Nyaruguru: Prime Insurance yibutse abazize Jenoside inatanga amashanyarazi ku miryango 44 y’abarokotse

Yanditswe na Prudence Kwizera
Kuya 1 Nyakanga 2018 saa 12:36
Yasuwe :
0 0

Abakozi b’Ikigo cy’Ubwishingizi bw’ubuzima, Amashuri n’ubw’ibintu cyangwa umutungo, Prime Insurance, bibutse abazize Jenoside yakorewe Abatutsi mu 1994, banatanga amashanyarazi akomoka ku mirasire y’izuba ku miryango 44 y’abarokotse mu Karere ka Nyaruguru.

Ku wa Gatanu nibwo abakozi ba Prime Insurance basuye imiryango y’abarokotse Jenoside yakorewe Abatutsi ituye mu Mudugudu wa Nyacyondo, Akagari ka Nyamabuye, mu Murenge wa Mata mu Karere ka Nyaruguru.

Iyi miryango 44 itujwe mu nzu nziza yubakiwe n’Ihuriro ry’amashyirahamwe y’abarengera inyungu z’abarokotse Jenoside yakorewe Abatutsi mu 1994, Ibuka, yahawe na Prime Insurance amashanyarazi akomoka ku mirasire y’izuba.

Umuyobozi ushinzwe Ubucuruzi muri Prime Insurance, Nyirigira Emmy, yavuze ko bahisemo gusura abarokotse Jenoside batuye kure kugira ngo babatere inkunga, barebe n’uko bajya babafasha mu buryo burambye kuko usanga abantu nk’abo badakunze kubona abababa hafi.

Yagize ati “Ikintu twabashije gukora twacaniye imiryango 44 dukoresheje imirasire y’izuba ariko igikorwa cyacu ntabwo ari aha kirangirira turakomeje, ni inshingano nk’ikigo ni n’inshingano nk’Abanyarwanda ko tugomba kubaba hafi ndetse tukareba n’ibindi twakomeza kubafashamo byabateza imbere mu buzima bwa buri munsi.”

Abahawe amashanyarazi akomoka ku mirasire y’izuba bashimye iyo nkunga bavuga ko bari basanzwe baba mu kizima bagacana ibyatsi ariko ubu basigaye baba ahantu habona kandi hafite isuku.

Uwitwa Ayinkamiye Lenatha yagize ati “Twabonye inzu, tubona amatara, turishimye cyane kandi n’ibindi bizaza. Twacanaga ishinge bikadutera imyotsi n’umwanda. Ikindi twishimiye ni uko baje kudusura bakaba batubwiye ko bazadufasha no mu bindi bibazo dufite.”

Abagize iyi miryango kandi bavuga ko nubwo bubakiwe inzu nziza bafite ibibazo bitandukanye bijyanye n’imibereho, kuko bamwe badafite aho guhinga n’abahafite bakaba batabasha kubona ifumbire.

Bagaragaje ko batunzwe no guca inshuro, bifuza ko bafashijwe kubona icyo gukora ariyo nzira nziza yabafasha kuva mu bukene.

Uwitwa Kamanzi Philomène yagize ati “Ahantu dutuye hari benshi badafite ikintu kibatunze, ni inzu gusa, kubaho ni uguca inshuro nta kindi kidutunze. Uwadufasha kubona inka zo korora tukajya tubona ifumbire wenda umuntu yakwatisha agahinga akabona ibyo kurya.”

Abakozi ba Prime Insurance bamaze kubona imibereho y’abo baturage biyemeje ko bagiye kuganira na Ibuka ndetse n’ubuyobozi bw’inzego z’ibanze bakareba icyo babafasha cyabagirira akamaro mu buryo burambye.

Nyuma y’aho abakozi ba Prime Insurance bakomereje ku Rwibutso rwa Jenoside rwa Kibeho basobanurirwa amateka ya ho, bunamira inzirakarengane zirenga ibihumbi 30 zihashyinguye.

Abakozi b’Ikigo cy’Ubwishingizi bw’ubuzima, Amashuri n’ubw’ibintu cyangwa umutungo, Prime Insurance, bibutse abazize Jenoside yakorewe Abatutsi mu 1994
Abakozi ba Prime basobanuriwe amateka ya Jenoside i Kibeho mu Karere ka Nyaruguru
Abakozi ba Prime basobanuriwe uko mu Kiliziya ya Kibeho hiciwe Abatutsi barenga ibihumbi 30 bari bahahungiye muri Jenoside
Abakozi b'Ikigo cy’Ubwishingizi bw’Ubuzima, Amashuri n’Ibintu cyitwa Prime mu nzu y'umwe mu barokotse Jenoside mu Karere ka Nyaruguru
Abarokotse Jenoside mu Karere ka Nyaruguru bagaragaje ko bifuza gukora bakiteza imbere ariko bazitirwa no kutabona ifumbire n'ubutaka bwo guhinga
Bakigera ku Rwibutso rwa Jenoside rwa Kibeho babanje gusobanurirwa amateka yaho
Ikigo cy'Ubwishingizi Prime, cyafashije imiryango y'abarokotse Jenoside kubona amashanyarazi akomoka ku mirasire y'izuba
Prime yafashije imiryango 44 y'abarokotse Jenoside ibaha amashanyarazi akomoka ku mirasire y'izuba
Umuyobozi uhagarariye Ubucuruzi muri Prime, Nyirigira Emmy, aganira n'abarokotse Jenoside bo mu Murenge wa Mata mu Karere ka Nyaruguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza