Kwamamaza

Oda Gasinzigwa wigeze kuba Minisitiri yatorewe gusimbura Bazivamo muri EALA

Yanditswe kuya 19-10-2016 saa 09:38' na Rabbi Malo Umucunguzi


Oda Gasinzigwa wigeze kuba Minisitiri w’Uburinganire n’Iterambere ry’Umuryango, yatorewe kuba Umudepite mu Nteko Ishinga Amategeko ya Afurika y’Uburasirazuba, EALA, atsinze Kanamugire Callixte ukora mu Bunyamabanga bw’Umuryango FPR Inkotanyi, ku majwi 71 mu gihe uwo bari bahanganye yagize amajwi 4, mu basenateri n’abadepite 75 batoye.

Ni amatora yari agamije gusimbuza Christophe Bazivamo weguye muri EALA mu minsi ishize amaze kugirwa Umunyamabanga Mukuru Wungirije w’Umuryango wa Afurika y’u Burasirazuba (EAC), Ushinzwe Imari n’Ubutegetsi.

Inteko rusange yo kuri uyu wa 19 Ukwakira, yatangiye saa 9:02 imitwe yombi yakoranye, abasenateri ari 21 n’abadepite 51.

Byageze mu gihe cy’itora hari abasenateri 21 n’abadepite 54, bagomba gutora umudepite umwe mu bakandida babiri batanzwe n’Umuryango FPR Inkotanyi wakomokagamo Bazivamo Christophe weguye, aribo Oda Gasinzigwa na Kanamugire Callixte.

Itegeko rigena ko abakandida biyamamaza ku munsi w’itora, aho buri wese, abayobozi b’imitwe yombi bumvikanye ko ahabwa iminota itanu yo kwiyamamaza.

Oda Gasinzigwa watangiye mu kwiyamamaza, yabanje gushimira umwanya ahawe “ati ndagira ngo mbasabe amajwi, nicyo cyanzinduye, kugira ngo banyakubahwa mwese muri hano, mubyubahiro byanyu, amajwi yanyu ndayizeye, cyane cyane mbihereye ku bumenyi, ubunararibonye, ubushake, ubushobozi mfite n’umutima wo gukorera igihugu cyanjye”.

Gasinzigwa w’imyaka 49, afite umugabo n’abana bane. Yize icyiciro cya gatatu cya Kaminuza (Master’s) mu mibanire n’iterambere (Social sciences in Gender and Development).

Mu mirimo yakoze, yabaye Minisitiri w’Uburinganire n’Iterambere ry’Umuryango, ayobora Urwego rushinzwe kugenzura iyubahirizwa ry’uburinganire bw’umugabo n’umugore, akora mu mishinga yo gutuza abantu ahari ishyamba rya Gishwati, ndetse anakora muri banki imyaka umunani.

Ati “Muri ibyo bihe byose nagiye ngirirwa icyizere no gufatanya iyo mirimo n’izindi nshingano nagiye mpabwa.” Aho ngo harimo aho yayoboye inama y’igihugu y’abagore ndetse aba komiseri muri Komisiyo y’ubumwe n’ubwiyunge.

Yakomeje agira ati “Muramutse mungiriye icyizere mukantora nifuza gufatanya n’abandi mu gutanga ibitekerezo mu bijyanye n’imibereho myiza, ubukungu, politiki, kugira ibyo byose bibashe kugerwaho.’’

Oda Gasinzigwa niwe watorewe gusimbura Christophe Bazivamo muri EALA

Umukandida bari bahanganye, Kanamugire Callixte w’imyaka 57, nawe yagize ati “Ndabasaba amajwi kuko numva mbishoboye, kandi mbifitiye ubushake, mfite no gukunda igihugu.’’

Afite umugore n’abana bane, akaba afite Master’s mu micungire y’imishinga, ndetse yakoze imirimo itandukanye. Kuva mu mpera za 1994, yagize ati "nagiriwe icyizere mu bihe bikomeye cyo kuyobora akarere ka Kacyiru ubu kabaye Gasabo kugeza mu mpera za 2005".

Nyuma yaje guhabwa akazi mu Bunyamabanga Bukuru bwa FPR Inkotanyi ashinzwe ubukungu n’igenamigambi kugeza uyu munsi, ati “nkaba numva mfite uburambe n’ubunararibonye bwo kuba nakora ako kazi mbasaba”.

Nyuma y’itora ry’abasenateri n’abadepite 75 bose hamwe, itora ryemeje ko Oda Gasinzigwa ariwe utorewe uyu mwanya.

Ubwo itegeko ry’u Rwanda ryavugururwaga kuwa 29 Nzeli kugira ngo igihugu kibashe gusimbuza Bazivamo wari usigaje amezi macye kuri manda ye, Perezida w’Inteko Ishinga Amategeko, Umutwe w’Abadepite, Donatille Mukabalisa, yabwiye bagenzi be ko batumije igihembwe kidasanzwe kuko ingingo zirebwaho basanze zitategereza igihembwe gisanzwe.

Ati “Impamvu tutashoboraga gutegereza igihembwe gisanzwe, twumvaga bikwiye ko umudepite uhagarariye u Rwanda muri EALA yatorwa vuba akabasha kurahira mu gihembwe cyabo giteganyijwe kuva kuwa 09 Ukwakira. Ubwo murumva ko twari dufite iminsi mike kugira ngo abashe kugenda arahire anakurikirane imirimo y’icyo gihembwe kizageza kuwa 21 Ukwakira.’’

Gasinzigwa agomba gusoza manda y’imyaka itanu Bazivamo yatangiye mu 2012, igomba kurangira muri Kamena 2017.

Oda Gasinzigwa na Kanamugire Callixte nibo bahataniraga uyu mwanya
Perezida wa Sena, Bernard Makuza na Perezida w'Umutwe w'Abadepite, Donatille Mukabarisa mu cyumba cy'Inteko Rusange
Abagize Inteko Ishinga Amategeko batoye Oda Gasinzigwa nk'umusimbura wa Bazivamo muri EALA
Gasinzigwa yatowe ku majwi 71

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved