Obasanjo yise ingagi rimwe mu mazina ye

Yanditswe na Mukaneza M.Ange
Kuya 7 Nzeri 2018 saa 11:42
Yasuwe :
0 0

Uwahoze ari Perezida wa Nigeria, Olusegun Obasanjo, umwe mu nshuti zikomeye z’u Rwanda, yise ingagi izina rye rya kabiri risobanura mu kinyarwanda ’ingirakamaro’.

Obasanjo w’imyaka 81 yabaye Perezida wa Nigeria kuva mu 1999 kugera mu 2007. Amazina ye ni Olusegun Mathew Okikiola Aremu Obasanjo.

Uyu mugabo udahwema kugaragaza ko u Rwanda ari urugero rwiza ku bihugu bya Afurika, ni umwe mu bantu 23 bise amazina ingagi mu muhango wabaye kuri uyu wa 7 Nzeri 2018.

Yanditse amateka yo kuba mu bisi bose, ariwe wahuje izina n’ingagi kuko yarihaye izina Aremu, rimwe mu yo yiswe.

Aremu ni izina rikomoka mu rurimi rw’iki Yoruba rukoreshwa muri Afurika y’Uburengerazuba.

Obasanjo yasobanuye ko izina "Aremu", risobanuye ko "Umwana wese ari ingenzi mu muryango". Yaryise umwana w’ingagi wo mu Muryango wa Musilikare.

Ubwo yari amaze kuvuga izina ahaye ingagi, yakomeje agira ati“Inyamaswa zose ni ingenzi mu Isi, tugomba kuzibungabunga. Imana izahe Aremu kuramba."

Obasanjo kandi yagarutse ku mbaraga u Rwanda rushyira mu kubungabunga ibidukikije, avuga ko ibihugu byose biramutse birufatiyeho urugero nta bibazo by’imihindagurikire y’ibihe byagaragara ku Isi.

Ati "Ibihugu byose biramutse bifatiyeho urugero, bigafata umunsi umwe wo kwizihiza inyamaswa runaka cyangwa ikimera, ntekereza ko twagira Isi itarangwamo ibibazo by’imihindagurikore y’ibihe, ntihabaho ibibazo byo kwangiza ibyo Imana yaduhaye, ibidukikije.”

Sheikh Dr. Abdulaziz Ali Bin Rashid Al Nuami uzwi nka “Green Sheikh” [Sheikh w’Ibidukikije] kubera uburyo yitangira kurengera ibidukikije, yagaragaje ko yishimiye kuba yaje mu Rwanda ku nshuro ye ya kabiri kandi yiyumva nko mu rugo.

Ati" Uwo ndiwe ntacyo bivuze ndi ikiremwamuntu nkawe, ntacyo bivuze kuba ndi Sheikh, Dr, mfite umutima mwiza, w’urukundo n’ibitekerezo byiza nk’uko Abanyarwanda bameze."

Yakomeje avuga ko ashimishwa no kuza mu Rwanda aho afatira urugero kuri Perezida Kagame ukunzwe n’abaturage, kandi akunda abantu atitaye ku cyo baricyo.

Ati "Izina nahisemo kwita umwana w’ingagi ni ’Na Yombi’, n’izina rikomeye cyane ryavuye ku mutima wanjye. Serivisi nziza bisobanuye gufungurira abantu umutima wawe, kwagura ibitekerezo byawe".

Naho Graca Machel wahoze ari Umugore na Nelson Mandela yise umwana w’ingagi "Urugori".

Yavuze ko yarihisemo ashingiye ku bikorwa byo guharanira abagore yiyeguriye.

Ati "Kwambika urugori abagore bo mu Rwanda, ni ko ababyeyi bo mu Rwanda bashimirwa. Ariko hamwe n’iki kimenyetso nambitse ikamba abagore bose bo muri Afurika no ku Isi.”

“Hari isano hagati yo kuba umubyeyi n’ibirori turi kwizihiza uyu munsi. Turizihiza ibidukikije, kandi ibidukikije nibyo bituma ubuzima buramba."

Uyu muhango wo Kwita Ingagi amazina, ubaye ku nshuro ya 14 mu gihe ibarura riheruka ryasanze izibarizwa mu Birunga zigera kuri 604.

Mu bandi bise ingagi amazina, harimo Laureano Bisan Etamé-Mayer wamamaye muri Arsenal wise ingagi ‘Ikipe’, Theo Kgosinkwe & Nhlanhla Nciza bazwi nk’abagize intsinda rya Mafikizolo bahaye ingagi izina rya ‘Akeza’.

Kanda hano urebe uko uyu muhango wagenze umunota ku wundi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza