Kwamamaza

Nyarugenge: Abacururiza ku mabaraza bahawe icyumweru kimwe cyo kuba bafunze

Yanditswe kuya 17-11-2016 saa 20:07' na Thamimu Hakizimana


Ubuyobozi bw’Umurenge wa Nyarugenge, bwahaye abacururizaga ku mabaraza y’imbere y’amaduka atandukanye yo mu Mujyi wa Kigali icyumweru kimwe cyo kuba bafunze mu rwego rwo kurwanya akajagari.

Ubuyobozi bw’Umurenge wa Nyarugenge bwabitangaje, kuri uyu wa Gatatu tariki ya 16 Ugushyingo 2016, mu nama bwagiranye n’abacuruzi bagera kuri 200 bakorera mu Mujyi wa Kigali.

Aba bacuruzi bakorera mu Murenge wa Nyarugenge muri Quartier Matheus no mu Biryogo, bamenyeshejwe ko guhera tariki ya 24 Ugushyingo 2016, ntawe uzongera gushyira ibicuruzwa bye ku mabaraza cyangwa ku nkuta z’amaduka bakoreramo.

Abacuruzi bo basabye ubuyobozi ko bwajya bubareka bagashyira igicuruzwa kimwe cyangwa bibiri imbere y’amaduka bakoreramo kugira ngo abakiriya babo bamenye ko bihari.

Umwe yagize ati “Turifuza ko batureka tukajya dushyira byibuze ibicuruzwa byacu bibiri cyangwa kimwe imbere y’iduka kugira ngo n’umugenzi uhise amenye ibyo ducuruza kuko imiterere y’amaduka dukoreramo idashobora gutuma umuntu amenya ibirimo imbere atahinjiye.”

Bamwe muri aba bacuruzi bakorera muri ’Quartier Commercial’ babwiye ubuyobozi ko iki cyemezo kizabagora cyane bitewe n’uko hari amafaranga agera ku bihumbi 100 babanza kwishyura ba nyir’ayo maduka kugira ngo babemerere gutangira gucuruza.

Umunyamabanga Nshingwabikorwa w’Umurenge wa Nyarugenge, Havuguziga Charles yabwiye IGIHE ko bagifashe kugira ngo barwanye ubucuruzi bw’akajagari mu Mujyi wa Kigali.

Yagize ati “ Iyi nama yari igamije kuganira ku bintu bitatu birimo gushishikariza abacuruzi gucururiza mu maduka, ibintu bikava ku mabaraza y’aho bakorera n’ikibazo cy’isuku nke ikigaragara ku bacuruzi bamwe bakijugunya imyanda y’ibyo barangije gucuruza mu muhanda aho kuyita ahabugenewe ndetse n’icy’umutekano w’aho bakorera.”

Yasoje asaba abacururizaga ku mabaraza kwishyira hamwe bagashakisha amaduka agendanye n’igihe bakaba ariyo bakoreramo ndetse anabashishikariza kuganira na ba nyir’amaduka baba bishyuye ngo bakorere imbere yayo kubasubiza amafaranga babahaye.

Umunyamabanga Nshingwabikorwa w'Umurenge wa Nyarugenge, Havuguziga Charles
Inama yiga ku guca ubucuruzi bwo ku mabaraza yitabiriwe n'abayobozi mu nzego zitandukanye
Bamwe mu bacuruzi bitabiriye iyi nama
Ubucuruzi bwo ku mabaraza bukorwa na benshi muri Quartier Matheus mu Mujyi wa Kigali
Umurenge wa Nyarugenge wahagurukiye ubucuruzi bwo ku mabaraza

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved