Nyaruguru: Plan International yatangije ubukangurambaga bw’imyaka itanu bwo guteza imbere umukobwa

Yanditswe na Prudence Kwizera
Kuya 22 Kamena 2019 saa 08:08
Yasuwe :
0 0

Umuryango Plan International mu Rwanda watangije ubukangurambaga bwitwa ‘Girls Get Equal’ bugamije gushimangira ihame ry’uburinganire n’ubwuzuzanye no gutinyura umwana w’umukobwa muri byose.

Ni igikorwa cyabereye mu Karere ka Nyaruguru kuri uyu wa Gatanu, aho abakobwa bashishikarijwe gutinyuka no kwigiramo imbaraga zubaka ubuzima bwe bagamije kwiteza imbere no kuba intangarugero mu byiza.

Umuyobozi uhagarariye Umuryango Plan International mu Karere ka Nyaruguru, Bakundukize Jeacques, yavuze ko mu myaka itanu bazakora ibikorwa biteza imbere umwana w’umukobwa.

Ati “Tuzibanda cyane ku kuzamura imyumvire y’umwana w’umukobwa kugira ngo yige kandi atsinde neza, kubatoza imyuga itandukanye kugira ngo umukobwa abe yabasha gukora ibintu bimuzamura ntategereze amafaranga kuri musaza we cyangwa abandi bagabo bashobora no kumushuka.”

Yavuze kandi ko bazafatanya n’ababyeyi hamwe n’ubuyobozi mu gukumira inda z’imburagihe ziterwa abangavu ndetse no gukuraho inzitizi zituma bata amashuri.

Ubwo bukangurambaga bwageze muri Nyaruguru nyuma y’uko butangirijwe mu Karere ka Musanze muri Werurwe 2019.

‘Girls Get Equal’ bivuze ‘Abakobwa bagire uburinganire muri byose’, ni ubukangurambaga bwatangijwe na Plan ku rwego rw’Isi mu 2018 mu gushakira ibisubizo ibibazo abakobwa bafite birimo ihezwa mu burezi, ubuzima, ubukungu n’amahirwe muri politiki.

Bakundukize yavuze ko ubukangurambaga nk’ubwo buri kubera mu bihugu byose Umuryango Plan International ukoreramo ku Isi birenga 75 kandi buzagera mu turere twose two mu Rwanda.

Mu gushyira mu bikorwa ibikubiye muri ubwo bukangurambaga, by’umwihariko bazafatanya n’ Ihuriro ry’Abanyarwandakazi bari mu Nteko Ishinga Amategeko, FFRP.

Kimwe mu bibazo bikomeye bazibandaho ni inda z’imburagihe ziterwa abangavu kuko ngo mu mwaka utaha bazakora ubushakashatsi bakamenya impamvu nyamukuru ibitera n’icyakorwa ngo bicike.

Bamwe mu baturage bo mu Karere ka Nyaruguru bashimye ubwo bukangurambaga bwatangijwe bavuga ko babwitezeho ko buzakemura ibibazo byugarije abakobwa.

Nyirarekeraho Concessa ati “Ubu bukangurambaga turabwishimiye kuko batubwiye ko bazateza imbere abakobwa kandi bazadufasha ku kibazo cy’abakobwa baterwa inda kuko ni ikibazo gikomeye cyane.”

Gutangiza ubwo bukangurambaga Plan International Rwanda yahaye Akarere ka Nyaruguru inkunga ya Miliyoni eshanu z’amafaranga y’u Rwanda y’umusanzu w’ubwisungane mu kwivuza ku miryango irenga 1 800.

Icyo gikorwa cyahuriranye n’umunsi wo gusoza urugerero ruciye ingando ku banyeshuri 291 bari bamaze iminsi 40 batorezwa mu Murenge wa Nyagisozi

Urwo rugerero narwo Plan International Rwanda yarugizemo uruhare kuko yafashije mu kurutegura kugira ngo ruzagende neza n’ibijyanye n’imibereho.

Umuryango Plan International wageze mu Rwanda mu 2007; usanzwe ukora ibikorwa byo kwita ku burenganzira bw’abana, uburezi bw’abato, ubuzima bw’imyororokere, kwihangira imirimo n’uburinganire bw’abakobwa.

Abana b'abakobwa basabwe kwitinyuka no guharanira gukora ibikorwa byiza bitanga umusaruro
Bakundukize Jeacques, yavuze ko mu myaka itanu bazakora ibikorwa biteza imbere umwana w’umukobwa
Bamwe mu rubyiruko bagaragaje ibyo bazakora harimo no gushyigikira umwana w'umukobwa
Bamwe mu rubyiruko basoje urugerero ruciye ingando mu Karere ka Nyaruguru
Mu karere ka Nyaruguru hasojwe urugerero ruciye ingando ku banyeshuri 291
Plan International Rwanda yahaye Akarere ka Nyaruguru inkunga ya Miliyoni eshanu z’amafaranga y’u Rwanda y’umusanzu w’ubwisungane mu kwivuza ku miryango irenga 1 800
Plan International yatangije ubukangurambaga bw’imyaka itanu bwo guteza imbere umukobwa mu Karere ka Nyaruguru
Umuyobozi uhagarariye Umuryango Plan International mu Karere ka Nyaruguru, Bakundukize Jeacques
Umuyobozi wungirije ushinzwe imibereho myiza y'abaturage mu Karere ka Nyaruguru, Kayitesi Colette

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza