyo mifuka yabaye ibiti ntabwo yakoreshwa imaze imyaka myinshi ni ibintu biri aho birunze byagenze bite? Ntabwo ishobora no gukoreshwa? Yabaye urutare byararangiye. Habuze iki kugira ngo birinde bimera kuriya?”

Uwahoze ari Umuyobozi w’Akarere wungirijwe ushinzwe imibereho myiza y’abaturage, Benihirwe Charlotte, yavuze ko icyo kibazo bakimenye ubu bari batangiye kwishyuza ababigizemo uruhare.

Yagize ati “Icyo twakoze tumaze kubimenya, twakoze uko dushoboye kugira ngo tumenye imvo n’imvano y’icyo kibazo kuko ni ikibazo cyari kimaze igihe kirekire hanyuma tumenya uruhare n’uko byagiye bigenda. Ni nde muyobozi wari uhari? Ni nde wakurikiranye icyo kibazo, ubu twamaze kubasaba kwishyura ayo mafaranga.”

Yavuze ko abagombaga kubakirwa hari abubakiwe hakabaho n’abubakiwe inzu zitujuje ibisabwa, aho ngo hari gahunda y’uko mu minsi iri imbere bazazivugurura.

Mu bakurikiranwe ngo harimo uwahoze ari Umunyamabanga Nshingwabikorwa w’Umurenge wa Muko ndetse n’umukozi wari ushinzwe imibereho myiza bakoranye ihererekanyabubasha igihe yari ahavuye, abari bashinzwe amasoko n’umukozi wari ushinzwe kwita ku batishoboye. Gusa ntiyagaragaje amazina y’abo bayobozi bose.

Perezida wa PAC, Depite Nkusi Juvenal, yavuze ko ubwo ari ubugome bukomeye, bitumvina uburyo igihugu gishora amafaranga kigamije kubakira abatishoboye abayobozi ntibabyiteho ibikoresho bikangirika.

Ntabwo ari ikosa ry’akazi, ni icyaha cy’ubugome, ni ubugome, urumva gufata amafaranga y’igihugu bakagenda bakagura sima, bagafata imodoka izijyana, bagasaba urufunguzo rw’ahantu bayibika, abantu bakagenda bakabifungiramo, hakabura umuntu ufata icyemezo cyo kugira ngo bubake. Uwo muntu ntaba akunda abantu. Ayo mafaranga yashoboraga gukora ibindi ariko akagera muri Muko akabikwa!”

Kuri ubu aka karere gafite icyuho mu buyobozi, aho gafite Meya w’agateganyo nyuma y’uko komite nyobozi yegurijwe icya rimwe.

Depite Nkusi yasabye abayobozi bari mu mirimo gukurikirana icyo kibazo bakagikemura.

PAC yatahuye imifuka 203 ya sima yangirikiye mu biro i Gicumbi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza