Nyaruguru: Mu bana barenga 1 200 bataye ishuri hari ababuriwe irengero abandi barisubizwamo

Yanditswe na Prudence Kwizera
Kuya 13 Kamena 2019 saa 09:46
Yasuwe :
0 0

Ubuyobozi bw’Akarere ka Nyaruguru butangaza ko bumaze igihe mu gikorwa cyo gushakisha abana bavuye mu ishuri no kubasubizamo kandi kiri gutanga umusaruro kuko abenshi bamaze kuboneka.

Mu kiganiro n’abanyamakuru cyabaye kuri uyu wa Gatatu, Umuyobozi w’Akarere ka Nyaruguru, Habitegeko François, yavuze ko kuva muri Mata 2019 abana 1 294 babarurwaga ko bataye ishuri ariko abenshi babamze kurisubizwamo.

Ati “Mu bana 996 tumaze kugarura 722 aho ni mu mashuri abanza, urumva hasigaye 274. Aba nabo abenshi ni abatari mu Karere, hari abajyanye n’ababyeyi babo bimuka bajya i Burasirazuba ahari amasambu kandi turizera ko bagezeyo bakiga kuko naho hari ubuyobozi.”

Akomeza avuga ko no mu mashuri yisumbuye bamaze kugarura abana benshi bari barataye ishuri.

Ati “Mu yisumbuye hari haravuyemo 298 hamaze kugaruka 206, abagera kuri 92 basigaye nabo ntabwo bari mu mbibi z’akarere kuko uri mu mbibi z’akarere turamuhiga no mu mwobo tukamukuramo tukamusubiza mu ishuri.”

Habitegeko yashimangiye ko nta mpamvu n’imwe ishobora gutuma bemera ko hari umwana uvutswa amahirwe yo kwiga.

Ati “Twabyumvikanye n’abarimu mu nama y’uburezi, kuvuga ngo umwana ntiyishuye umusanzu bimukura mu ishuri ahubwo umukuru w’umudugudu n’abaturage yewe na Meya twaheba tukajya kuyahingira ariko umwana ari mu ishuri.”

Yavuze ko mu myaka yo hambere hari abanyarwanda benshi batagize amahirwe yo kwiga kubera impamvu zitandukanye ariko muri iki gihe abana bose bagomba kwiga kuko bafite ayo mahirwe bakesha imiyoborere myiza.

Yakebuye bamwe mu babyeyi bagifite imyumvire mike ituma bakoresha abana imirimo ivunanye bakabavutsa kwiga abibutsa ko bakwiye kubireka.

Yavuze ko hari n’abana batumva bashaka kwigira ibirara ariko bazakomeza kubigisha no kubakebura.

Minisitiri w’ubutegetsi bw’Igihugu, Prof Shyaka Anastase, ubwo yari mu Ntara y’Amajyepfo ku wa mbere tariki ya 10 Kamena 2019 yashimiye Akarere ka Nyaruguru igikorwa cyiza kakoze cyo kugarura mu ishuri abana bari baravuyemo asaba n’abandi kubikora.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza