Kwamamaza

Nyaruguru: Abaturage bataka inzara, ubuyobozi bukabapfuka umunwa

Yanditswe kuya 3-08-2016 saa 19:48' na Prudence Kwizera


Umuyobozi w’Akarere ka Nyaruguru, François Habitegeko, ahakana amakuru atangwa na bamwe mu baturage bo muri aka karere bavuga ko bafite ikibazo cy’inzara akavuga ko ikibazo gihari ari icy’amapfa kuko izuba ryacanye kare rigatuma umusaruro utaba mwiza ku bahinzi.

Mu kiganiro yagiranye n’abanyamakuru kuri uyu wa kabiri tariki ya 02 Kanama 2016, Habitegeko yagaragaje ko nubwo nta nzara iri mu karere ayoboye, afite impungenge ko izuba rikomeje kuva abaturage be bahura n’ibibazo bikomeye.

Yagize ati « Muri rusange nta nzara ihari, gusa ni ugusenga kuko turamutse tugize ibibazo imvura ntigwire igihe ho twagira ibibazo bikomeye ».

Bamwe mu baturage batangiye gutaka inzara

Bamwe mu batuye mu murenge wa Nyabimata na Kibeho mu karere ka Nyaruguru bavuga ko imyaka yabo yakubiswe n’izuba iruma kuri ubu bakaba hari ababwirirwa bakanaburara.

Bemeza ko iyo batabonye aho bakora ikiraka ngo babashe guhaha ku isoko, ntakundi babigenza uretse kujya mu buriri bakaryama.

Emmanuel Kimana utuye mu murenge wa Nyabimata ati « Ndya rimwe nabwo nijoro nkifunga, kubera abana, dufite inzara hano cyane ».

Agnes Mukarubibi wo mu murenge wa Kibeho na we yavuze ko izuba ryatumye imyaka yose yumira mu murima, ariko akavuga ko yatabawe no kuba yarahawe akazi na koperative ihinga mu gishanga.

Mukarubibi ati «Imyaka yarumye, abahinze ibirayi bo nta na kimwe cyameze, ubu ku gasozi nta kintu gihari amakiriro ari ku isoko.»

Abatuye mu mirenge itandukanye y’Akarere ka Nyaruguru baganiriye na IGIHE icyo bahurizaho ni uko abanshi barya rimwe ku munsi kandi bakaba bafite impungenge zuko bazabaho mu minsi iri imbere igihe izuba rikomeje kuva.

Akarere kafashe ingamba

Umuyobozi w’Akarere ka Nyaruguru François Habitegeko avuga ko nyuma yo kubona ingaruka ziri guterwa n’izuba ryinshi ryavuye kare, bafashe ingamba zikumira ko abaturage bahura n’ikibazo cy’inzara.

Muri zo harimo gutunganya ibishanga byose biri muri ako karere no kubihingamo, no gutangira gukoresha uburyo bwo kuhira imyaka ibihinzemo.

Gusa avuga ko hakiri ikibazo cy’uko ntabushobozi akarere gafite ko kuhira imyaka ihinze ku misozi.

Yagize ati «Turi gutunganya cyane ibishanga, kugira ngo bizaramire abaturage nituramuka tugize icyo kibazo cy’imvura itaguye kare. Icya kabiri, turi gushakisha imashini zo kuhira, mu bishanga binini dufite byose bari kuhira, (…) ni ukugira ngo bizabashe gutabara abaturage kuko tutaragira ubushobozi bwo kuhira i musozi ».

Bimwe mubishanga Meya Habitegeko yavuze bizifashishwa kandi byamaze gutunganwa, harimo igishanga cy’Urwonjya, icy’Akagera, n’ibindi birimo Rwoganyoni, Agatorove, Maziatukura na Warurindi.

Habitegeko yakomeje ashimangira ko nta gikuba cyacitse cy’uko mu karere ayoboye hari inzara cyangwa ngo ibyo kurya byabuze, ariko avuga ko hari impungenge.

Ati «Ariko mu by’ukuri muri rusange ibyo kurya biracyaboneka, gusa impungenge zo zirahari umuntu ntabwo yabyirengagiza».

Akarere gaherutse gukora igenzura

Meya Habitegeko avuga ko nk’ubuyobozi baherutse gukora igenzura mu mirenge yose igize akarere bareba niba abaturage bafite ikibazo cy’inzara, ngo basanga ibyo kurya bihari nubwo bidahagije.

Yasobanuye ko basanze mu gihembwe cy’ihinga A (Season A) igihe baba bahinga ibigori, umusaruro waragenze neza, ikibazo cyarabaye mu gihembwe cy’ihinga B (Season B) ku musaruro w’ibishyimbo n’ibirayi.

Bityo Habitegeko asanga n’umuturage waba ashonje byaba ari ku giti cye, bitaba ari ikibazo kiri mu karere hose cyangwa mu murenge runaka.

Ikibazo cy’izuba rikomeye ryavuye kare rigatuma abaturage babura umusaruro kimaze iminsi rigaragara muri tumwe mu turere tw’Intara y’i Burasirazuba, aho hari bamwe mu baturage basuhutse bajya gushakira ubuzima ahandi kubera kubura amafunguro.

Zimwe mu ngamba Leta y’u Rwanda yafashe harimo kugoboka abahuye n’iki kibazo bahabwa ubufasha abandi bagahabwa imirimo, ndetse no gushyiraho uburyo bugezweho bwo kuhira imyaka hakoreshwa imashini zabugenewe.

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved