Nyaruguru: Yasanzwe mu mugozi yapfuye, hakekwa ko yiyahuye kubera abagore be

Yanditswe na Prudence Kwizera
Kuya 11 Gicurasi 2018 saa 07:41
Yasuwe :
0 0

Umugabo w’imyaka 40 wo mu Murenge wa Muganza, Akarere ka Nyaruguru, bamusanze mu anagana mu mugozi iwe mu nzu yapfuye bikekwa ko yiyahuye.

Uyu mugabo wari ufite imyaka 40 y’amavuko yari afite abagore babiri babana mu Kagari ka Samiyonga mu buryo butemewe n’amategeko, abaturanyi be bakaba bavuga ko bahoraga bagirana amakimbirane.

Mu gitondo cyo kuri uyu wa gatanu tariki ya 11 Gicurasi 2018, nibwo bamusanze amanitse mu mugozi mu cyumba cy’inzu yabanagamo n’umwe muri abo bagore.

Umunyamabanga Nshingwabikorwa w’Umurenge wa Muganza, Uwimana Jean Pierre, yavuze ko uwo mugabo yari asanzwe agirana amakimbirane n’abagore be bikaba bikekwa ko ibibazo byamurenze akiyahura.

Yagize ati "Yari afite abagore babiri babana mu buryo butemewe n’amategeko, bahoraga mu makimbirane. Umugore we umwe yatubwiye ngo yaraye aje atongana avuga ko undi mugore amugurishiriza imitungo ngo ahita ajya mu cyumba arikingirana, noneho mu gitondo asanga yimanitse mu mugozi yapfuye."

Uwimna avuga ko bahageze bari kumwe n’inzego z’umutekano bakusanya ibimenyetso bumvikana n’umuryango wa nyakwigendera ko bamushyingura hadakozwe isuzuma rigaragaza icyamwishe.

Ati "Umuryango we twumvikanye ko nta mpamvu yo gukoresha isuzuma kuko bigaragara ko yiyahuye. Batwandikiye n’ibaruwa bemeza ko nta zindi nkurikizi. Yahise ashyingurwa.”

Gitifu w’Umurenge yasabye abaturage kwirinda no gukumira amakimbirane yo mu ngo kandi bagatanga amakuru ku buyobozi kugira ngo ibyaha bikumirwe bitaraba.

Ibiro by'Akarere ka Nyaruguru

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza