Nyuma yo guhatwa ibibazo, Akarere ka Gisagara kahize kutazagaruka imbere ya PAC

Yanditswe na Philbert Girinema
Kuya 29 Nzeri 2016 saa 08:18
Yasuwe : XX
0

Nyuma yo guhatwa ibibazo na Komisiyo y’Inteko Ishinga Amategeko Umutwe w’Abadepite, ishinzwe gukurikirana ikoreshwa ry’imari n’umutungo bya Leta (PAC), Akarere ka Gisagara kiyemeje kutazayigaruka imbere ngo kuko ibyo katumirijwe ari amakosa atagoye kuyakosora.

Buri rwego rwose iyo rukoresheje neza ingengo y’imari ya Leta, ntacyo rubazwa, ariko kandi ngo rimwe na rimwe si na ngombwa kurushima kuko ruba rwashyize mu bikorwa inshingano zarwo.

Icyakora iyo habayeho kunyuranya n’ibyagombaga kuba bikorwa, iyo hatabayeho gukurikiranwa mu nkiko, benshi babirira ibyuya imbere ya PAC ndetse bamwe bakarya iminwa iyo barimo basabwa ibisobanuro ku byo batatunganyije neza, mbere yo kugirwa inama.

Kuri uyu wa 28 Nzeri, imbere ya PAC hari hatahiwe Akarere ka Gisagara, karyozwaga amakosa ajyanye n’icungamutungo rifutamye ndetse n’itangwa ry’amasoko ya Leta bigakoranwa ubushishozi buke. Icyakora ngo amakosa kasabweho ibisobanuro si menshi ariko arakomeye nk’uko byabanje gusobanurwa na Depite Nkusi Juvenal, Umuyobozi w’iyo Komisiyo.

Saa kumi n’iminota mirongo itatu z’umugoroba (4:30pm), ni bwo itsinda ritari rito ry’abakozi n’abayobozi b’Akarere ka Gisagara ryari ryinjiye mu cyumba cya PAC, aho ku ikubitiro ryahise rinengwa kuba ritubahirije ihame ry’uburinganire n’ubwuzuzanye, dore ko bose bari abagabo gusa.

Iryo tsinda ryari rirangajwe imbere na Uwimana Innocent, Umuyobozi wa Njyanama y’Akarere ka Gisagara, Rutaburingoga Jérôme, Umuyobozi w’ako Karere na Mvukiyehe Innocent usanzwe ari Umunyamabanga Nshingwabikorwa.

Amakosa menshi mu icungamutungo…

Mu makosa y’icungamutungo ritanoze, Akarere ka Gisagara katinze kwishyuza amafaranga yagurijwe abaturage muri gahunda ya VUP, ahatanzwe miliyoni zisaga 150.

Iryo kosa, Umunyamabanga Nshingwabikorwa wa Gisagara yasobanuye ko ryatewe n’uko ko ubwo VUP yatangiraga, abaturage batumvaga neza ko bayahawe nk’inguzanyo igomba kwishyurwa, ku buryo ngo benshi baba bazi ko bayahawe burundu.

Amaze kumvishwa ko byari inshingano z’abayobozi kubisobanurira abaturage no kubishyuza, yasabiye imbabazi iryo kosa, anamenyesha ko hari ayishyuwe ku buryo asigaye angana na 47%, amafaranga ako karere kemera ko atari make.

Umuyobozi wungirije wa PAC, Theoneste Karenzi yahise abaza ati “Ni inde ukwiye kubiryozwa?” Mvukiyehe Innocent yahise asubiza ati “Ni twebwe nk’abayobozi.”

Mu bindi byagaragajwe muri raporo y’Umugenzuzi Mukuru w’Imari ya Leta mu mwaka wa 2014/2015, harimo amakosa mu buryo bwo kwandika mu gitabo cy’ibaruramari, aho hari nk’amafaranga y’u Rwanda agera kuri miliyoni 76 yo muri gahunda y’ubwisungane mu kwivuza (Mutuelle de Sante) yanditswe mu mwaka utari wo.

Andi makosa yagaragaye, ni ay’ahantu hubatswe ibibuga by’imikino bifite agaciro ka miliyoni 14, nyuma y’igihe gito bagahita batekereza kuhubaka indi nyubako nini ifite agaciro ka Miliyoni 500, hakaba hari n’impungenge z’uko hari andi mafaranga yapfa ubusa mu gihe byaba ngombwa ko izo nyubako zakenera kwaguka, kuko nta genabikorwa ryigeze rikorwa mbere.

Akarere ka Gisagara kandi ntikorohewe mu gusobanura ku mafaranga agera kuri miliyoni 138 zishyuwe rwiyemezamirimo ubwo karimo gategura gushora imari mu ruganda rutunganya ibitoki, aho kavugaga ko gafatanyije n’undi mushoramari ariko Umugenzuzi w’Imari akaba atarigeze yerekwa ibyemeza ko ako karere ari umunyamigabane.

Aha ako karere kahwituriwe kwita ku gaciro k’imigabane yako n’uburenganzira igahesha muri uwo mushinga, dore ko ari ko gafite imigabane myinshi ingana na 55%, bityo kakaba ari ko kagomba gutanga umuyobozi mukuru wawo.

Amakosa yose abayobozi b’Akarere ka Gisagara babajijweho, bayasobanuye ndetse banasaba imbabazi, gusa ngo akaba ari yo mahitamo bari bafite nk’uko Umuyobozi w’Akarere yabitangarije IGIHE.

Ati “Mu by’ukuri iyo habaye amakosa nta kindi wakora uretse gusaba imbabazi, ikindi ukagaragaza n’uburyo bigiye guhinduka ntibizongere. Ikibi rero ni ugusubira mu makosa yabayeho, icyo cyaba ari kibi cyane.”

Isomo ku muyobozi mushya w’Akarere ka Gisagara…

PAC yabanje gushima Akarere ka Gisagara ko kataherukaga gutumizwa ngo gahatwe ibibazo ku makosa runaka, dore ko ngo kaherukaga mu mwaka wa 2011, ndetse imyanzuro y’inama kagiriwe ikaba yarashyizwe mu bikorwa ku kigero cya 73%.

Rutaburingoga Jérôme, uherutse gutorerwa kuyobora ako Karere yatangarije IGIHE ko bahakuye amasomo akomeye, cyane cyane ayo kurushaho kwita ku mutungo w’ako karere no kunoza ibituma batumizwa, ku buryo batazongera kugaruka mu maso ya PAC baje kwisobanura.

Umuyobozi w'Akarere ka Gisagara, Rutaburingoga Jérôme

Rutaburingoga yagize ati “Icyo dukuye aha, tugiye guhindura ibitaragenze neza. Tuvanyemo amasomo akomeye cyane ku birebana n’ibyo dutunze, uburyo ibintu bikorwa, ndetse no kwita kuri buri kintu kijyanye n’imicungire y’umutungo wa Leta, ntitubirekere abandi, ahubwo tukabyinjiramo tureba ko buri kintu cyose kiri mu mwanya wacyo.”

Hambere Akarere ka Gisagara kari mu turere tuza ku isonga mu kwesa imihigo, ariko muri iyi myaka ya vuba ugasanga mu myanya yo hagati, aho umwaka wa 2013/2014 kaje ku mwanya wa 12 mu gihe mu 2014/2015 kaje ku mwanya wa 15.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza