Nyaruguru: Ishwagara bahawe na Perezida Kagame yabakuye ahakomeye

Yanditswe na Kanamugire Emmanuel
Kuya 21 Ugushyingo 2016 saa 11:44
Yasuwe :
0 0

Abahinzi bo mu Karere ka Nyaruguru bavuga ko ubutaka busharira bwatumaga bahinga ntibagire icyo beza, nyamara ngo ubu ishwagara bahawe na Perezida Kagame yabakuye ahakomeye kuko basigaye bahinga imyaka ikera.

Ubwo Perezida Kagame yasuraga Akarere ka Nyaruguru mu mwaka wa 2013, abaturage bamubwiye ko bafite ikibazo cy’ubutaka busharira butuma bahinga ntibeze, abemerera ishwagara.

Iyi shwagara yabagezeho muri uwo mwaka, ab’inkwakuzi batangira kuyishyira mu mirima yabo.

Mwumvaneza Ezechiel, umwe mu bafashe ishwagara ku ikubitiro yagize ati “Namenye ubwenge iwacu mu murenge wa Kibeho inzara inuma, kurya ari intambara. Aho mbereye umugabo nabwo byakomeje gutyo ku buryo iwanjye twari twaramenyereye ubuzima bwo kurya rimwe ku munsi, ariko ubu byarahindutse kubera twavuguruye ubuhinzi twifashishije ishwagara twahawe na Perezida Kagame.”

Ibi bishimangirwa na Mukasekuru Mariya na we uvuga ko basigaye bahinga bakeza ndetse baciye ukubiri n’inzara.

“Twaryaga impombo n’ibishishwa by’imyumbati”

Kubera ikibazo cy’inzara bavuga ko yari yarabaye akarande muri aka karere, abaturage ngo bari batunzwe n’ibyo bita impombo.

Singirankabo Siméon yagize ati “Impombo ni utuntu twimezaga mu mashinge cyangwa mu mukenke. Ngibyo ibyari ibiryo byacu mbere yo mu 1994.”

Akomeza avuga ko ubundi iyo wabaga wejeje imyumbati wayiryaga udasize ibishishwa byayo ubusanzwe bigaburirwa amatungo.

Kuba baraciye ukubiri n’inzara bihanywa kandi na Kayombya Jean Bosco, agira “Icyo dushimira Intore izirusha intambwe ni uko abana bacu batazicwa n’inzara nk’iyatwishe, ubu turahinga tukeza iyo ikirere kitadutengushye.”

Umuyobozi ushinzwe ubuhinzi mu Murenge wa Kibeho, Nkurunziza Afrodis, avuga ko ishwagara abaturage bahawe yagize ingaruka nziza ku buhinzi.

Yagize ati “Abaturage bahabwa ifumbire mvaruganda hamwe n’imbuto y’indobanure mu buryo bwa nkunganire. Bahabwa kandi ishwagara bememerewe na Perezida, bikabafasha guhinga ndetse bigaragara ko umusaruro ugenda wiyongera. Ubu twashyize imbaraga mu guhinga ibirayi, ibishyimbo, ibigori no gushyira gusazura urutoki.”

Imibereho mibi yabafatanyaga n’ababapfobyaga babahimba amazina adahwitse abatesha agaciro, kuri ubu bavuga ko byagiye nka nyomberi kubera imiyoborere myiza.

Umuyobozi ushinzwe ubuhinzi mu Murenge wa Kibeho, Nkurunziza Afrodis
Abaturage bari babukereye kwakira Perezida Kagame ubwo yasuraga Akarere ka Nyaruguru mu 2014

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244