Oda Gasinzigwa na mugenzi we w’Umurundi barahiriye kwinjira muri EALA

Yanditswe na Kanamugire Emmanuel
Kuya 21 Ukwakira 2016 saa 11:51
Yasuwe : XX
0

Oda Gasinzigwa uherutse gutorerwa gusimbura Christophe Bazivamo mu Nteko Ishinga Amategeko y’Umuryango wa Afurika y’Uburasirazuba, EALA, na Jean Marie Muhirwa ukomoka mu Burundi, barahiriye imirimo mishya.

Nkuko EALA ibitangaza, uyu muhango wabaye ku gicamunsi cy’ejo kuwa Kane tariki 20 Ukwakira 2016 ku cyicaro cya EALA giherereye muri Tanzania, indahiro yabo yakirwa na Perezida w’Inteko ya EALA, Daniel F.Kidega nkuko amategeko agenga Umuryango w’Afurika y’Iburasirazuba na EALA abiteganya.

Mu gitondo cyo kuwa Gatatu tariki 19 Ukwakira 2016 nibwo Gasinzigwa yatowe n’Abadepite n’Abasenateri 71 muri 75, atsinda Kanamugire Callixte mu buryo bworoshye. Asimbuye Christophe Bazivamo weguye amaze kugirwa Umunyamabanga Mukuru Wungirije w’Umuryango wa Afurika y’u Burasirazuba (EAC).

Gasinzigwa na Kanamugire bombi ni abakandida batanzwe n’Umuryango FPR Inkotanyi Bazivamo yaturukagamo, nk’uko itegeko ribigena.

Jean Marie Muhirwa, yinjiye muri EALA nk’Umudepite w’u Burundi wasimbuye Hafsa Mossi wishwe kuwa 13 Nyakanga 2016 mu mujyi wa Bujumbura.

Muhirwa wari Umusenateri aturuka mu ishyaka riri ku butegetsi CNDD-FDD, yatowe n’Inteko Ishinga Amategeko ku majwi 103 ku 109 batoye.

Itegeko rigenga itorwa ry’umudepite uhagarariye u Rwanda muri EALA, rigena ko iyo hari uvuye mu mwanya we, uwinjiyemo ‘‘arangiza igice cya manda gisigaye cy’uwo asimbuye,’’bivuze ko Gasinzigwa azarangizanya na manda y’imyaka itanu Bazivamo yatangiye mu 2012, izarangira muri Kamena 2017.

FPR Inkotanyi n’Imitwe ya politiki yishyize hamwe na yo, muri EALA bagiramo abadepite bane naho PL, PSD, Urubyiruko, Abagore n’Abafite ubumuga bakagiramo umudepite umwe umwe.

Abo muri FPR Gasinzigwa asanze muri EALA ni Martin Ngoga, Hajabakiga Mugorenejo Patricia na Rwigema Pierre Céléstin. PL ifitemo Odette Nyiramirimo; PSD ifite Dr. Francois Xavier Kalinda, Urubyiruko ruhagarariwe na Ndikuryayo Straton, abagore bahagarariwe na Nyirahabineza Valerie na ho abafite ubumuga bahagarariwe na Dr. James Ndahiro.

Gasinzigwa yarahiriye kuba Umudepite mu Nteko y'Umuryango wa Afurika y'Uburasirazuba, EALA
Perezida wa EALA aha ikaze Gasinzigwa
Jean Marie Muhirwa, winjiye muri EALA asimbuye Hafsa Mossi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza