Nyarugenge: Polisi yafashe agatsiko k’abajura bibye mudasobwa mu Ishuri rya Nzove

Yanditswe na IGIHE
Kuya 6 Mutarama 2017 saa 07:29
45 31

Polisi y’u Rwanda ikorera mu Karere ka Nyarugenge yataye muri yombi abagabo batanu bafatanywe ibikoresho by’ikoranabuhanga birimo za mudasobwa bari bibye mu Rwunge rw’Amashuri rwa Nzove ruherereye mu Murenge wa Kanyinya.

Aba bagabo bafatanywe ibikoresho bitandukanye birimo mudasobwa esheshatu, televiziyo ya Flat Screen, indangururamajwi eshanu n’ibindi.

Umuvugizi wa Polisi mu Mujyi wa Kigali, SP Emmanuel Hitayezu wemeje iby’itabwa muri yombi ry’aba bagabo yagize ati “Ubusanzwe iki kigo kirindwa n’abazamu babiri, kuko basimburana saa kumi n’imwe n’igice, uwagombaga gukora nijoro yatinze kuza gusimbura mugenzi we , bigeze mu ma saa kumi n’ebyiri n’igice z’umugoroba yaratashye asiga ikigo cyonyine. Mu gihe nta muzamu wari uhari rero, nibwo aba bajura baje bica ingufuri y’ahaba izi mudasobwa n’ibi byuma by’ikoranabuhanga.”

Yakomeje avuga ati “Uyu wagombaga gukora nijoro aje yasanze bahibye ahamagara umuyobozi w’ikigo, ahageze nibwo yahamagaye Polisi, itangira iperereza.”

SP Hitayezu yavuze ko muri iryo joro Polisi ifatanyije n’abaturage, babonye umwe muri aba bagabo yikoreye ibintu mu makarito, baramukurikira baramufata ndetse basanga aho yajyaga hari n’ibindi bikoresho batundaga bajyana.

Yakanguriye abaturage kutirara bagashyira ingufu mu gukora amarondo bagamije kwibungabungira umutekano anasaba abayobozi b’ibigo by’amashuri gushyiraho ingamba zihamye zo gucunga umutekano mu bigo.

Aba bakekwa ubu bafungiwe kuri sitasiyo ya Polisi ya Kigali mu gihe iperereza rikomeje ngo hamenyekane amakuru arambuye y’ubu bujura.

Ingingo ya 300 yo mu gitabo cy’amategeko ahana ibyaha mu Rwanda, ivuga ko umuntu wese ukora ubujura budakoreshejwe kiboko cyangwa ibikangisho ahanishwa igifungo kuva ku mezi atandatu kugeza ku myaka ibiri n’ihazabu y’amafaranga y’u Rwanda yikubye inshuro kuva kuri ebyiri kugeza kuri eshanu z’agaciro k’icyibwe cyangwa kimwe gusa muri ibyo bihano.

Umuvugizi wa Polisi mu Mujyi wa Kigali, SP Emmanuel Hitayezu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE